Хаврын тариалалтад 46 мянган тонн улаанбуудайн үр нөөцөлжээ

      ‌2026 оны хаврын тариалалтад 50 мянган тонн улаанбуудайн үр хэрэгцээтэй байгаагаас тариалан эрхлэгч аж ахуй нэгжүүд 28000, “Хөдөө аж ахуйн корпорац” компани 11200, нийт 39200 тонн нөөц бүрдүүлжээ. ‌

Дээрх үрийг тариалан эрхлэгчдэд 30 хувийн урьдчилгаа төлбөртэй зээлээр олгож байгаа аж. Тэгвэл дутагдаж буй 12 мянган тонн үрийн улаанбуудайг импортлох шийдвэр гаргаж, 22 аж ахуйн нэгжид зөвшөөрлийг нь олгосон байна. Үүнээс өнөөдрийн байдлаар 7000 тонн үрийн буудай импортоор орж ирсэн бөгөөд үр дүнд нь 46 мянган тонн улаанбуудайн үр нөөцөлж чаджээ.

Энэ онд улсын хэмжээнд 372.7 мянган га-д үр тариа, 16.0 мянган га-д төмс, 18.3 мянган га-д хүнсний ногоо, 121.9 мянган га-д малын тэжээл, 104.1 мянган га-д тосны ургамал тариалахаар төлөвлөсөн. Улмаар 474.8 мянган тонн үр тариа, 180.6 мянган тонн төмс, 273.9 мянган тонн хүнсний ногоо, 287.0 мянган тонн малын тэжээл, 69.1 мянган тонн тосны ургамал хураан авах зорилт дэвшүүлсэн аж.

Үүнээс гадна хаврын тариалалтыг хэвийн явуулах зорилгоор шатахууныг 3400 төгрөгөөр нийлүүлэх ажлыг зохион байгуулж, 20 шатахуун импортлогч аж ахуйн нэгжээс нийлүүлсэн 6984 мянган литр дизель түлшийг үр тарианы 581, төмс, хүнсний ногооны 664 тариаланч иргэн, аж ахуйн нэгжид олгожээ.