Д.Мөнх-Эрдэнэ: Худал мэдээлэл хийсэн Л.Оюун-Эрдэнийг би шүүхэд өгч, 11 тэрбум төгрөг нэхэмжилсэн

     "Бодь интернэшнл" ХХК-ийн гүйцэтгэх захирал асан А.Амундра өчигдөр (2026.04.04) шөнө инстаграмд Хууль зүй, дотоод хэргийн дэд сайд Д.Мөнх-Эрдэнийн зургийг "2019 оны есдүгээр сарын 22-нд. “Red rock Тэрэлж”-ийн хурлын өрөөнд Тавантолгой-Гашуунсухайт чиглэлийн төмөр замын гэрээг хийхээс өмнө хуулийн зөвлөгөө өгч, өөрийн биеэр, өөрийн гараар санхүүжилтийн гэрээг бэлтгэж суугаа нь” гэсэн тайлбартай сторидсон. "Голомт”-ын Д.Баясгалан саяхан Eagle телевизэд ярилцлага өгөхдөө 110 сая ам.долларын асуудлыг няцаасан бол А.Амундра “Тавантолгой төмөр зам”-аас “Бодь интернэшнл” ХХК руу 2019 оны арваннэгдүгээр сарын 13-нд 286 тэрбум 318 сая 170 мянга 504 төгрөгийн гүйлгээний баримтыг дэлгэсэн. Мөн цүнхтэй мөнгөний зураг дээр "Хэдэн цүнх хэний машинд орсон бэ" гэж бичсэнээ сторидоо хийсэн юм.

Харин энэ талаар Хууль зүй, дотоод хэргийн дэд сайд Д.Мөнх-Эрдэнэ твиттерт "Эд нар бүр аргаа баржээ. Семинар, хурал, зөвлөлгөөн, хэлэлцүүлэг гээд "Red rock" дээр хувь, хувьсгалын олон л ажлаар очиж байлаа. Одоо бүр хаа хамаагүй зурагнууд нийлүүлээд л гүтгээд явчихдаг. Б.Цогтгэрэл ээ, чиний хулгай мөд илрээд үнэнд гүйцэгдэнэ ээ. Өмнө нь Л.Оюун-Эрдэнэ гэж этгээдийн худал мэдэгдэлтэй холбогдуулан би шүүхэд хандаж, зөвлөх компаниудаараа дамжуулан асар их мөнгө авсан гэх гүтгэлгийн улмаас учирсан гэм хорыг арилгуулахаар 11 тэрбум төгрөгийг нэхэмжилсэн. Худал мэдэгдэлд нь дурдсан энэ мөнгийг Монголын хүүхдүүдийн сайн сайхны төлөө зарцуулна гэж бодож байна. Хүүхдийнх нь нисдэг тэрэг хөлслөн ниссэн тансаглал, асар үнэтэй хэрэглээ, тамхи татсан хүнийг 50 сая төгрөгөөр торгоно гэх элийрлээс харахад Л.Оюун-Эрдэнэ төрийн эрхэнд байсан зургаан жилийн хугацаандаа асар их баяжсан нь тодорхой тул энэ мөнгийг хялбархан төлөх байх аа. Би энэ гүтгэгч этгээдийг Монголын төрөөс зайлуулна. Одоо нэмээд Б.Цогтгэрэлийг шүүхэд өгөх болно. Эрүүгийн хуулийн 13.14-р зүйл. Илт худал мэдээлэл тараах гэмт хэрэг түдгэлзсэн үеийг энэ хог шаарнууд сайн ашиглаж байна" гэлээ.

Ж.Болд