Испани 500 мянга орчим бичиг баримтгүй цагаачдад хууль ёсны статус олгохоор болжээ ~ Analiz.mn

Испанийн Засгийн газар 500 мянга орчим бичиг баримтгүй цагаачдад хууль ёсны статус олгож, тэднийг хөдөлмөрийн зах зээлд албан ёсоор нэгтгэх төлөвлөгөөг баталжээ.

Ерөнхий сайд Педро Санчес энэ шийдвэрийг шударга ёсны үйлдэл төдийгүй Испанид зайлшгүй хэрэгтэй алхам гэж тодорхойлсон байна. Сошиал сүлжээнд нийтэлсэн захидалдаа социалист үзэлтэй Санчес бараг хагас сая хүн аль хэдийнэ бидний өдөр тутмын амьдралын нэг хэсэг болсныг хүлээн зөвшөөрөхийг энэ бодлого зорьж байна гэжээ.

Испанийн сөрөг хүчний Ардын нам уг хуульчлалыг зогсоохыг оролдоно гэдгээ мэдэгдсэн бөгөөд “хууль бус цагаачдыг шагнаж, цаашид илүү олон хүн ирэхэд нөлөөлнө” гэж шүүмжилжээ.

Засгийн газрын төлөвлөгөөнд бичиг баримтгүй цагаачдад нэг жилийн хугацаатай, сунгах боломжтой оршин суух зөвшөөрөл олгох юм. Үүнд хамрагдахын тулд өргөдөл гаргагчид Испанид дор хаяж таван сар амьдарсныг батлах, мөн гэмт хэргийн бүртгэлгүй байх шаардлагатай. Өргөдлийг дөрөвдүгээр сарын 16-аас зургадугаар сарын эцэс хүртэл хүлээн авах аж. Санчес хүн ам нь хөгширч буй Испанид эдийн засаг, нийтийн үйлчилгээг тогтвортой байлгахад цагаачид хэрэгтэйг онцолсон байна.

Funcas судалгааны төвийн тооцоогоор Испанид 840 мянга орчим бичиг баримтгүй цагаач байдаг бөгөөд тэдний дийлэнх нь Латин Америкаас ирсэн хүмүүс аж. Энэхүү бодлого нь Европын олон орон цагаачлалын хяналтаа чангатгаж буй үед хэрэгжиж буйгаараа онцлог юм.

Өмнө нь Испанид социалист болон Ардын намын Засгийн газрууд цагаачдад өршөөл үзүүлэх бодлогыг хэрэгжүүлж байсан. Хамгийн сүүлд 2005 онд социалист Засгийн газрын үед 577 мянган хүн оршин суух зөвшөөрөл авч байжээ.

Эх сурвалж: Хүрэлбаатар БЯМБАЖАРГАЛ itoim.mn

Испани 500 мянга орчим бичиг баримтгүй цагаачдад хууль ёсны статус олгохоор болжээ

Сэтгэгдэл бичих

Шинэ мэдээ

Испани 500 мянга орчим бичиг баримтгүй цагаачдад хууль ёсны статус олгохоор болжээ

Санал болгох

Сэтгэгдэл бичих

Шинэ мэдээ