Г.Занданшатар талийгаач Ш.Алтантуяатай холбоотой хэргийн талаар Малайзийн Ерөнхий сайд Анвар Ибрагимтай уулзсан гэв үү

     Ерөнхий сайд асан Г.Занданшатар Малайз улсад 2006 онд Ш.Алтантуяагийн амь насыг онц хэрцгийгээр бүрэлгэсэн хэргийн талаар тус улсын Ерөнхий сайд Анвар Ибрагимтай энэ долоо хоногийн эхээр уулзсан тухай зарим сайт мэдээлжээ. Тэрбээр Ерөнхий сайд байхдаа талийгаач бүсгүйн аав С.Шаарийбуу гуайг 2026 оны гуравдугаар сарын 06-нд хүлээн авч уулзсан юм. С.Шаарийбуу гуай энэ талаар “Монголын төрдөө анх удаа хандаж үзлээ. Сайхан хүлээж авдаг юм байна. Би өргөдлөө бичээд орсон. Асуудлыг шуурхай шийдэж өглөө. Малайзийн Засгийн газар өнгөрсөн 20 жилд миний эсрэг өргөдөл гаргаж, надтай давж заалдсан. Тэндэхийн хууль, шүүхийн байгууллага, мөн төр нь оролцож байсан тул надад дааж давшгүй байлаа. Нэг эмэгтэй өмгөөлөгч, Б.Баяр өмгөөлөгч бид гурав л 20 жил зүтгэсэн. Энэ удаад би аргагүйн эрхэнд Холбооны дээд шүүхэд нь давж заалдахаар хүсэлтээ өгөөд ирсэн. Миний ганц боломж энэ байлаа. Малайзийн Холбооны шүүхэд хандахад Монгол Улсын Засгийн газар иргэнтэйгээ хамт оролцох эрх нь нээгдэж байгаа юм. Үүнээс өмнө тухайн улсын дотоод асуудал тул хуулиараа өөр улс хөндлөнгөөс оролцож болохгүй байсан. Холбооны шүүхэд нь “Би давж заалдмаар байна. Надад зөвшөөрөл өгөөч” гэдэг хүсэлт гаргасан. Тэд зөвшөөрвөл би давж заалдана. Зөвшөөрүүлэхийн тулд би Монголын Засгийн газарт хандаж байна. “Тэгье, болно” гэдэг шийдвэр гаргалаа. Үр дүнд хүрэх байх гэж бодож байна” гэж байв. Г.Занданшатар С.Шаарийбуу гуайтай уулзах үеэрээ хүсэлтийг нь хүлээн авч ажлын хэсэг байгуулах тухай шийдвэр гаргасан. Гэхдээ энэ нь тэдний анхны уулзалт биш. Г.Занданшатар УИХ-ын дарга байхдаа 2020 оны гуравдугаар сарын 03-нд С.Шаарийбуу гуайг хүлээн авч уулзаж байсан. Тэрбээр энэхүү уулзалтаас өмнө буюу 2020 оны хоёрдугаар сард Австралийн Канберра хотод болсон Ази, Номхон далайн орнуудын парламентчдын 28 дугаар чуулганд оролцох үеэрээ Малайзийн парламентын дэд дарга Дато Мохд Рашид Хаснонтой уулзаж, Ш.Алтантуяагийн амийг хөнөөсөн хэргийг үнэн зөв, шударга шуурхай шийдвэрлэх талаар тус улсын парламенттай хамтран ажиллах санал тавьж байв. Харин энэ удаад Ерөнхий сайд асан Г.Занданшатар Малайзийн Ерөнхий сайд Анвар Ибрагимтай уулзсан нь бүр ч их сонирхол татаж байна. Учир нь Анвар Ибрагим тус улсын сөрөг хүчний лидер асан. Тэрбээр 2018 онд republika.co.id цахим сонинд ярилцлага өгөхдөө “Ш.Алтантуяагийн амийг хөнөөсөн хэрэгт буруутгагдаж, Малайзийн шүүхээс ял сонссон Сирул Азгар Умар гэгчийг Австралийн хууль хяналтынхан баривчилж хорьсон нь санаатай үйлдэл. Австралийн тал түүнийг суллаж, Малайзийн талд шилжүүлж өгөх хэрэгтэй. Тэр этгээд манай улсын шүүхийн өмнө зогсож, мэдүүлгээ өгөх ёстой” гэж байр сууриа илэрхийлж байжээ. Тэрбээр С.Шаарийбуу гуайтай ч уулзаж байсан аж. С.Шаарийбуу гуай Анвар Ибрагимийн талаар “Малайзийн шударга үнэний төлөө тэмцдэг, Нажиб байсхийгээд л шоронд хийчихдэг, гараад л ирдэг, дахиад л шоронд хийчихдэг, дахиад л суллагддаг нэг тийм тэмцэгч байдаг юм. Тэр хүн шоронгоос суллагдсаныхаа дараа намайг гэртээ урьж уулзсан. Түүнийг Анвар Ибрагим гэдэг. Тэрбээр надад “Би шоронгоос ч тэмцэнэ. Энэ шударга үнэнийг хоёулаа олж, хэзээ нэгэн цагт ард нь гарна шүү” гэж хэлж байсан. Хамт тэмцэж явсан хүн маань Малайзийн Ерөнхий сайд болсон. Анвар Ибрагимийн эхнэр нь Шадар сайд байхдаа Монголд болсон хуралд оролцож, Г.Занданшатар даргатай уулзаж байсан” хэмээн сэтгүүлчдэд ярьж байлаа. Ерөнхий сайд асан Г.Занданшатарын хувьд, олон нийтийн сүлжээнд нээлттэй байдаг. Тэрбээр өнгөрсөн өдрүүдэд Сингапурт Азийн шатрын лидерүүдийн дээд хэмжээний уулзалтад оролцсон аж. Энэ үеэрээ Малайзийн Ерөнхий сайд Анвар Ибрагимтай уулзсан бололтой.

С.Тулга