Г.Занданшатарын урилгаар дэлхийн шатрын лидер тэрбумтнууд Монголд ирнэ

   Ерөнхий сайд асан Г.Занданшатар Монголын Шатрын холбооны Ерөнхийлөгч. Тэрбээр Сингапурт саяхан болсон Азийн шатрын лидерүүдийн чуулганд “Засаглал ба шатар” сэдвээр илтгэл тавьсныхаа дараа дэлхийн хошой аварга багийн ахлагч, Германы тэрбумтан Вадим Розенштэйнтэй халз тоглож, ширүүхэн өрсөлдсөний эцэст хожжээ. Монгол шатарчин Г.Занданшатарт хожигдсоныхоо дараа Вадим Розенштэйн түүнийг Дэлхийн багийн аварга шалгаруулах тэмцээнд өөрийнхөө багт тоглохыг албан ёсоор урьсан аж. Экс Ерөнхий сайд ч энэхүү урилгыг хүлээн авчээ. Г.Занданшатар өнгөрсөн сард Дэлхийн шатрын холбооны ерөнхийлөгч Дворкович Аркадий Владимировичийн урилгаар Казахстан улсын Алматы хотноо Сургуулиудын дэлхийн аварга шалгаруулах тэмцээнд Монголын баг тамирчдаа дэмжиж оролцсон. Энэ үеэр Forbes сэтгүүл “Казахстаны хамгийн баян хүн” хэмээн онцолсон, NASDAQ-Т бүртгэлтэй FREEDOM HOLDING группийн СЕО, Казахстаны Шатрын холбооны ерөнхийлөгч Тимур Турлов Г.Занданшатарыг халз тоглолтод урьж, хамт шатар нүүсэн юм. Тэгвэл Дэлхийн шатрын холбооны ерөнхийлөгч Дворкович Аркадий Владимирович, Казахстаны тэрбумтан Тимур Турлов, Германы тэрбумтан Вадим Розенштэйн тэргүүтэй дэлхийн шатрын лидерүүд Г.Занданшатарын урилгаар Монголд ирнэ. Тодруулбал, Улаанбаатар хотноо 2026 оны тавдугаар сарын 29-нөөс зургадугаар сарын 07-ны өдрүүдэд болох Азийн шатрын дэлхийн аварга шалгаруулах тэмцээний үеэр дэлхийн шатрын лидерүүд манай улсад хүрэлцэн ирэхээр болжээ.     

С.Тулга