Хан-Уул дүүргийн цагдаагийн газрын эмэгтэй алба хаагчидтай уулзлаа

      Хан-Уул дүүрэгт орон сууцны хороолол ихээр баригдаж байгаатай холбоотойгоор хүн амын хэт төвлөрөл үүсэж буй. Энэ хэрээр гэмт хэрэг, зөрчлийн тоо ихэссэн.

Үүнтэй уялдуулан цагдаагийн алба хаагчдын ажиллах орчин нөхцөлийг сайжруулах, хүний нөөцийн тогтвортой байдлыг дэмжих шаардлага үүсэж байна. Энэ хүрээнд нийслэлийн Санхүү, эдийн засаг, хөгжлийн бүтээн байгуулалтыг эрчимжүүлэх төсөл, хөтөлбөрийн зохицуулагч Л.Хосбаяр Хан-Уул дүүргийн цагдаагийн газрын эмэгтэй алба хаагчдыг хүлээн авч уулзлаа.

Уулзалтаар цагдаагийн алба хаагчдын гэмт хэрэг, зөрчлөөс урьдчилан сэргийлэх чиглэлд хэрэгжүүлж буй бодлого, үүрэг гүйцэтгэхэд тулгамдаж буй асуудал, тэр дундаа эмэгтэйчүүдийн нийгмийн хангамжийг сайжруулахад шаардлагатай зүйлсийн талаар хэлэлцэж, хамтран ажиллах боломжийн талаар санал солилцов. Мөн энэ үеэр эх орон, иргэдийн аюулгүй байдлын төлөө цаг наргүй зүтгэж буй шилдэг найман хаагчийг шагнаж урамшуулсан юм.

Уулзалтын эхэнд нийслэлийн Санхүү, эдийн засаг, хөгжлийн бүтээн байгуулалтыг эрчимжүүлэх төсөл, хөтөлбөрийн зохицуулагч Л.Хосбаяр “Өдгөө Хан-Уул дүүрэгт 336 мянга гаруй хүн оршин сууж байна. Суурьшлын бүс тэлж байгаагаас үүдэн тус дүүргийн хүн ам сар бүр 3 мянга орчим хүнээр нэмэгдэж байгаа талаар судалгаа гарсан. Гэмт хэрэг, зөрчлийг бууруулж байж амар тайван Улаанбаатар хотыг цогцлооно. Иймд алба хаагчдын ажиллах орчин нөхцөлийг сайжруулж, нийгмийн баталгааг нэмэгдүүлэх шаардлагатай” гэв. 

Хан-Уул дүүргийн цагдаагийн газар нь хоёр хэлтэстэй бөгөөд 390 алба хаагч, ажилтантай. Үүнээс 19.5 хувь буюу 76 нь эмэгтэй алба хаагч байна. Тус эмэгтэй алба хаагчдын зүгээс дараах саналыг дэвшүүллээ. Тодруулбал, 

• Ажиллах орчин, нөхцөлийг сайжруулах;
• Аюулгүй байдал, бүтээмжийг нэмэгдүүлэх зорилгоор техникийн болон аж ахуйн тоног төхөөрөмжийг шинэчлэх;
• Ур чадвар дээшлүүлэх сургалтын боломжийг өргөжүүлэх;
• Гудамж, зам талбайн камерын системийг сайжруулах;
• Алба хаагчдын сэтгэл зүйн тулгамдсан асуудлуудыг шийдвэрлэх хүрээнд сэтгэл зүйчийн өрөөний асуудлыг шийдвэрлэх;
• Алба хаагчид гэр бүлдээ бага цаг зарцуулдаг тул хүүхдүүд болон өөрсдийнх нь боловсрол, эрүүл мэндэд анхаарах боломжийг дээшлүүлэх; 
• Нийгмийн баталгааг нэмэгдүүлэх хүрээнд орон сууцны хөтөлбөрт хамруулах зэрэг саналыг дэвшүүлсэн юм. 

Уулзалтын төгсгөлд нийслэлийн Санхүү, эдийн засаг, хөгжлийн бүтээн байгуулалтыг эрчимжүүлэх төсөл, хөтөлбөрийн зохицуулагч Л.Хосбаяр алба хаагчдын асуултад хариулж, “Санал, хүсэлтийг хүлээн авч, бүх талаар дэмжиж ажиллана. Мөн нийслэлийн чиг үүргийн бус асуудлыг холбогдох байгууллагын удирдлагуудад уламжлах болно” хэмээлээ.