Монголын шатарчид алт, хос мөнгөн медальтай ирж байна

      Олон улсын шатрын холбооноос (FIDE) 2026 оны рапид болон блиц төрлийн дэлхийн аварга шалгаруулах багийн тэмцээнийг БНХАУ-ын Засаг захиргааны онцгой бүс Хонконгт зохион байгууллаа.

Энэхүү тэмцээнд Монголоос гурван баг өрсөлдөж нэг алт, хос мөнгөн медальтай эх орныхоо зүг нисэж байна. Түргэвчилсэн буюу рапид төрөлд ФИДЕ мастер Б.Анугаар удирдуулсан “MongolZ” 2400 хүртэлх чансааны ангилалд дэлхийн аварга болсон тухай бид мэдээлсэн. Харин их мастер Б.Мөнгөнтуул, С.Билгүүн тэргүүтэй Батлан хамгаалах яамны харьяа Зэвсэгт хүчний “Алдар” спорт хорооны шатрын баг мөнгөн медаль хүртэв. Түүнчлэн зургаадугаар ширээ буюу 2000-аас доош чансаатай шатарчдаас Б.Цогтбаяр онцгой амжилт үзүүлж, 12 өргөөс 11 хожил, 1 тэнцээ байгуулан 11.5 оноотойгоор 7-р байрт шалгарлаа. Мөн нэг багийн зургаан тамирчны авсан нийлбэр оноогоор “Алдар”-ынхан ДАШТ-д өрсөлдсөн 48 багаас хамгийн өндөр оноо цуглуулав. бахархам үзүүлэлт боллоо.

Харин сонирхогчдын ангилалд “Босоо ноён” аман хүзүүдэж, дэлхийн дэд аварга болов. ФИДЕ мастер Б.Хүслэнзаяа, дэд мастер Б.Очирсүх, А.Золжаргал, М.Батням, Н.Батмөнх, Ж.Мичид нарын бүрэлдэхүүнтэй Хонконгийг зорьсон тэд Вьетнамын “Golden Star” багтай үндсэн тавилд 3:3-аар тэнцсэн. Улмаар багийн ахлагч нарын  нэмэлт тоглолтод манай шатарчин хожигдсоноор мөнгөн медалийн тавцанд зогсов.

Үүнээс гадна Монголын шатрын холбооны ерөнхийлөгч Г.Занданшатарын багтсан “WR Chess” баг рапид төрөлд 17, блицээр тавдугаар байрт шалгарсан байна.