Төрийн банк Нийслэлийн орон сууцны корпорацтай хамтран Баянхошуу дэд төвийн “Ногоон орон сууц” төсөлтэй танилцах воркшоп арга хэмжээг зохион байгууллаа

     Төрийн банк нь нийгмийн хариуцлага, тогтвортой хөгжлийн бодлогынхоо хүрээнд ногоон эдийн засгийг дэмжих, байгаль орчинд ээлтэй төсөл хөтөлбөрүүдийг санхүүжүүлэх зорилгоор “Нийслэлийн орон сууцны корпорац” (НОСК) ХК-тай хамтын ажиллагааны санамж бичиг байгууллаа.

Энэхүү хамтын ажиллагааны эхлэл болгон талууд “Ногоон орон сууц” төсөлтэй танилцах воркшоп арга хэмжээг зохион байгуулав. Уг арга хэмжээнд Төрийн банк, НОСК, Монголын ногоон барилгын хүрээлэн болон гүйцэтгэгч барилгын компанийн төлөөллүүд оролцож, төслийн үйл явц, олон улсын EDGE стандартыг нэвтрүүлсэн туршлага болон “BestGer” үнэлгээний аргачлалын талаар дэлгэрэнгүй мэдээлэл солилцсон юм.

Орлогод нийцсэн, байгальд ээлтэй шийдэл

Төслийн гол онцлог нь нийслэлийн гэр хорооллын дахин төлөвлөлтийн бүсэд орлогод нийцсэн, эрчим хүчний хэмнэлттэй ногоон орон сууцыг цогцлоож байгаа явдал юм. Уг төслийг хэрэгжүүлснээр дараах бодит үр дүнгүүд гарна. Үүнд:

Нөөцийн хэмнэлт: Эрчим хүчний хэрэглээг 30 орчим хувь, усны хэрэглээг 20-иос доошгүй хувиар бууруулна.

Сэргээгдэх эрчим хүч: Нарны системээр тоноглож, агаар болон хөрсний бохирдлыг бууруулахад бодит хувь нэмэр оруулна.

Дэвшилтэт технологи: Саарал ус цэвэршүүлэх технологи, нарны илчийг ашиглан нийтийн эзэмшлийн талбайг халаах технологи тус тус нэвтрүүлсэн.

Ногоон зээлээр иргэдээ дэмжинэ

Төрийн банкны зүгээс байгаль орчинд ээлтэй, эрчим хүчний хэмнэлттэй орон сууц худалдан авч буй иргэдэд “Ногоон зээл”-ийн бүтээгдэхүүнүүдээ санал болгож байна. Энэ нь иргэдийн санхүүгийн ачааллыг бууруулахын зэрэгцээ эрүүл, тохилог орчинд амьдрах боломжийг бүрдүүлж буй хэрэг юм.

Талуудын энэхүү түншлэл нь хотын утаа, хөрсний бохирдлыг бууруулах үндэсний хэмжээний зорилтод нийцэж байгаагаараа ач холбогдолтой юм.