Ус, дулааны төлбөрөө төлдөггүй өрхийн мэдээллийг зургаадугаар сарын 1-нээс Зээлийн мэдээллийн санд бүртгэнэ

     Ус, дулааны төлбөрөө хоёр сараас дээш хугацаанд төлөөгүй айл өрхийн мэдээллийг зээлийн мэдээллийн санд бүртгэхээр болжээ. Орон сууц нийтийн аж ахуйн удирдах газарт одоогоор 167 мянга гаруй өрхийн мэдээлэл бүртгэлтэй байна. Эдгээрийн 15-20 хувь нь ус дулааны төлбөрөө тогтмол төлдөггүй аж. Ингэж буй шалтгаан нь цахилгаан эрчим хүчийг айл айлаар нь тус тусад нь тасалж болдог. Гэтэл ус, дулааныг яг тухайн айлаар нь тасалж болдоггүй. Тасалсан тохиолдолд байр, орц, тухайн давхраар нь  хаах эрсдэлтэй. Энэ шалтгаанаар иргэд төлбөр төлөх сонирхол нь муу байдаг талтай гэж ОСНААУГ-ын ерөнхий инженер Ж.Пүрэвжамц тайлбарлаж байна. Тэгвэл ус, дулааны шинэчилсэн гэрээний дагуу төлбөрөө цаг тухайд төлөөгүй өрхийн мэдээллийг Монголбанкны зээлийн мэдээллийн санд бүртгэхээр болжээ. Энэ тохиолдолд иргэн та төлбөрөө хугацаанд нь төлдөг бол зээл авах нөхцөл сайжрах бөгөөд мэдээллийн санд цэвэр түүхтэй байна. Төлбөрөө хугацаандаа төлөөгүй тохиолдолд Монголбанкны жагсаалтад орж, цаашид бусад төрлийн үйлчилгээг авахад хүндрэлтэй болох юм. Энэхүү зохицуулалтыг зургаадугаар ирэх 1-нээс хэрэгжүүлэхээр  болжээ.