Вадим Розенштэйн: Монголын шатрын хөгжил, оюуны боловсролын төлөөх Г.Занданшатарын олон жилийн хичээл зүтгэл, чин сэтгэл бол “WR Chess”-ийн эрхэмлэдэг үнэт зүйлсийн тусгал юм

       Ерөнхий сайд асан Г.Занданшатар саяхан Сингапурт болсон Азийн шатрын лидерүүдийн чуулган дээр "Засаглал ба нөлөөлөл" сэдвээр илтгэл тавьж, Германы тэрбумтан, дэлхийн хошой багийн аварга Вадим Розенштэйнтэй шатар нүүж хожсон. Тэрбээр дэлхийн шатрын хаан, 13 настайдаа домогт шатарчин Гарри Каспаровыг хожиж байсан Магнус Карлсентай нэг багт тоглох болсон нь шатарчдын ярианы сэдэв болж байна.

Өдгөө 36 настай тэрбумтан Вадим Розенштэйн Г.Занданшатарыг багтаа урьж тоглуулах болсон тухайгаа "Эрхэм шатрын анд нөхөд өө, та бүхэндээ Хонконг хотноо зохион байгуулагдах 2026 оны Түргэн болон Түргэвчилсэн (Rapid & Blitz) шатрын багийн дэлхийн аварга шалгаруулах тэмцээнд оролцох “WR Chess” багийн шинэ бүрэлдэхүүнийг танилцуулж байгаадаа туйлын баяртай байна. "WR Chess” үүсгэн байгуулагдсан цагаас бидний алсын хараа дэлхийн шилдэг шатарчдыг нэгтгээд зогсохгүй шатрын соёл, боловсрол, эв нэгдлийн хүч чадалд чин сэтгэлээсээ итгэдэг хувь хүмүүсийг нэгтгэхэд чиглэсээр ирсэн билээ. Энэ жил манай багийг дэлхийн №1 Магнус Карлсен тэргүүлж, бүрэлдэхүүнд шатрын орчин үеийн тод төлөөллүүд болох Фабиано Каруана, Уэсли Со, Максим Вашье-Лаграв, Ян-Кшиштоф Дуда, Хоу Ифань болон Александра Костенюк нарын агуу мастерууд багтаж байна. Бид “WR Chess”-ийн шинэ гишүүнээр Монгол Улсын Их Хурлын 7 дахь дарга, 34 дэх Ерөнхий сайд, Арена олон улсын мастер, Эрхэмсэг ноён Г.Занданшатарыг багтаа угтан авч байгаадаа онцгойлон баяртай байна. Түүний Монголын шатрын хөгжил болон оюуны боловсролыг дэмжихэд чиглэж ирсэн олон жилийн хичээл зүтгэл, чин сэтгэл “WR Chess”-ийн эрхэмлэдэг үнэт зүйлсийн тусгал билээ. Түүний оролцоо манай баг төдийгүй дэлхийн шатрын хамтын нийгэмлэгт шинэ итгэл төдийгүй олон улсын анхаарлыг авчирна гэдэгт би итгэлтэй байна. "WR Chess” баг чансаагаар №1-д гайхалтай бүрэлдэхүүнтэйгээр ирэх 6 дугаар сард Хонконгт болох 2026 оны дэлхийн багийн аварга шалгаруулах тэмцээнд оролцох болно. Та бүхэн минь WR Chess-ийн гэр бүлийн шинэ гишүүн Эрхэмсэг ноён Г.Занданшатарыг халуун дотноор хүлээн авна уу" гэжээ.

Ж.Энх