Санкт-Петербургийн Уул уурхайн их сургуультай хамтран инженер бэлтгэнэ

       Монгол Улсын Аж үйлдвэр, эрдэс баялгийн сайд Г.Дамдиннямаар ахлуулсан төлөөлөгчид ОХУ-ын Санкт-Петербургийн Уул уурхайн их сургуульд ажиллах үеэр “Эрдэнэс ҮТП” ХХК болон тус их сургууль хооронд хамтын ажиллагааны санамж бичиг байгууллаа.

Төлөөлөгчдийн бүрэлдэхүүнд “Эрдэнэс Монгол” нэгдлийн ОХУ дахь төлөөлөгчийн газар, “Эрдэнэс ҮТП” ХХК, “Эрдэнэс Газ” ХХК-ийн удирдлагууд оролцож, уул уурхай, боловсруулах үйлдвэрлэлийн салбарын хүний нөөцийн хөгжил, инженер бэлтгэх чиглэлээр хамтын ажиллагааны боломжуудыг хэлэлцэв.

Монгол Улсын Засгийн газраас хэрэгжүүлж буй аж үйлдвэржилтийн бодлого, ашигт малтмалын гүн боловсруулалтыг хөгжүүлэх зорилтын хүрээнд “Эрдэнэс ҮТП” ХХК нь улсын хэмжээнд хэрэгжүүлэхээр төлөвлөсөн Үйлдвэрлэл, технологийн паркуудын төслүүдэд шаардлагатай инженер, техникийн хүний нөөцийг бэлтгэх чиглэлээр дотоод, гадаадын их, дээд сургуулиудтай хамтын ажиллагаагаа өргөжүүлэн ажиллаж байна.

Албан томилолтын үеэр төлөөлөгчид Санкт-Петербургийн Уул уурхайн их сургуулийн сургалт, судалгааны орчин, лабораториуд болон Уул уурхайн музейтэй танилцаж, тус сургуулийн ректор Владимир Литвиненкотой уулзалт хийлээ.

Уулзалтын үеэр Аж үйлдвэр, эрдэс баялгийн сайд Г.Дамдинням Монгол Улсад уул уурхай, боловсруулах үйлдвэрлэлийн салбарыг өндөр технологид суурилан хөгжүүлэх зорилт тавигдаж байгаа бөгөөд үүнийг хэрэгжүүлэхэд олон улсын түвшний инженер, техникийн боловсон хүчин чухал үүрэгтэй болохыг онцлон тэмдэглэв.

Санамж бичгийн хүрээнд талууд уул уурхайн ашиглалт, ашигт малтмалын баяжуулалт, металлурги, түүхий эд боловсруулах химийн технологи, үйлдвэрлэлийн процессын автоматжуулалт, үйлдвэрийн экологи зэрэг чиглэлээр инженер бэлтгэх, мэргэжил дээшлүүлэх сургалт хэрэгжүүлэх чиглэлээр хамтран ажиллахаар тохиролцов.

Мөн жил бүр Монгол Улсаас 50-аас доошгүй оюутныг тус их сургуульд суралцуулах боломжийг бүрдүүлэх, бакалавр, магистр болон мэргэжил дээшлүүлэх сургалтын хөтөлбөрүүдэд хамруулах, үйлдвэрлэлийн дадлага, судалгааны төсөл, шинжлэх ухаан-технологийн хамтын ажиллагааг хөгжүүлэхээр болов.

Түүнчлэн хамтын ажиллагааны хүрээнд:

Судалгаа, хөгжүүлэлтийн хамтарсан төсөл хэрэгжүүлэх;

Технологийн аудит болон инженерингийн зөвлөх үйлчилгээ үзүүлэх;

Оюутан, багш, мэргэжилтэн солилцооны хөтөлбөр хэрэгжүүлэх;

Үйлдвэрлэлийн болон дипломын өмнөх дадлага зохион байгуулах;

Эрдэм шинжилгээний бага хурал, семинар, зуны сургуулиудыг хамтран зохион байгуулах;

чиглэлээр хамтран ажиллана.

“Эрдэнэс ҮТП” ХХК нь Монгол Улсын зургаан байршилд хэрэгжүүлэхээр төлөвлөсөн Үйлдвэрлэл, технологийн паркуудын төслүүдийг удирдан хэрэгжүүлж байгаа бөгөөд зэсийн баяжмал боловсруулах үйлдвэр, гангийн үйлдвэр, кокс-химийн үйлдвэрлэл, нүүрс-химийн үйлдвэр, жонш боловсруулах үйлдвэр зэрэг боловсруулах үйлдвэрлэлийн томоохон төслүүдэд шаардлагатай хүний нөөцийг үе шаттайгаар бэлтгэх зорилтыг хэрэгжүүлж байна.

Талууд ойрын 2-3 жилийн хамтын ажиллагааны нарийвчилсан замын зураглалыг боловсруулан баталж, хамтын ажиллагааг бодит үр дүнд хүргэхээр тохиролцлоо.

Айлчлалын үеэр сайд Г.Дамдинням тус сургуульд суралцаж буй Монгол Улсын оюутнуудтай уулзаж, сургалтын орчин, суралцах нөхцөл байдал болон цаашдын хамтын ажиллагааны талаар санал солилцлоо. Өнөөдрийн байдлаар Санкт-Петербургийн Уул уурхайн их сургуульд 17 монгол оюутан суралцаж байна.

Энэхүү хамтын ажиллагаа нь Монгол Улсын аж үйлдвэржилтийн бодлогыг дэмжих, боловсруулах үйлдвэрлэлийн салбарт шаардлагатай өндөр ур чадвартай инженер, техникийн хүний нөөцийг бэлтгэх, олон улсын түвшний мэдлэг, туршлагыг нутагшуулахад чухал ач холбогдолтой юм.