Н.Энхбаяр МАН-ын хагарлаас ашиг хүртэж, хамгийн их төсөвтэй Эрүүл мэндийн сайдын суудлыг дөрөв дэхээ авлаа

      Монголын улс төрийн “ХААН” ширээнд хамгийн удаан заларсан хүн бол экс Ерөнхийлөгч Н.Энхбаяр. Түүнийг 2009 оны сонгуулиар МАХН (МАН), АН-ынхан хүч хавсран унагаж байсан бол Н.Энхбаяр МАХН-аа МАН-д нэгтгэсэн цагаас эхлэн эрх баригчид түүнд асар өндөр “төлбөр” төлдөг болсон нь нууц биш. Н.Энхбаярын үнэнч албатуудын нэг З.Баянсэлэнгэ өнгөрсөн долоо хоногт хотын мэр Х.Нямбаатартай хамт Туулын хурдны зам барихыг эсэргүүцэгчдийн эсрэг жагссан бол Н.Энхбаяр Төрийн ордонд “Хүний шунал тэчъяалыг хамгийн их хөдөлгөдөг зүйл бол эрх мэдэл” хэмээн “сургааль” айлдав. Тэрбээр МАН-ын хагарал дээр Харбиний гэрээний эсрэг суртал ухуулга хийж “гал” нэмсэн. Хотын мэр Х.Нямбаатартай “Өргөө” зочид буудлыг өгнө, өгөхгүй” гэж толхилцсон. Эрх баригчдын зодоон Төрийн ордонд ширүүсэх үеэр хурдаа аван гүйж ирж, хошуу нэмэрлэдэг хүн бол Н.Энхбаяр. Ерөнхий сайд Н.Учрал МАН дахь 30:38-ын талтай уулзаж, Үндэсний эвсэл, ХҮН намд сайдын суудал санал болгосон өдрүүдэд Н.Энхбаяр дахиад гарч ирлээ. Төрийн ордонд тавдугаар араандаа хурд авч гүйсний үр дүнд тэрбээр хүү Э.Батшугартаа Монголын хамгийн их төсөвтэй Эрүүл мэндийн сайдын суудлыг авч өглөө. Өөрөөр хэлбэл, Н.Энхбаяр ЭМЯ-ыг удирдах эрхийг хүүдээ авч өгсөн нь энэ салбарын оройд заларсан дөрөв дэх тохиолдол юм.

Т.Ганди. Н.Энхбаярыг “ХААН” байхад фракцид нь багтаж явсан хүмүүсийн нэг бол УИХ-ын гишүүн асан Т.Ганди. Тэрбээр Ц.Элбэгдоржийн Засгийн газарт 2004-2006 онд Эрүүл мэндийн сайдаар ажиллаж байсан. Тухайн үеийн МАХН-д намын дарга, Ерөнхий сайд асан М.Энхболдын эсрэг бүрдсэн “Элсний 13”-ын нэг. Өөрөөр хэлбэл, Н.Энхбаярын фракцийнхан М.Энхболдын эсрэг ийн хөдөлж байсан түүхтэй.

Н.Удвал. Н.Энхбаяр МАХН гэдэг нэрийг “бэлэг” болгон авч, Тусгаар тогтнолын ордон тийш дажин зарлах үед түүний баруун гар болж явсан хүн бол Н.Удвал. МАН 2012 оны сонгуульд ялагдаж, АН эрх барих үед Н.Удвал Эрүүл мэндийн сайдаар ажилласан нь 2012-2014 он. Н.Удвал Эрүүл мэндийн сайдаар ажиллах үедээ хоригдлуудын эмнэлгийн үйлчилгээг сайжруулах зорилгоор журамд өөрчлөлт оруулж, албан тушаалын хэргээр хоригдож байсан Н.Энхбаярыг ял эдлэх ихэнх хугацаагаа хуучнаар “Сайд нарын” гэгдэх II эмнэлэгт хэвтэн өнгөрүүлэх боломж олгосон гэдэг.

Г.Шийлэгдамба агсан. Н.Энхбаярын МАХН-ын Ерөнхий нарийн бичгийн даргаар 2012-2015 онд ажиллаж байсан. Эрүүл мэнд, спортын сайдаар 2014-2016 онд ажиллаж байсан.

Харин одоо Эрүүл мэндийн сайд Э.Батшугар. Ерөнхий сайд Н.Учрал түүнийг Эрүүл мэндийн сайдаар томилох шийдвэр гаргаснаа “Би Э.Батшугарыг хагалгаа хий гээгүй. Энэ салбарт цахим шинэчлэл хийж, сайн менежмент хийх чадвартай хүн гэж Эрүүл мэндийн сайд болгож байгаа юм. JP Morgan-д ажиллаж байсан залуу шүү дээ” гэж УИХ-ын чуулган дээр тайлбарласан. Э.Батшугарын хувьд, JP Morgan-д хөрөнгө оруулалтын банкир, Монголбанкны дэд Ерөнхийлөгч, “Медиа холдинг” ХХК-ийн ТУЗ-ийн гишүүнээр ажиллаж, 2021 онд УИХ-ын гишүүн болсон намтартай. Эрүүл мэндийн сайдаар томилогдсон тэрбээр “Монфарм трейд” компанид хувь эзэмшдэг нь олны анхаарлыг татаж байна. Өөрөөр хэлбэл, эмийн бизнесийн салбарт ашиг сонирхлын зөрчилтэй гэж хүмүүс хардаж байгаа юм. “Экс Ерөнхийлөгч Н.Энхбаяр ийнхүү хүүгээ Эрүүл мэндийн сайдаар томилуулсан нь өөрийнх нь хэлсэнчлэн энэ салбарт хүсэл тэчъяалыг нь хөдөлгөх юу байдаг бол” гэж хардахад хүргэж байна. Учир нь улс төрийн хроникоос харвал Н.Энхбаяр Эрүүл мэндийн сайдын суудлыг дөрөв дэхээ авлаа. Т.Ганди, Н.Удвал, Г.Шийлэгдамба агсан... Түүний дараа хүү Э.Батшугар нь.

С.Тулга