УИХ дахь Монгол-Австрийн парламентын бүлгийн дарга, гишүүд БНАУ-ын Үндэсний зөвлөлийн гишүүн Маркус Хофертой уулзав

      Монгол Улсын Их Хурлын гишүүн, Улсын Их Хурал дахь Монгол-Австрийн парламентын бүлгийн дарга Н.Батсүмбэрэл, Монгол Улсын Их Хурлын гишүүн С.Лүндэг нар Бүгд Найрамдах Австри Улсын Үндэсний Зөвлөлийн гишүүн, тус Зөвлөл дэх Австри-Монголын бүлгийн дарга Маркус Хофертой 2026 оны 6 дугаар сарын 08-ны өдөр Австри Улсын Үндэсний Зөвлөлийн ордонд уулзалт хийж, хоёр орны хууль тогтоох байгууллагуудын цаашдын хамтын ажиллагааны талаар санал солилцов.

Албан ёсны уулзалтын үеэр талууд Бүгд Найрамдах Австри Улсын Холбооны Ерөнхийлөгч Александр Ван дер Беллен 2025 оны 5 дугаар сард Монгол Улсад төрийн айлчлал хийсэн нь хоёр улсын харилцааг эрчимжүүлэн хөгжүүлж, харилцан сонирхсон бүхий л салбар дахь хамтын ажиллагааг гүнзгийрүүлэх чухал айлчлал болсныг онцлон тэмдэглэв. Мөн хоёр орны ардчиллын үнэт зүйлсэд суурилсан харилцааг бататгах хоёр талт хамтын ажиллагааг харилцан ашигтай бүхий л чиглэлээр өргөжүүлэхэд бүх талын дэмжлэг үзүүлж ажиллахаа нотлов.

Цаашид талууд хоёр улсын харилцааг өргөжүүлэхэд улс орноо харилцан сурталчлах, иргэд хоорондын хэлхээ холбоог нэмэгдүүлэх, эдийн засаг, хөрөнгө оруулалт, боловсрол, соёл, аялал жуулчлалын салбарт хамтын ажиллагааг өргөжүүлэх боломжийн талаар санал солилцож, хууль тогтоох дээд байгууллага хооронд хамтын ажиллагааг өргөжүүлэх сонирхолтой байгаагаа илэрхийлэв. Энэ хүрээнд Монгол Улсын Их Хурал дахь Монгол-Австрийн бүлгийн дарга Н.Батсүмбэрэл Бүгд Найрамдах Австри Улсын Үндэсний Зөвлөлийн гишүүн, тус Зөвлөл дэх Австри-Монголын бүлгийн дарга Маркус Хоферийг тааламжтай цагтаа Монгол Улсад айлчлахыг урив хэмээн Улсын Их Хурлын Хэвлэл мэдээлэл, олон нийттэй харилцах газраас мэдээллээ.