Ц.Элбэгдорж: Л.Оюун-Эрдэнэ УИХ-д сууж байна гэдэг хүн амины давтан хэрэгтэн Ц.Амгаланбаатар Төрийн ордонд алхаж явна гэсэн үг

     Ерөнхийлөгч асан Ц.Элбэгдорж өнөөдөр (2026.04.24) клаб хауст “Ерөнхийлөгч хаанчилдаг уу” сэдвээр иргэдийн асуултад хариуллаа. Тэрбээр “Л.Оюун-Эрдэнэ намайг 12 жил ярьж байгаа. Гэхдээ тэр өөрөө эхлээд УИХ-аас явах хэрэгтэй. УИХ-ын гишүүн мэдэгдэл хийгээд шалгуулах, огцрох боломж үргэлж нээлттэй. Парламентын засаглалыг хамгаалах нэрийдлээр хэргээ угааж байгаа юм. Түүнийг би “Баастсан нүүрээ угаах гэж ядаж яваа” л гэж харж байна. Өмнө нь наадахь чинь “Шүүх болохгүй байна” гэдэг байсан. Гэмт хэрэг үйлдэж, хулгай хийж байгаагаа мэдэж байгаа хүний үг. Ерөнхий сайдын суудлаас буугаад ардчилал ямар хэрэгтэйг ойлгосон юм шиг байгаа юм. Монголын шинэ үеийнхэн Л.Оюун-Эрдэнийг авлигач, хулгайч гэж таниад албан тушаалаас нь нохой мэт хөөж буулгасан. Тэгэхээр одоо Л.Оюун-Эрдэнэ УИХ-ын гишүүний ажлаа сайн дураараа өгсөн нь дээр. Монголын парламентын өргөөнд хутга ханцуйлж явдаг этгээд тэнд суух ёс суртахууны эрх байхгүй. УИХ-ын чуулганы танхимд тийм түүхтэй хүн “юм” улиглах тусам иргэдийн төрд итгэх итгэл алдарна. Монголын төрийг олон улс харж байгаа. Орлогоо нотолж чадаагүй тэр этгээд улс орныг бүхэлд нь муухай харагдуулж байна. Л.Оюун-Эрдэнэ эрх мэдэлд шунаж, ардчиллыг өөрийн гараар бусинуулсан. Ардчиллын баян бүрдийг юу болгов. “Авлига, хулгайд нэвт идэгдсэн, албан тушаалтан дураараа дарангуйлдаг орон” гэсэн ангилалд орууллаа. Авлигын индекс 70 руу бууж байснаа хэд болж доройтов. Хэвлэлийн эрх чөлөө, хүний эрхийн үзүүлэлтээр Монгол Улс түүний засагласан таван жилд 60 байраар ухарсан. Үнэнийг хэлж, бичсэн хэвлэлийнхэн, тэмцэх гэсэн иргэдийг тагнуул, цагдаа, мөрдөн, шоронгийн хаалганаас салгахгүй тамласан. Л.Оюун-Эрдэнэ УИХ-д байна гэдэг 16 телевизээр мөнгөөр зодож яриулдаг, хүн амины давтан хэрэгтэн Ц.Амгаланбаатар гэдэг нөхөр л Төрийн ордонд алхаж явна гэсэн үг. Би тэгж харж байгаа. Л.Оюун-Эрдэнийг та нар Ц.Амгаланбаатар ярьж байна, явж байна гэж харах хэрэгтэй. “Ноль” Эрдэнэ УИХ-ыг гэмт хэрэгтний хоргодох байр болгочихоод байна. Тэр Монголын төрийг хулгай, худлаар бузарлаад зогсоогүй. Ахтайгаа нийлж ард түмний тунгалаг оюун санааг маш гүн хордуулсан. Иргэдийн тархийг угаах, хов живийг үржүүлэх, хагалан бутаргах гэмт үйлдэл нь одоо ч үргэлжилж байна. Оюун санаа нь өвчилсөн зон олон иймэрхүү муухай юманд донтсоор байгаад үндэсний дархлаа нь алдагддаг. Ийм зүйл хийсэн этгээд” гэлээ.

Ж.Энх