Хүүхэд хамгааллын үйл ажиллагаанд төр-иргэний нийгмийн байгууллага хоорондын уялдаа холбоо, хамтын ажиллагааг идэвхжүүлнэ

     Монгол Улсын Их Хурлын гишүүн, Хүний эрхийн дэд хорооны дарга Х.Баасанжаргал өнөөдөр (2026.06.15) Канадын “Дюфрен ба Готьер” сангийн үүсгэн байгуулагч, ерөнхийлөгч Хелен Дюфрен, тус сангийн Монгол дахь Суурин төлөөлөгч Л.Дулмаа тэргүүтэй иргэний нийгмийн байгууллагуудын төлөөллийг хүлээн авч уулзлаа.

Манай улс анх удаа гэр бүл, хүүхдийн дагнасан шүүхийн тогтолцоог бий болгож, эрх зүйн зохицуулалтыг боловсронгуй болгох Ажлын хэсгийн ахлагчаар ажиллаж байгаа талаар Хүний эрхийн дэд хорооны дарга танилцуулсан юм. Тэрбээр хууль тогтоомжийн хэрэгжилтэд хяналт тавих, хүүхэд хамгааллын чиглэлээр хийсэн судалгааны үр дүнг хэрэгжүүлэхэд талуудын оролцоог идэвхжүүлэхийг чухалчилна гэсэн байр суурь илэрхийллээ. 

“Дюфрен ба Готьер” сан нь 15 дахь жилдээ үйл ажиллагаа явуулж, Монголын 20 орчим төрийн бус байгууллагад дэмжлэг үзүүлж, төсөл хөтөлбөрүүдийг эрсдэлт бүлгийн хүүхдүүдийг хамгаалах чиглэлд хэрэгжүүлж ирсэн. Монгол Улсын иргэний нийгмийн байгууллагуудын хамтран “Монгол Улс дахь эрсдэлт нөхцөлд буй хүүхдийг хамгаалах тогтолцоонд шинээр үүсч буй асуудал, төр-төрийн бус байгууллагын хамтын ажиллагааны чиг хандлага"-ыг судалсан, үр дүнг хэрэгжүүлэх асуудлыг хөндөв. Шүүхийг хүүхэд, насанд хүрэгчдийнх гэж ангилсан явдалд талархаж буйгаа хатагтай Хелен Дюфрен илэрхийлэхийн сацуу иргэний нийгмийн байгууллагын үйл ажиллагааг сайн дурын ажил мэт өнгөц ойлгох хандлага байдаг, цаашид төрийн бус байгууллагуудыг тогтвортой, урт хугацаанд, тууштай дэмжих нь ардчилал, шударга ёс тогтох боломж юм гэв. 

Уулзалтад оролцсон иргэний нийгмийн байгууллагуудын төлөөллүүд, холбогдох яамд төрийн зарим чиг үүргийг төрийн бус байгууллагуудаар гүйцэтгүүлэхдээ ажил, үйлчилгээний жагсаалтаа тодорхой, ил тод болговол илүү үр дүнтэй зэрэг асуудлыг хөндлөө гэж Улсын Их Хурлын Хэвлэл мэдээлэл, олон нийттэй харилцах газраас мэдээллээ.