Ч.Номинг Соёлын сайд байхад 1.5 тэрбум төгрөгөөр гэрээ байгуулсан гэх “Nas Daily”-г үүсгэн байгуулагч Нусейр Ясин үлдэгдэл төлбөр болох 500 сая төгрөгөө ГХЯ-аас нэхэмжилж байна гэв үү

       Ерөнхий сайд, МАН-ын дарга Н.Учрал намынхаа Бага хурал дээр “Авлигатай хийх тэмцлээ Ардын намаас эхлүүлнэ” гэж мэдэгдсэн ч Ч.Номинг Цахим хөгжил, инноваци, харилцаа холбооны сайдаар томилсон нь олон нийтийн төдийгүй УИХ-ын гишүүдийн эгдүүцлийг төрүүлсэн. Л.Оюун-Эрдэнийг Ерөнхий сайд байхад “Мөнгөний машин” нь гэгддэг байсан Ч.Номинг Н.Учралын танхимд сайдаар томилох эсэхийг хэлэлцэх үеэр УИХ-ын гишүүн Ж.Баярмаа “Ч.Номин бол цахим буллидэлтийн хатан хаан” гэж байв. Гэвч Ерөнхий сайд Н.Учрал Ч.Номинд Цахим хөгжил, инноваци, харилцаа холбооны сайд хэмээх хамаг чухал суудлаа бэлэглэсэн. ЦХИХХЯ бол иргэдийн цахим мэдээлэл, дата бааз, сонгуулийн хар машин гээд улстөрчдийн хувьд стратегийн гол бааз. Н.Учрал “Би Ч.Номинг дэмжинэ” гэж хэлсний цаана олигархиудын хүүхдүүдийг чухам ямар ашиг сонирхол нэгтгэсэн нь нууц хэвээр байгаа. Ерөнхий сайд Н.Учрал Ч.Номинг Цахим хөгжил, инноваци, харилцаа холбооны сайдаар яагаад томилсон юм бол...

          Ч.Номин Л.Оюун-Эрдэнийн Засгийн газарт ССАЖЗ-ын сайд байхад Монгол Улсын олон улс дахь сурталчилгаа, мэдээллийн үндэсний хороог байгуулж, сайдын багцаас: 

