Ерөнхий сайд асан Г.Занданшатарыг төрийн элч төлөөлөгчийн тэргүүнээр томилсон нь анхны тохиолдол уу?

      Монгол Улсын Ерөнхийлөгч У.Хүрэлсүх зарлиг гаргаж, Ерөнхий сайд асан Г.Занданшатарыг Их Богд хайрханы тахилга ёслолд төрийн элч төлөөлөгчийн тэргүүнээр томилсон нь анхаарал татсан үйл явдал боллоо.

Төрийн тахилгат хайрханы тэнгэрийг тайх ёслол 5 жилд нэг удаа болдог уламжлалтай. Энэ уламжлалын дагуу Баянхонгор аймгийн Богд, Жинст, Баянговь, Баянлиг сумын нутагт орших Их Богд хайрханы тахилга ёслол боллоо. Ерөнхийлөгч У.Хүрэлсүх Г.Занданшатарыг яагаад энэхүү тахилга ёслолд төрийн элч төлөөлөгчийн тэргүүнээр томилох зарлиг гаргав. Төрийн элч томилох нь шинэ зүйл биш ч Ерөнхийлөгч У.Хүрэлсүх Ерөнхий сайд асан Г.Занданшатарыг томилсон нь анхаарал татаж байна. Төрийн тахилгат уул, овооны тэнгэрийг тайх ёслол үйлдэх тухай холбогдох журамд Ерөнхийлөгч энэхүү ёслолд оролцох боломжгүй бол төрийн өндөр албан тушаал хашиж байсан хүн, аль эсвэл сайдаас доошгүй албан тушаалтныг төрийн элч төлөөлөгчийн тэргүүнээр томилдог аж. Төрийн элч төлөөлөгчийн тэргүүн нь Монгол Улсын Ерөнхийлөгчийн илгээлт, төрийн бэлгэдлийг өргөн барих үүрэг гүйцэтгэдэг юм байна. Г.Занданшатарыг төрийн элч төлөөлөгчийн тэргүүнээр томилсон нь анхны тохиолдол биш. Х.Баттулга Ерөнхийлөгч байхдаа 2017 онд тахилгад оролцох төрийн элчийг томилж байсан бол Ц.Нямдоржийг 2021 онд Ханхөхий уулын тахилгад төрийн элч төлөөлөгчийн тэргүүнээр томилж байжээ.

 Ж.Энх