Ц.Элбэгдорж "МАК"-ийн Б.Нямтайширийн ач хүүгийн хуриман дээр Л.Оюун-Эрдэнэтэй халз тулгарах уу

    Ерөнхийлөгч асан Ц.Элбэгдорж өчигдөр (2026.07.05) эх орондоо ирсэн. Тэрбээр АНУ-ын Стэнфордын их сургуульд 2019 оноос хойш зочин судлаачаар ажиллаж байгаа. Монголд долоон жилийн дараа ирж буйгаа "Нислээ, буулаа, ирлээ" гэж цахим хуудсаараа дамжуулан мэдэгдсэн Ц.Элбэгдорж ямар шалтгаанаар ирэв гэдэг нь олны анхаарлыг татаж буй.

Тэрбээр энэ сарын 08-нд болох "Монголын алт" (МАК) ХХК-ийн Бодлогын зөвлөлийн дарга Б.Нямтайширийн ач хүүгийн хуриманд уригдсан аж. Энэ хуримын үеэр Ц.Элбэгдорж Монголын нөлөө бүхий улстөрчидтэй уулзаж, улс төрийн дараагийн нүүдлээ зурж магадгүй. Б.Нямтайширийн ач хүүгийн хуримын зочноор Ерөнхий сайд асан Л.Оюун-Эрдэнэ уригдсан уу, хэрэв Н.Номтойбаяр найзаа урьсан бол Ц.Элбэгдорж, Л.Оюун-Эрдэнэ нар халз тулгарах уу гэдэг сонин. Л.Оюун-Эрдэнэ Ерөнхий сайд байхдаа Ц.Элбэгдоржийг улс төр дэх хамгийн том дайснаараа тодруулж, Ц.Элбэгдорж "Би Л.Оюун-Эрдэнийн тархинд түрээсгүй оршино" гэх хорон үг чулуудсан. Тэрбээр хамгийн сүүлд клаб хауст иргэдийн асуултад хариулахдаа "Төрийн ордонд Л.Оюун-Эрдэнэ явж байна гэдэг С.Зоригийг хөнөөсөн хэргээр гурван шатны шүүхээс ял сонссон Ц.Амгаланбаатар алхаж байна гэсэн үг" гэж хатуухан хэлсэн.

 Ж.Энх