АН, ХҮН-ынхан Ерөнхийлөгчийн санаачилсан хуулийн эсрэг бас ямар наймаа хийсэн бол?

    Улс төрийн хүрээнд "Тэврэлтийн өрөө" гэж байдаг нь ил болсон. Өнгөн дээрээ шударгын дүрд тоглож, сошиалд трэнд болох гоё үг бодож олоод камерийн өмнө шоудацгаана. Гэвч үнэн хэрэгтээ олны нүднээс далд "Тэврэлтийн өрөө"-ндөө хүний, өөрийн нам, бүлэглэлийнхэнтэй тэврэлдэж, хууль наймаалцаж, хуулийн эсрэг "Муухай сценари"-аа дэглэж, үгсэн хуйвалддаг нь Монголын улс төрд байдаг л үзэгдэл болсон. Уг нь байх ёсгүй, ёс зүйн хэм хэмжээ, УИХ-ын гишүүний тангаргаа умартсан хэрэг л дээ.

Гэхдээ л Монголын улстөрчдөд тэр бол байдаг л үзэгдэл болж ужгираад удаж байна. Өөрсдөө "Тэврэлтийн өрөө"-ний VIP зочид мөртлөө ард иргэдийн тархийг "Гучин жилийн схемээс л боллоо. Энэ схем, системийг өөрчлөх ёстой" гэж угаана. Ерөнхийлөгч У.Хүрэлсүх сошиалд ч, УИХ-ын индрээс ч "Би парламентын ардчиллыг ямагт дэмжинэ. Намайг Ерөнхийлөгч байхад Үндсэн хуульд дахиж нэмэлт өөрчлөлт оруулахгүй" гэж хэд хэдэн удаа хүний хэлээр хэлсэн дээ, уг нь. Нам дамнасан бүлэглэлд "У.Хүрэлсүхийн хууль"-ийг явуулахгүйгээр бүрэн эрх гэдэг бамбайн ард нуугдах асар том сонирхол бий. Яг үнэндээ АТГ, хуулийнхан маш муу байна, энэ цаг үед! Тэд улс төрөөс ангид, хараат бусаар ажиллаж чаддаг бол Нүүрсний хулгайд нэр холбогдсон 17-оос эхлээд Харбиний гэрээ, тендер, концесс, авлига, албан тушаалын хэрэгт холбогдсон гишүүд 126-д байж л байна. Хэн хэн бэ гэдгийг иргэд ч нэр цохоод нэрлэж чаддаг болтол хэвлэлүүд, сошиалынхан шуугиж л байдаг шүү дээ. Бүрэн эрхийнх нь цаанаас чирээд гаргахад бэлэн криминал сүрэг өдөр болгон л камерын өмнө даналзаж харагдах. АН-аас гэхэд хэн хэн байна? "УХүрэлсүхийн хууль" батлагдвал Жэнкогоос эхлээд олон хүн эгүүлэн татагдах болзлоо давуулан биелүүлсэн. ХҮН намыг улс төрийн инкубаторт бойжуулалцсан Л.Оюун-Эрдэнэ Т.Доржхандыг "Сүнсээ худалдсан" гэсэн. Хүний нэр бариад тэр одоо бас хэнд сүнсээ худалдав?

Ерөнхийлөгч У.Хүрэлсүх хаврын чуулганы нээлт дээр "Ёс зүйн хувьсгал хийнэ" гэсэн. ҮАБЗ-ийн тэргүүний хувьд, ард нийтийн ашиг сонирхол, цаг үеийн шаардлагад нийцүүлж хуулийн төсөл санаачилсан болов уу. Үндсэн хуулийн нэмэлт өөрчлөлтийн дагуу бүрдсэн анхны 126 дотор жагсаалтын өрөө төлөх гэсэн улаан хэрүүлч хэдэн хүн, хууль уншиж ойлгох нь байтугай төрийн хууль дээр гишгэдэг лаивчин, тэдний зүг кнопоо юун дээр яаж дарахыг дохиж суудаг эзэд, эздийнх нь цаана бүр том улс төр, бизнесийн бүлэглэл байгаа нь "Энэ яг парламент мөн үү" гэж олон нийт гайхширч, бухимдахад хүргэж байна. Ийм УИХ, ийм УИХ-ын гишүүд ч гэж юу байсан юм гэмээр хүмүүс л харагддаг. Яг үнэндээ УИХ-ын гишүүд өөрсдөө тангаргаа зөрчиж, парламентын ардчилал, дархлаандаа халдаад байна. "У.Хүрэлсүх дарангуйлал тогтоох гэж байна" гэдэг тархи угаалт.

МонголдТИРАН амилахгүй. Монгол менталитет өөр!! Ер нь Ерөнхийлөгчийн санаачилсан хуулийн төслийг уншсан нь хэр олон бол? Чуулгандаа суудаггүй, тангаргаа зөрчсөн, ёс зүйн зөрчил гаргасан гишүүдийг эгүүлэн татах тухай заалтуудтай. Эмзэг нь эмзэг, яаж ч тоглож, эсрэг тархи угаалт хийхэд амархан хуулийн төсөл. Тэр тусмаа У.Хүрэлсүх гэдэг хувь улстөрч рүү чиглэсэн улс төр ид байгаа энэ үед "Ерөнхийлөгч дарангуйлал тогтоох гэж байна" гэж шуугиулах нь тодорхой байсан. "У.Хүрэлсүх жинхнээсээ ХААН болох гэж байна. УИХ-ын гишүүдийг үгэнд нь орохгүй бол нэг нэгээр нь сугалж, парламентын дархлаанд халдах гэж байна" гэх мэтээр янз бүрийн мессэж сошиалаар өгөхөд ч амархан. "У.Хүрэлсүхийн санаачилсан хуулийн төсөл хаврын улс төрийн аяыг даах уу" гэдэг яриа ч байсан. Гэхдээ л 126-г хар даа. Тэд яг хууль тогтоогчид мөн үү? Төрийн хууль хэлэлцэж баталдаг танхимд аль аль бүлэглэлийн төлөөллүүд суудлаа эзэлсэн байна вэ?

Ж.Болд