Ц.Ганзориг: Үндсэн хуулийн Цэц Ерөнхийлөгчийн бүрэн эрхийн хугацааг сунгах тухай дүгнэлт гаргаагүй

     Үндсэн хуулийн Цэц өнөөдөр (2026.05.08) хуралдаж, “Монгол Улсын Ерөнхийлөгчийн бүрэн эрхийн хугацаа дөрвөн жил байна” гэж Ерөнхийлөгчийн тухай хуульд заасныг “Үндсэн хууль зөрчсөн” гэж дүгнэсэн. Цахим ертөнцөд энэхүү дүгнэлтийн талаар “У.Хүрэлсүх зургаан жил хаанчлах шийдвэрээ Цэцээр гаргууллаа” гэх шүүмжлэл ч хөвөрч эхлэв. Ерөнхийлөгчийн Тамгын газрын хэвлэлийн төлөөлөгч Ц.Ганзориг энэ талаар “Ташаа болон мушгиад байгаа мэдээлэлд ойлголтын зөрүүг гаргая. 2019 онд Үндсэн хуульд орсон нэмэлт, өөрчлөлтөөр “Монгол Улсын Ерөнхийлөгчийг зургаан жилийн хугацаагаар зөвхөн нэг удаа сонгоно” гэж тодорхой заасан. Харин Монгол Улсын Ерөнхийлөгчийн тухай хуульд өнөөг хүртэл “дөрвөн жилийн хугацаа” гэсэн хуучин заалт хэвээр явж ирсэн байна. Тиймээс Үндсэн хуулийн Цэц энэ зөрчлийг арилгаж, Ерөнхийлөгчийн тухай хуулийг Үндсэн хуультай нийцүүлж “зургаан жил” гэж өөрчлөх ёстой гэж үзжээ. Тодорхой хэлбэл, Ерөнхийлөгчийн бүрэн эрхийн хугацааг сунгах тухай биш, харин Үндсэн хуультай зөрчилдөж байсан хуулийн заалтыг засах тухай Үндсэн хуулийн Цэц дүгнэлт гаргажээ. УИХ-аас 2020 онд гаргасан тогтоолоор Ерөнхийлөгчийн тухай хуулийн шинэчилсэн найруулгыг Засгийн газар санаачлах үүргийг өгсөн” гэж мэдэгдлээ. Өөрөөр хэлбэл, тэрбээр “Үндсэн хуулийн Цэц Ерөнхийлөгчийн бүрэн эрхийн хугацааг сунгах тухай дүгнэлт гаргаагүй” гэв.

Ж.Болд