Байнгын хороодын хамтарсан хуралдаанаар төсвийн хүрээний мэдэгдлийн хоёр дахь хэлэлцүүлгийг хийлээ

      Улсын Их Хурлын Төсвийн болон Эдийн засгийн байнгын хороо өнөөдөр (2026.05.19) хамтран хуралдаж, хоёр асуудал хэлэлцэн шийдвэрлэлээ. Хуралдаан 11 цаг 02 минутад хүрэлцэн ирэх ёстой 56 гишүүний 29 нь хүрэлцэн ирснээр, 51.8 хувийн ирцтэй эхлэв. Төсвийн байнгын хорооны дарга Н.Наранбаатар хуралдааныг удирдав.

Монгол Улсын нэгдсэн төсвийн 2027 оны төсвийн хүрээний мэдэгдэл, 2028-2029 оны төсвийн төсөөллийн тухай хуулийн төслийн хоёр дахь хэлэлцүүлгийг хамтарсан хуралдаан явууллаа. Улсын Их Хурлын бусад Байнгын хороод Монгол Улсын Их Хурлын чуулганы хуралдааны дэгийн тухай хуулийн 64 дүгээр зүйлийн 64.1.2-т заасны дагуу эрхлэх асуудлынхаа хүрээнд төсвийн хүрээний мэдэгдлийн төслийг хэлэлцэж, холбогдох санал, дүгнэлтүүдээ Төсвийн болон Эдийн засгийн байнгын хороодын хамтарсан хуралдаанд ирүүлсэн байна.

Улсын Их Хурлын гишүүн Ч.Анар Аюулгүй байдал, гадаад бодлогын байнгын хорооны, Улсын Их Хурлын гишүүн П.Батчимэг Байгаль орчин, хүнс, хөдөө аж ахуйн байнгын хорооны, Улсын Их Хурлын гишүүн Ч.Лодойсамбуу Төрийн байгуулалтын байнгын хорооны санал, дүгнэлтийг тус бүр танилцууллаа. Төсвийн хүрээний мэдэгдлийн хоёр дахь хэлэлцүүлгийг эрхлэх асуудлынхаа хүрээнд хийсэн талаарх Хууль зүйн байнгын хорооны санал, дүгнэлтийг Улсын Их Хурлын гишүүн Дав.Цогтбаатар, Өргөдлийн байнгын хорооны санал, дүгнэлтийг Улсын Их Хурлын гишүүн Ж.Золжаргал, Хүний хөгжил, нийгмийн бодлогын байнгын хорооны санал, дүгнэлтийг Улсын Их Хурлын гишүүн А.Ундраа нар хамтарсан хуралдаанд тус бүрдээ танилцууллаа.

Ийнхүү зургаан Байнгын хорооны санал, дүгнэлтийг танилцуулсны дараа Улсын Их Хурлын гишүүн Б.Жавхлан, Ж.Ганбаатар, Л.Гантөмөр нар асуулт асууж, Тэргүүн шадар сайд бөгөөд Эдийн засаг, хөгжлийн сайд Ж.Энхбаяраас хариулт авсан. Дараа Монгол Улсын нэгдсэн төсвийн 2027 оны төсвийн хүрээний мэдэгдэл, 2028-2029 оны төсвийн төсөөллийн тухай хуулийн төсөлтэй холбогдуулан Улсын Их Хурлын гишүүн Г.Лувсанжамцаас ирүүлсэн саналыг хэлэлцэж, холбогдох санал хураалт явуулан шийдвэрлэсэн юм. Ингээд Монгол Улсын нэгдсэн төсвийн 2027 оны төсвийн хүрээний мэдэгдэл, 2028-2029 оны төсвийн төсөөллийн тухай хуулийн төслийн хоёр дахь хэлэлцүүлгийг хийсэн талаарх санал, дүгнэлтээ нэгдсэн хуралдаанд танилцуулахаар тогтов.

Өнөөдрийн хуралдаанаар хэлэлцсэн хоёр дахь асуудал нь Монгол Улсын нэгдсэн төсвийн 2027 оны төсвийн хүрээний мэдэгдэл, 2028-2029 оны төсвийн төсөөллийн тухай хуулийн төсөлтэй хамт өргөн мэдүүлсэн хуулийн төслүүдийн анхны хэлэлцүүлэг байв. Нэмэгдсэн өртгийн албан татварын тухай хуульд өөрчлөлт оруулах тухай хуулийн төслийг Монгол Улсын Их Хурлын чуулганы хуралдааны дэгийн тухай хуулийн 39 дүгээр зүйлийн 39.10-т заасны дагуу зүйл бүрээр нь хэлэлцлээ. Төслийн нэгдүгээр зүйлтэй холбогдуулан Улсын Их Хурлын гишүүн Г.Уянгахишиг, Х.Булгантуяа, Б.Жавхлан, Х.Ганхуяг, Г.Ганбаатар, Г.Очирбат, Б.Түвшин нар асуулт асууж, Тэргүүн шадар сайд бөгөөд Эдийн засаг, хөгжлийн сайд болон ажлын хэсгийн гишүүдээс хариулт авсан. Үргэлжлүүлэн төслийн нэгдүгээр зүйлтэй холбогдуулан гишүүдээс гаргасан зарчмын зөрүүтэй саналын томьёоллуудаар санал хураалт явуулан шийдвэрлэв. Дараа нь төслийн хоёрдугаар зүйлтэй холбогдуулан хэлэлцүүлэг явуулахад Улсын Их Хурлын гишүүн Ж.Батжаргал, С.Даваасүрэн нар хууль санаачлагч болон бусад оролцогчоос асуулт асууж, хариулт авав. Тухайн зүйлтэй холбогдуулан гишүүдээс зарчмын зөрүүтэй саналын томьёолол гаргаагүй юм.

Нэмэгдсэн өртгийн албан татварын тухай хуульд өөрчлөлт оруулах тухай хуулийн төслийн анхны хэлэлцүүлгийг ийн хийсний дараа Төсвийн тогтвортой байдлын тухай хуульд өөрчлөлт оруулах тухай хуулийн төслийн анхны хэлэлцүүлгийг хийлээ. Төслийн нэгдүгээр зүйлтэй холбогдуулан Улсын Их Хурлын гишүүн Г.Уянгахишиг, Ж.Батжаргал, С.Даваасүрэн, Х.Булгантуяа, Б.Жавхлан нар асуулт асууж, Ж.Энхбаяр сайд болон ажлын хэсгийн гишүүдээс хариулт авсан. Дараа нь гишүүдээс гаргасан зарчмын зөрүүтэй саналын томьёоллуудаар санал хураалт явуулан шийдвэрлэв.

Ингээд Монгол Улсын нэгдсэн төсвийн 2027 оны төсвийн хүрээний мэдэгдэл, 2028-2029 оны төсвийн төсөөллийн тухай хуулийн төсөлтэй хамт өргөн мэдүүлсэн хуулийн төслүүдийн анхны хэлэлцүүлгийг хийсэн талаарх Байнгын хороодын хамтарсан хуралдааны санал, дүгнэлтийг нэгдсэн хуралдаанд танилцуулахаар болов. Үүгээр Төсвийн болон Эдийн засгийн байнгын хорооны хамтарсан хуралдаан өндөрлөлөө хэмээн Улсын Их Хурлын Хэвлэл мэдээлэл, олон нийттэй харилцах газраас мэдээлэв.