Ерөнхий сайд Н.Учрал Далянийн аж үйлдвэрийн паркийн дата төвтэй танилцав

       Монгол Улсын Ерөнхий сайд Н.Учрал тэргүүтэй төлөөлөгчид 2026 оны зургаадугаар сарын 25-ны өдөр БНХАУ-ын Далянийн аж үйлдвэрийн паркийн дата төвийн үйл ажиллагаатай танилцав.

Тус дата төвийг 2021 онд Далянийн улсын зэрэглэлийн шинэ бүс болох Жиньпү Ляонин мужийн чөлөөт худалдааны туршилтын бүсийн нутаг дэвсгэрт “Нэг хөндий- олон парк” загвараар байгуулжээ. Дата төв нь T3+ зэрэглэлийн өндөр стандартын 9000 серверийн рэк байрлуулах хүчин чадалтай ашиглалтад орсон бөгөөд хиймэл оюуны тооцоолох хүчин чадал нь 500 петафлопс (P) давжээ. “Хятадын Цахилгаан Холбоо (China Telecom)-ны боловсролын салбарын тооцоолох хүчин чадлын харилцан холболт, зохицуулалтын төвийн Ляонин зангилаа” статустай. Зүүн хойд Хятадын бүс нутгийн хамгийн том хэмжээний хиймэл оюуны тооцооллын төвд багтдаг. 

400 гаруй аж ахуйн нэгж, байгууллага төвлөрч, үүлэн тооцоолол, аж үйлдвэрийн автоматжуулалт, санхүүгийн технологи зэрэг салбарыг хамарч байна. Парк дотор Dalian Commodity Exchange, China Telecom, CEC Sci-Tech Valley зэрэг байгууллага үйл ажиллагаа явуулж байна. 2023 онд China Electronics Corporation, Huawei, Alibaba Cloud зэрэг 12 шинэ аж ахуйн нэгж суурьшжээ. Төв болон орон нутгийн хамтын ажиллагааг өргөжүүлж, DeepSeek зэрэг хиймэл оюуны томоохон загваруудыг нэвтрүүлснээр боловсрол, шинжлэх ухааны судалгаа, аж үйлдвэрийн симуляци, ухаалаг хотын шийдэл зэрэгт техникийн үйлчилгээ үзүүлж байна.

Харин Далянь хиймэл оюун ухааны тооцооллын төв нь Зүүн хойд Азийн тооцооллын хөгжлийн жишиг төв бөгөөд  Далянь хотын "тооцооллын тархи" хэмээн нэрлэдэг. Шинжлэх ухаан, технологийн яам нь “Улсын түвшний хиймэл оюуны нийтийн тооцооллын нээлттэй инновацын платформ" хэмээн зарлажээ. Энд хиймэл оюуны 150 гаруй шийдэл бий болжээ. Жишээлбэл, хөдөө аж ахуй болон далайн аж ахуйн үржүүлгийн загварчлал, эрүүл мэндийн салбар дахь зүрхний хавдар оношилгооны загвар,  "Линши Интеллект" хүний нөөцийн сонгон шалгаруулалтын шийдэл зэрэг нь орно.

Дэлхий дахинд дата төвүүд эрчим хүчний экспорт, хөрөнгө оруулалтын нэг шийдэл болсон. Тиймээс Монгол Улсын Засгийн газар Өгөгдлийн тухай анхдагч хуулийн төсөл боловсруулж, олон нийтийн хэлэлцүүлэгт шилжүүлээд байна. Тус хуулийн төслийг хэлэлцэн баталснаар олон улсын хөрөнгө оруулагчдад хууль эрх зүйн ойлгомжтой, тодорхой байдал бий болох давуу талтай юм.