-“Эдэлман Сингапур” руу 1.5 сая ам.доллар

-Бостон консалтинг группт менежментийн зөвлөх үйлчилгээнд 1.360 мянган евро

-CNN-д 1.7 сая ам.доллар

-Хөлбөмбөгийн "Фүлхэм" багт 1.190 мянган фунт стерлинг

-Trip.com руу 100 мянган ам.доллар

-BBC-д 500 мянган ам.доллар шилжүүлсэн нь ил болсон. Харин Г.Занданшатарыг Ерөнхий сайд байхад Монгол Улсыг гадаадад сурталчлах чиг үүргийг ГХЯ-д шилжүүлсэн учир CNN, Бостон консалтинг, “Эдэлман Сингапур”, “Фүлхэм” хөлбөмбөгийн багийнхан Ч.Номинг ССАЖЗ-ын сайд байхад байгуулсан гэрээний төлбөр болох 18 тэрбум төгрөгийг тус яамнаас нэхэмжилж байгаа. Ч.Номингийн дараа ССАЖЗ-ын сайдаар ажиллаж байсан УИХ-ын гишүүн Ч.Ундрам “Гэрээнүүдийн тайлан нь шаардлага огт хангахгүй. Зүгээр л хэдэн танилцуулга төдий цаас ирүүлсэн” хэмээн сэтгэл дундуур ярьж байсан бол ССАЖЗ-ын сайд Ж.Алдаржавхлан ч бас ийм утгатай тайлбарыг сэтгүүлчдэд өгсөн. Харин Гадаад харилцааны сайд Б.Батцэцэг “Хэтэрхий өндөр дүнтэй гэрээнүүд байгуулжээ. Тайлан нь үнийн дүндээ нийцэхүйц гүйцэтгэлтэй биш. ГХЯ-д үүнээс бага зардлаар Монгол Улсаа олон улсад сурталчлах мэдлэг, чадвар, туршлагатай ажилтнууд бий” гэж хэлсэн нь Ч.Номингийн дургүйг хүргэж, ГХЯ руу байсхийгээд утас цохиж “18 тэрбум төгрөгийн өрийг төл” хэмээн шантаажилж, Б.Батцэцэг сайдын эсрэг өндөр төлбөртэй, өргөн хүрээтэй медиа ажиллагаа явуулахад хүргэсэн гэх яриа улс төрийн хүрээнд бий. Тэгвэл Ч.Номинг Соёлын сайд байхад Монголыг олон улсад сурталчлах гэрээ байгуулсан гэх “Nas Daily”-ийн үүсгэн байгуулагч Нусейр Ясинаас үлдэгдэл төлбөр болох 500 сая төгрөгөө нэхэмжилсэн бичиг ГХЯ-д ирсэн гэх мэдээлэл байна. Дэлхий даяар 70 сая дагагчтай “Nas Daily”-г үүсгэн байгуулагч Нусейр Ясин манай улсад 2023 оны наймдугаар сарын 13-нд хүрэлцэн ирэхэд Соёлын сайд асан Ч.Номин хүлээн авч уулзаж, хамтдаа зургаа авахуулж Монголыг биш, өөрийгөө ПР-даж овжин загнасан удаатай. Монголын тал Нусейр Ясинтай 1.5 тэрбум төгрөгийн гэрээ хийсэн гэх мэдээлэл байна. Энэ гэрээний үлдэгдэл төлбөр болох 500 сая төгрөгөө Нусейр Ясин нэхэмжилж байгаа гэх. Харин ГХЯ-ныхан “Ч.Номингийн үед гадаадын байгууллагуудтай хийсэн гэрээнүүдийн тайлан нь шаардлага хангаагүй. Тэгээд ч манай яаманд ийм чанаргүй, үр дүнгүй, гүйцэтгэл муутай ажлуудын төлбөрийг төлөх төсөв байхгүй” гэж байгаа дуулдана. Ер нь Ч.Номин Л.Оюун-Эрдэнийг Ерөнхий сайд байхад Монголыг олон улсад сурталчлах гэсэн халхавчаар сая сая ам.долларын гэрээ хийсний цаана ямар нууц хуйвалдаан байсан бэ гэдэг ч асуулт юм. Тиймээс АТГ-ынхан Ч.Номинг ССАЖЗ-ын сайд байх үед хийсэн өндөр төлбөртэй гэрээнүүдийн мөрөөр мөшгиж эхэлсэн. АТГ-ын комиссар Б.Билэгт “Ч.Номинтой холбоотой асуудлаар АТГ хэрэг бүртгэл нээж, мөрдөн шалгах ажиллагаа явуулж байгаа. Нийт 10 орчим хүнээс гэрчийн мэдүүлэг авч, 20 орчим эд зүйл, баримт бичиг, цахим видео болон бусад эд зүйлд үзлэг нэгжлэг хийсэн. АТГ-аас гадаад улс руу эрх зүйн харилцан туслалцаа үзүүлэх гэрээний дагуу хүсэлт илгээхээр прокурорын байгууллагад хандсан” гэж сэтгүүлчдэд мэдээлэл өгөх үеэрээ дурдсан. Н.Учралын Засгийн газрын хамгийн их хэл амтай, хардлага сэрдлэг дагуулсан сайд болох Ч.Номин ийнхүү АТГ-ын хар дансанд оржээ. Тиймээс “Н.Учрал авлигатай хийх тэмцлээ Ардын намаас эхлүүлнэ” гэж хэлсэндээ хүрч Ч.Номинг огцруулах уу” гэдэг асуудал гарч ирлээ. Харин Ерөнхийлөгч У.Хүрэлсүхийн санаачилсан УИХ-ын гишүүнийг эгүүлэн татах тухай заалтууд бүхий хуулийн төслийг УИХ баталбал хамгийн түрүүнд эгүүлэн татагдах гишүүнээр Ч.Номин тодроод байна. Учир нь Ерөнхийлөгч У.Хүрэлсүхийн санаачилсан дээрх хуулийн төсөл батлагдсан цагаасаа хэрэгжиж эхлэх тухай заалттай.

С.Тулга