Auto China 2026: Нэг авто машины үнээр Хятадад 5-ыг худалдан авах боломжтой

     БЭЭЖИН, 2026 оны дөрөвдүгээр сарын 30 /Kazinform/. Хятадын автомашины зах зээлд асар ширүүн өрсөлдөөн явагдаж байгаагаас шалтгаалан үнэ улам унасаар байна. Тодруулбал, АНУ-д дунд зэргийн шинэ автомашин авах үнээр Хятадын BYD, Geely загваруудын 5 ширхэг шинэ цахилгаан автомашин худалдан авах боломжтой байгаа тухай Японы Киодо агентлаг мэдээлснийг Kazinform уламжиллаа.

Энэ долоо хоногт Бээжин хотноо явагдаж буй автомашины үзэсгэлэн нь автомашины хамгийн том хоёр зах зээл болох АНУ ба Хятадад үнийн зөрүү ямар байгааг тодорхой харуулж байна.

Хятадын дотоодод ширүүн өрсөлдөөн өрнөж байгаагаас шалтгаалан шинэ автомашины үнэ бусад зах зээлд байх боломжгүй доод түвшинд хүртэл буурчээ. Тухайлбал, Америкийн Kelley Blue Book гэдэг автомашины зах зээлийн судалгааны компанийн мэдээлэлд дурдсанаар, гуравдугаар сард АНУ-д шинэ автомашины дундаж үнэ 51 456 ам.доллар байв. Харин Хятадад 25 мянган доллароос доош үнэтэй цахилгаан болон гибрид автомашины 200 гаруй загварыг танилцуулжээ.

Dcar платформын мэдээлэлд үндэслэн Ройтерс агентлагийн хийсэн дүн шинжилгээгээр, АНУ-д зарагдаж буй дунд зэргийн нэг автомашины үнээр Хятадад хамгийн их борлуулалттай байгаа загваруудаас 5 ширхэг цахилгаан автомашин худалдан авах боломжтой байна. Эдгээр загвар нь Америкийн автосалонуудад одоогоор байхгүй бөгөөд ойрын үед ч тавигдах төлөвгүй байгаа юм.

Хятадад хамгийн их борлуулалттай байгаа эдгээр загвараас 10060 долларын үнэ бүхий Geely EX2 загварын авсаархан цахилгаан автомашиныг дурдаж болно. Мөн Wuling Hongguang Mini EV гэдэг загвар 6560 доллароор зарагдаж байх жишээтэй. Түүнчлэн 10-12 мянган долларын үнэтэй BYD компанийн Seagull, Yuan UP, Qin Plus DM загварууд бий. Сүүлийн нэг жилийн хугацаанд хэдэн зуун мянган хямд үнэтэй цахилгаан автомашин борлуулаад буй BYD бол Хятадын зах зээл дэх хамгийн том тоглогч юм. Шинжээчдийн таамаглаж байгаагаар, АНУ ба Хятадын зах зээл дэх үнийн зөрүү цаашид улам нэмэгдэнэ.

Сануулан дурдахад, Бээжин хотноо дэлхийд хамгийн том автомашины үзэсгэлэн гэгддэг Auto China шоу ням гарагт нээгдсэн билээ. Тавдугаар сарын 3 хүртэл үргэлжлэх үзэсгэлэнгийн үеэр 21 улс ба бүс нутгийн үйлдвэрлэгчдийн 1451 автомашиныг дэлгэн үзүүлж байна.