ДАШТ-ий бүх тоглолтыг үзсэнийхээ төлөө 50 000 ам.долларын цалин авч буй хөгжөөн дэмжигчид

       Хөлбөмбөгийн ДАШТ-ийн хэсгийн шат дуусах хүртэл өдөр бүр зургаан тоглолт явагдаж байгаа тул бүх тоглолтыг үзнэ гэдэг бараг бүтэн цагийн ажилтай дүйнэ.

Fox One сувагт “Дэлхийн аваргын ахлах үзэгчид” хэмээх албан бус үүрэг гүйцэтгэж буй Кевин Акото, Остин Франклин нар ДАШТ-ий бүх 104 тоглолтыг үзснийхээ төлөө тус бүр 50 000 ам.доллар авах юм.

Тэдний ажиллах орчин нь Times Square талбайн голд тусгайлан зассан шилэн өрөө бөгөөд хажуугаар нь яваа хүмүүс чөлөөтэй харж болно.

Өрөөнд тухлаг буйдан, амрах сандал, том дэлгэцтэй хоёр зурагт, ширээний хөлбөмбөгийн тоглоом байрлуулж, төрөл бүрийн бэлэг дурсгал, амттангаар дүүргэжээ.

Флорида мужаас ирсэн тогооч Кевин “Хөлбөмбөгт дуртай 20 настай залуугийн мөрөөдлийн өрөө яг ийм байдаг байх. Хэрвээ хүссэн бүхнээ хийж болдог бол ийм л зүйлсийг энд байрлуулах байсан” гэжээ.

Флоридагийн тогооч Кевин болон Филадельфи хотоос гаралтай контент бүтээгч Остин нар энэ ажлын байранд өргөдөл өгсөн мянга мянган хүний дундаас шалгарсан юм.

Тэд зөвхөн тоглолт үзэхээс гадна хөгжөөн дэмжигчдэд зориулсан контент бүтээх үүрэгтэй. Тэмцээн дуусахад хэдэн долоо хоног үлдээд байгаа ч хоёр залуу ачаалал их байгааг хүлээн зөвшөөрчээ.

Кевин “Би бага зэрэг ядарсан, Остин ч бас ядарсан. Болж буй бүхнийг дагаж амжихад суралцаж байна” гэсэн байна.

Остин үүнийг зуны зуслантай зүйрлэн “Энэ бол жинхэнэ марафон. Би зүгээр л буйдан дээр сууж хөлбөмбөг үзэж байгаа учраас амархан ажил мэт санагдаж болно. Гэхдээ үнэндээ нэлээд ядраадаг. Тиймээс боломжтой үедээ найман цагийн нойроо авахыг хичээж байна” гэжээ.

Аз болоход тэд шилэн өрөөндөө хонодоггүй, ажлын өдөр дуусмагц гэртээ харьж амарч болдог гэнэ.

Тэд аль хэдийн түүхэн мөчүүдийн гэрч болжээ. Тухайлбал, Лионель Месси ДАШТ-ий бүх цаг үеийн гоолын дээд амжилтыг шинэчлэхийг харсан байна. Тэр үед тэд Аргентины шарсан мах идэж байжээ.

Мөн энэ ажлын нэг сонирхолтой тал нь тэмцээнд оролцож буй улс орнуудын үндэсний хоолоор дайлуулдаг явдал аж.

Тоглолтуудын хооронд тэд дэлхийн өнцөг булан бүрээс ирсэн хөгжөөн дэмжигчидтэй уулзаж ярилцах боломжтой. Ялангуяа Times Square-ийг дүүргэсэн Бразилын хөгжөөн дэмжигчид болон алдарт викинг сэлүүрдэх бүжгээ үзүүлсэн Норвегийн фэнүүд тэдэнд гүн сэтгэгдэл үлдээжээ.

Остины хамгийн дуртай зүйл нь “Дэлхийн өнцөг булан бүрээс ирсэн хүмүүстэй уулзаж, хөлбөмбөг, соёл болон АНУ-д ямар туршлага авч буй талаар ярилцах” аж.

Тэрээр “Заримдаа би Times Square-т байгаа, хүмүүс намайг харж байгаа гэдгээ мартчихдаг. Тоглолтод 10-15 минут бүрэн автагдчихаад баруун тийшээ харахад Кевин болон эргэн тойрон дахь хүмүүсийг хараад гэнэт санадаг” хэмээн ярьсан байна.

Кевин аваргын цомыг Испани хүртэнэ гэж таамаглаж байгаа ч өөрийн гарал үүсэлтэй холбоотойгоор АНУ, Гана улсын багийг дэмжиж байгаа гэнэ.

Харин Остин Норвегийн өмсгөлийг өмсдөг. Түүний хэлснээр энэ нь хувийн шалтгаантай биш, харин Норвеги болон Эрлинг Хааландын тоглолтод сэтгэл хангалуун байгаатай холбоотой аж. “Испани эсвэл Франц түрүүлнэ гэж хэлэх амархан. Гэхдээ Норвеги яг оргилд хүрэхийн даваан дээр байна. Аз нь таарвал аварга болж ч чадна” гэв.

Хүн бүр ийм ажил хүсэхгүй

Гэхдээ энэ ажлыг хүн бүр мөрөөдлийн ажил гэж үзэхгүй байна.

Норвегийн хөгжөөн дэмжигч 52 настай Эймунд Лиланд болон түүний 15 настай охин Камиль нар бүх 104 тоглолтыг хувийн орон зайгүйгээр үзэх нь “хэтийднэ” гэж үздэг.

Мөн 18 настай Мэттью Мендезийн бодлоор ДАШТ-ийг найз нөхөд, гэр бүлийнхэнтэйгээ хамт үзэх нь илүү сайхан туршлага аж.

Харин 20 настай Мигель Санчес энэ мэдээг сонсоод “Юу гэнэ ээ? Цэнгэлдэхэд өөрөө очсоноос ч дээр юм байна шүү дээ. Дэлхийн аварга үзээд мөнгө авна гэдэг үнэхээр галзуу азтай хэрэг байна” гэж гайхсан байна.