Г.Занданшатар: Би дэлхийн хошой аварга WR CHESS багт тоглож байгаа ч Монголынхоо шатарчидтай нэг танхимд, нэг тэмцээнд мөр зэрэгцэн сууж байгаадаа маш их бахархаж байна

       Ерөнхий сайд асан Г.Занданшатар Германы тэрбумтан, дэлхийн хошой аварга WR CHESS багийн эзэн Вадим Розенштэйний урилгаар домогт Магнус Карлсен тэргүүтэй шатрын гранд мастеруудаас бүрдсэн тус багт нэгдэж, Хонконгод болж буй "FIDE World Team Rapid & Blitz Championship 2026" тэмцээнд оролцож байна. Тэрбээр "Олон улсад нэр хүндтэй энэхүү тэмцээнд Монгол Улсаас гурван баг өрсөлдөж байна.

Мэргэжлийн ангилалд The MongolZ болон "Алдар" спорт хорооны дэргэдэх "Mongolia-Aldar” шатрын багууд дэлхийн шилдэг шатарчидтай хүч сорьж байна. Харин 2000 хүртэл чансаатай сонирхогчдын ангилалд “Босоо Ноён” шатрын клуб мөн өрсөлдөж байгаа нь Монголын шатрын спорт зөвхөн мэргэжлийн түвшинд бус, олон нийт, сонирхогчдын дунд өргөжин хөгжиж буйн сайхан илэрхийлэл юм.

Өнгөрсөн жилийн Дэлхийн аварга шалгаруулах багийн тэмцээнд Монгол Улсын Үндэсний шигшээ баг U2400 ангилалд түрүүлж, дэлхийн аваргын цомыг эх орондоо авчирсан бахдам амжилт үзүүлсэн. Энэ жил Монголын гурван баг дэлхийн шилдгүүдтэй хүч сорин, эх орныхоо нэрийг өндөрт өргөхөөр өрсөлдөж байна.

Миний хувьд, WR Chess багийн бүрэлдэхүүнд оролцож байгаа ч энэ тэмцээний хамгийн том бахархал бол Монголынхоо шатарчидтай нэг танхимд, нэг тэмцээнд мөр зэрэгцэн сууж буй явдал юм. Монголын багуудынхаа тоглолтыг хамгийн түрүүнд, хамгийн ихээр дэмжинэ. Монголын шатрын спортын өнөөдөр, ирээдүй болсон эдгээр тамирчдаараа бахархаж байна.

The MongolZ баг

Дасгалжуулагч – ФИДЕ дасгалжуулагч, эФМ Б.Ану

1-р ширээ – ИМ Д.Батсүрэн

2-р ширээ – ОУМ Х.Итгэлт

3-р ширээ – ОУМ Ү.Агьбилэг

4-р ширээ – ОУМ Х.Өлзийхишиг

5-р ширээ – эОУМ Б.Баярмаа

6-р ширээ – А.Эрхэмбаяр

"Алдар" спорт хорооны баг

1-р ширээ – ИМ С.Билгүүн

2-р ширээ – ОУМ Г.Амартүвшин

3-р ширээ – ОУМ С.Чингүүн

4-р ширээ – ОУМ / эИМ Б.Мөнгөнтуул

5-р ширээ – эОУМ Б.Мөнгөнзул

6-р ширээ – Б.Цогтбаяр

"Босоо Ноён" шатрын клубын баг (2000 хүртэл чансаатай сонирхогчдын ангилал)

 1-р ширээ – СМ А.Золжаргал

2-р ширээ – ДМ Б.Очирсүх

3-р ширээ – эФМ Б.Хүслэнзаяа

4-р ширээ – СМ Н.Батмөнх

5-р ширээ – СМ Ж.Мичид

6-р ширээ – ДМ М.Батням

Нийт тамирчид, дасгалжуулагчид, баг хамт олон, ар гэрийнхэн, дэмжигчдэдээ спортын өндөр амжилт хүсье. Тэмцээн БНХАУ-ын Хонконг хотноо 2026 оны зургадугаар сарын 17-21-ний өдрүүдэд үргэлжлэх бөгөөд Монголын багуудынхаа тоглолтыг хамтдаа дэмжицгээе" гэж уриаллаа.

Ж.Энх