Гадаад харилцааны сайд Б.Батцэцэг, Гватемал улсын Гадаад хэргийн сайд Карлос Рамиро Мартинез нар албан ёсны хэлэлцээ хийлээ

     Гадаад харилцааны сайд Б.Батцэцэг Бүгд Найрамдах Гватемал Улсын Гадаад хэргийн сайд Карлос Рамиро Мартинезтэй албан ёсны хэлэлцээ хийж, хоёр улсын харилцаа, хамтын ажиллагааны өнөөгийн байдал, цаашдын төлөв, бүс нутаг болон олон улсын харилцааны асуудлаар дэлгэрэнгүй санал солилцлоо.

 Монгол Улс "гуравдагч хөрш"-ийн бодлогын хүрээнд Латин Америкийн орнуудтай харилцаа, хамтын ажиллагаагаа өргөжүүлэн хөгжүүлэхийг зорьж ирсэн. Энэ хүрээнд Гватемал Улсыг Төв Америкийн бүс нутаг дахь чухал түнш хэмээн үнэлдгээ илэрхийлж, хоёр талын хамтын ажиллагааг шинэ агуулгаар баяжуулах өргөн боломж байгааг тэмдэглэлээ.

Сайд Карлос Рамиро Мартинез энэхүү айлчлал нь хоёр улсын найрсаг харилцаа, хамтын ажиллагааг шинэ шатанд гаргаж, харилцан ойлголцол, итгэлцлийг бэхжүүлэхэд чухал хувь нэмэр оруулна гэдэгт итгэлтэй байгаагаа илэрхийлэв. Мөн Гватемал Улс Азийн орнууд, тэр дундаа Монгол Улстай харилцаа, хамтын ажиллагаагаа идэвхжүүлэхийг зорьж буйгаа онцолж, Монгол Улсад хавсран суух Элчин сайдаа томилсон нь энэхүү хүсэл эрмэлзлийн илэрхийлэл болохыг тэмдэглэлээ. Түүнчлэн Монгол Улсаар дамжуулан Азийн орнуудтай хамтын ажиллагаагаа өргөжүүлэх сонирхолтой байгаагаа илэрхийллээ.

Хэлэлцээний үеэр хоёр улсын Гадаад харилцааны яам хоорондын Улс төрийн анхдугаар зөвлөлдөх уулзалтыг амжилттай зохион байгуулсныг өндрөөр үнэлж, худалдаа, эдийн засаг, боловсрол, соёл, хүмүүнлэг, аялал жуулчлал зэрэг салбарын хамтын ажиллагааг идэвхжүүлэн өргөжүүлэхээр санал нэгдэв.

Худалдаа, эдийн засгийн хамтын ажиллагааны хүрээнд Монголын өсөн нэмэгдэж буй кофены зах зээл, Гватемалын дэлхийд танигдсан арабика кофены үйлдвэрлэл, Монголын өндөр чанартай ноолуур, хөнгөн нэхмэлийн салбарын туршлагад тулгуурлан шинэ бүс нутаг, зах зээлд хамтран хүрэх боломжийг эрэлхийлж, энэ чиглэлээр хамтран ажиллахаар тохиролцлоо. Мөн цахим шилжилт, цахим засаглалын чиглэлээр Монгол Улсын хуримтлуулсан туршлага, сайн жишгийг хуваалцах, цахим бүтээгдэхүүнийг зах зээлд нэвтрүүлэх, гарааны бизнес, инновац, дижитал эдийн засгийн салбарын хамтын ажиллагааг хөгжүүлэх, хувийн хэвшлийн түншлэлийг дэмжих саналыг дэвшүүлэв. Үүний зэрэгцээ Азийн орнуудтай Гватемалын бүрдүүлсэн худалдааны хөнгөлөлтийн дэд бүтцийг түшиглэн хоёр талын болон гурвалсан хамтын ажиллагааг хөгжүүлэх боломжийн талаар ярилцав.

 Сайд Карлос Рамиро Мартинез худалдаа, эдийн засгийн хамтын ажиллагааг өргөжүүлэхэд хоёр улсын бизнес эрхлэгчид, аж ахуйн нэгжүүдийн хэлхээ холбоог идэвхжүүлэх, Худалдаа, аж үйлдвэрийн танхимуудын хамтын ажиллагааг бэхжүүлэхийн ач холбогдлыг онцоллоо. Мөн нүүдлийн соёл иргэншил, эртний Майя соёл иргэншлийн баялаг өвд тулгуурлан эрдэм шинжилгээ, археологи, түүх, соёлын судалгааны хамтын ажиллагаа, эрдэмтэн, судлаачдын солилцоог өргөжүүлэхээр тохиролцов. Аялал жуулчлалыг хамтын ажиллагааны ирээдүйтэй чиглэл болгон хөгжүүлэх хүрээнд Гватемалын тал Монголын "Go Mongolia" үндэсний аялал жуулчлалын брэндийн туршлагаас суралцах, энэ чиглэлээр хамтын ажиллагааг гүнзгийрүүлэх сонирхлоо илэрхийллээ.

 Айлчлалын хүрээнд "Монгол Улсын Гадаад харилцааны яам, Бүгд Найрамдах Гватемал Улсын Гадаад хэргийн яам хоорондын судалгааны чиглэлээр хамтран ажиллах тухай Харилцан ойлголцлын санамж бичиг"-т гарын үсэг зурлаа. Мөн олон улсын болон бүс нутгийн түвшинд харилцан дэвшүүлсэн санал, санаачилгыг үргэлжлүүлэн дэмжиж, олон улсын байгууллагуудын хүрээнд идэвхтэй хамтран ажиллахаа нотоллоо. Улаанбаатар хотноо зохион байгуулагдах Цөлжилттэй тэмцэх тухай НҮБ-ын суурь конвенцын Талуудын 17 дугаар бага хурал (COP17), "Дэлхийн эмэгтэй парламентчдын чуулга уулзалт"-д Гватемалын талыг өндөр түвшинд оролцохыг урьж, Зүүн Ази, Латин Америкийн хамтын ажиллагааны форум (FEALAC)-ын хүрээнд бүс нутаг хоорондын хамтын ажиллагааг цаашид ч идэвхтэй урагшлуулахаар тохиролцлоо.

Энэхүү айлчлал нь Монгол, Гватемалын найрсаг харилцааг шинэ шатанд гаргаж, харилцан ашигтай хамтын ажиллагааг бодит агуулгаар баяжуулах чухал эхлэл болно гэдэгт итгэлтэй байна гэдгээ талууд илэрхийлэв.

 Л.Номин