Дэлхийн шатрын холбоо ОХУ-ын гишүүнчлэлийг түдгэлзүүлэв

Оросын цэргүүдийн 2022 оноос хойш эзэлсэн Украины нутаг дэвсгэрт шатрын үйл ажиллагааг хууль бусаар өөрийн мэдэлд авсан гэх үндэслэлээр Дэлхийн шатрын удирдах байгууллага болох Олон улсын шатрын холбоо (FIDE) Оросыг түр хугацаагаар түдгэлзүүллээ.

Гуравдугаар сард олон улсын спортын маргаан шийдвэрлэх Спортын арбитрын шүүх Украины гаргасан гомдлыг хүлээн зөвшөөрч, Оросын шатрын холбоо Украины эзлэгдсэн бүс нутгуудад шатрын байгууллагуудыг хууль бусаар өөрийн хяналтад оруулсан гэж үзсэн юм.

Шүүхээс Орост 90 хоногийн хугацаа өгч, Украины таван бүс нутаг дахь шатрын байгууллагуудын хяналтаас гарах, тэнд тэмцээн зохион байгуулахаа зогсоохыг шаарджээ.

Гэвч лхагва гарагт Олон улсын шатрын холбооноос Орос уг шаардлагыг биелүүлээгүй тул Оросын гишүүнчлэлийг "нэн даруй хүчин төгөлдөр" түр түдгэлзүүлэх шийдвэр гаргаснаа зарлав.

Оросын насанд хүрсэн шатарчид Олон улсын шатрын холбооны тэмцээнд үргэлжлүүлэн оролцох боломжтой боловч Оросын далбааны дор бус, Олон улсын шатрын холбооны далбаан дор тоглох ёстой болно. Харин өсвөр насны тоглогчид л Оросын далбааг ашиглах эрхтэй хэвээр үлджээ.

Багийн тэмцээнд Оросын тамирчид төвийг сахисан далбаан дор оролцох боломжтой ч энэ нь Олон улсын шатрын холбооны цаашдын шийдвэрээс шалтгаална гэж мэдэгдсэн байна.

Оросын төрийн мэдлийн TASS агентлагийн мэдээлснээр Оросын шатрын холбооны ерөнхийлөгч Андрей Пилатов хуульчид нь Олон улсын шатрын холбооны шийдвэрийг судалж байгаа, давж заалдаж магадгүй гэжээ.

Харин Украины шатрын холбоо энэ шийдвэрийг "түүхэн ялалт" хэмээн үнэлсэн байна.

Шатрын их гүрэнд өгсөн бэлгэдлийн цохилт

Энэхүү шийдвэр нь практик үр дагавраас гадна шатрын гүн уламжлалтай Оросын хувьд бэлгэдлийн томоохон цохилт болж байна. Оросын хотуудын цэцэрлэгт хүрээлэн, явган хүний зам дээр жилийн аль ч улиралд шатрын өрөг рүү бөхийсөн хүмүүсийг харж болдог.

1927-2007 оны хооронд дэлхийн аваргуудын дийлэнх нь Зөвлөлт Холбоот Улс болон түүний бүрэлдэхүүнд байсан бүгд найрамдах улсуудын их мастерууд байв. Энэ ноёрхлыг зөвхөн 1930-аад онд Нидерландын Макс Юве, 1970-аад онд Америкийн Бобби Фишер түр хугацаанд тасалдуулж байлаа.

Гэвч Анатолий Карпов, Гарри Каспаров нарын үе аль хэдийн өнгөрч, XXI зууны шатрын ертөнцөд Магнус Карлсен болон Энэтхэг, Хятадын шинэ одууд давамгайлах болсон.

Одоогоор дэлхийн шилдэг 20 шатарчнаас ердөө нэг нь л Оросын төлөөлөл байна. Дөрөвдүгээр сард болсон аваргын төлөө өрсөлдөгчийг тодруулах нэр дэвшигчдийн тэмцээнд Оросын Андрей Эсипенко найман оролцогчоос хамгийн сүүлд орсон юм. Тус тэмцээний ялагч нь Энэтхэгийн Гукеш Доммаражутай дэлхийн аваргын төлөө тоглох эрх авна.

Маргааны гол шалтгаан

Маргаан нь Оросын 2014 онд нэгтгэсэн гэж зарласан Крим болон Украины Донецк, Луканск, Запорожье, Херсон мужууд дахь шатрын үйл ажиллагааг хэн удирдах асуудлаас үүдэлтэй байв.

Оросын эрхийг түр түдгэлзүүлсэн нь сүүлийн үед олон улсын спортын холбоод Оросын тамирчдыг аажмаар буцаан оролцуулж эхэлж буй хандлагатай зөрчилдөж байна. Өмнө нь допингийн томоохон дуулиан, дараа нь Украины дайны улмаас Оросын тамирчдад олон төрлийн хориг тавигдаж, Олимпын наадмуудад зөвхөн төвийг сахисан статустай оролцох эрхтэй байжээ.

Сүүлийн саруудад усанд сэлэлт, туялзуур сэлэм, жүдо зэрэг зарим спортын холбоод эдгээр хязгаарлалтыг сулруулах шийдвэр гаргаж эхэлсэн.