"Сибирийн хүч-2" төслийн талаар тохиролцоонд хүрсэнгүй

     БЭЭЖИН, 2026 оны тавдугаар сарын 21 /DW/. ОХУ-ын Ерөнхийлөгч Владимир Путин, БНХАУ-ын удирдагч Ши Жиньпин нарын Бээжин хотноо хийсэн хэлэлцээний үеэр талууд олон тэрбум ам.долларын өртөг бүхий "Сибирийн хүч-2" хий дамжуулах шинэ хоолой тавих төслийн талаар тохиролцоонд хүрч чадаагүй тухай Кремлийн ордноос лхагва гарагт Оросын төрийн мэдээллийн хэрэгслүүдэд мэдээлжээ.

В.Путиний хэвлэлийн нарийн бичгийн дарга Дмитрий Песков мэдэгдэхдээ, талууд хоолойг тавих маршрут болон барилгын ажлыг хэрэгжүүлэх үе шат зэрэг "үндсэн нөхцөлүүдийн талаар ерөнхийдөө нэгдсэн ойлголтод" хүрсэн ч тодорхой хугацаа хараахан тогтоогүй, мөн цаашид нарийвчлан хэлэлцэх хэд хэдэн асуудал үлдсэн гэжээ. Хэлэлцээний дараа Кремлийн цахим хуудсанд нийтлэгдсэн гэрээ хэлэлцээрүүдийн урт жагсаалтад уг төслийн талаар огт дурдаагүй байна.

Төслийн стратегийн ач холбогдол

ОХУ "Сибирийн хүч-2" төслийг хэдэн жилийн турш урагшлуулж байгаа бөгөөд 2022 онд Украин руу довтолсны дараа Хятадаас эдийн засгийн хувьд улам бүр хамааралтай болсон үеэс хойш эрчимтэй урагшлуулж байгаа юм. Жилд 50 тэрбум шоо метр хий дамжуулах хүчин чадалтай, 2600 километр урт үргэлжлэх энэхүү хийн хоолой нь Баруун Сибирийн Ямалын хойгоос Монгол Улсын нутаг дэвсгэрээр дамжин Хятад руу хүрэх ёстой. Оросын хувьд өмнө нь Европ руу экспортлодог байсан (дайны улмаас экспорт нь огцом буурсан) орд газруудаас нийлүүлэхээр төлөвлөж байгаа нь чухал ач холбогдолтой юм. 

Харин Хятадын тал уг төсөлд нэлээд хянуур, хүлээзнэсэн байр сууринаас хандаж байна. Ойрх Дорнод дахь дайны улмаас үүссэн эрчим хүчний тогтворгүй байдал нь Бээжингийн байр суурийг өөрчилнө гэж Москва найдаж байсан боловч тийм зүйл болсонгүй. Хятадын тал эргэлзэж байгаа тул хэлэлцээний явц удаашралтай хэвээр байна.

40 орчим баримт бичигт гарын үсэг зурав

Бээжинд болсон хэлэлцээний нээлттэй хэсгийн дараа Орос, Хятадын талууд иж бүрэн түншлэл, стратегийн хамтын ажиллагааг цаашид бэхжүүлэх, сайн хөршийн харилцаа, найрамдал, хамтын ажиллагааг гүнзгийрүүлэх тухай зэрэг 40 орчим баримт бичигт гарын үсэг зурлаа.

ОХУ-ын Ерөнхийлөгчийн туслах Юрий Ушаковын хэлснээр, иж бүрэн түншлэл, стратегийн хамтын ажиллагааг цаашид бэхжүүлэх, сайн хөршийн харилцаа, найрамдал, хамтын ажиллагааг гүнзгийрүүлэх тухай мэдэгдэл нь Орос, Хятадын олон талт хоёр талын харилцааг бүхэлд нь хөгжүүлэх үндсэн чиглэл, олон улсын тулгамдсан асуудлуудын талаарх нэгдсэн байр суурь, дэлхийн үйл хэрэг дэх хамтын ажиллагааны үндсэн хэлбэрүүдийг тодорхойлсон маш өргөн хүрээтэй баримт бичиг ажээ. В.Ушаков өмнө нь сэтгүүлчидтэй ярилцахдаа, энэхүү баримт бичгийг "үзэл баримтлалын шинж чанартай" хэмээн тодорхойлж байв.

Бээжингийн хэлэлцээ ерөнхийдөө "эерэг" уур амьсгалд болж өнгөрлөө гэж В.Путиний туслах дүгнэв. Тэрбээр хэлэхдээ, Орос, Хятад улсууд эрчим хүчний салбарт "маш чухал" зүйлийн талаар тохиролцсон гэдгийг тэмдэглэсэн боловч чухам юуны талаар тохиролцсоныг тодорхой дурдсангүй. 

Хамтарсан цэргийн сургуулилалт

Бээжинд болсон уулзалтын үеэр В.Путин, Ши Жиньпин нар цэргийн хамтарсан сургуулилалтыг өргөжүүлэхээр мөн тохиролцжээ. Орос, Хятад улсууд "янз бүрийн сорилт, аюул заналын эсрэг хамтран ажиллаж, дэлхийн болон бүс нутгийн аюулгүй байдал, тогтвортой байдлыг хангах болно" гэж "Интерфакс" агентлаг мэдээлсэн байна. 

"Талууд хоёр орны зэвсэгт хүчний хоорондын уламжлалт найрамдалт харилцааг үргэлжлүүлэн бэхжүүлж, цэргийн салбарт харилцан итгэлцлийг гүнзгийрүүлэн, хамтын ажиллагааны механизмыг боловсронгуй болгож, хамтарсан сургуулилалт, агаар болон тэнгисийн эргүүл хамгаалалтын практикийг өргөжүүлэн, хоёр талын болон олон талт форматын хүрээнд хамтын ажиллагаагаа бэхжүүлнэ" гэж Бээжинд болсон Орос-Хятадын дээд хэмжээний уулзалтын үр дүнд гаргасан хамтарсан мэдэгдэлд дурджээ.