Н.Лүндэндорж: УИХ-ын гишүүнийг эгүүлэн татах тухай Үндсэн хуулийн 29.3 дахь заалт Цэцээс болж амилахгүй нь

     Ерөнхийлөгч У.Хүрэлсүхийн санаачлан өргөн барьсан УИХ-ын тухай хуульд нэмэлт өөрчлөлт оруулах тухай хуулийн төслийг хэлэлцэх эсэхийг УИХ-ын Хүний хөгжил, нийгмийн бодлогын байнгын хороо ирэх мягмар гарагт (2026.04.07) хэлэлцэнэ.

УИХ-ын зарим гишүүн олон нийтийн сүлжээнд иргэдтэй зүй бус харьцаж, зарим нь зуу зуун сая ам.долларын авлигын хэргээ илчлэлцэж буй энэ үед олон нийт хууль зөрчдөг, хуралдаан тасалдаг, авлига, албан тушаалын гэмт хэрэгт холбогдсон УИХ-ын гишүүдийг эгүүлэн татах талаар хэлж шаардсаар байгаа. УИХ Ерөнхийлөгч У.Хүрэлсүхийн санаачилсан хуулийн төслийг хэлэлцэхийн өмнө буюу өнөөдөр (2026.04.05) хууль зүйн шинжлэх ухааны доктор Н.Лүндэндорж “Улс төрийн болон эрүүгийн хариуцлага зарчмын ялгаатай. Шалгадаг, шүүдэг субьект нь өөр өөр. УИХ-ын гишүүний тангараг зөрчсөн эсэх асуудлыг Үндсэн хуулийн Цэц шалгаж, улс төрийн хариуцлага хүлээлгэх эсэхийг шийднэ. Эрүүгийн хариуцлагыг ердийн эрүүгийн шүүх шийднэ. Гэтэл манай Цэц ашиг сонирхлын зөрчлийн илэрхий зөрчлийг эрүүгийн журмаар шалгагдаж бгаа гэх үндэслэлээр хэрэгсдэггүй. Цэц дээрх хоёр хариуцлагыг ялгаж мэдэхгүй бна уу, эсвэл хүсэхгүй бна уу. Ингэвэл 2019 оны Үндсэн хуулийн нэн чухал нэмэлт 29.3 дахь заалт хэзээ ч амилахгүй. Гишүүдэд хэзээ ч хариуцлага тооцож чадахгүй. Тэр Ерөнхийлөгчийн санаачилсан хуулийг ч батлаад нэмэргүй" гэлээ. Үндсэн хуулийн 29.3-т "Улсын Их Хурлын гишүүн бүрэн эрхээ хэрэгжүүлэхдээ өргөсөн тангаргаасаа няцаж, Үндсэн хууль зөрчсөн бол түүнийг Улсын Их Хурлын гишүүнээс эгүүлэн татах үндэслэл болно. Улсын Их Хурлын гишүүн гэмт хэрэгт холбогдсон тухай асуудлыг Улсын Их Хурлын чуулганаар хэлэлцэж, бүрэн эрхийг нь түдгэлзүүлэх эсэхийг шийдвэрлэнэ. Уул гишүүн гэмт хэрэг үйлдсэн гэж шүүх тогтоовол Улсын Их Хурал түүнийг гишүүнээс нь эгүүлэн татна" гэж заасан.

Ж.Болд