Бөхийн эхнэрүүд кинотой, дуутай боллоо

      “Бөхийн эхнэр” нэртэй нэн сонирхолтой, инээдмийн уран сайхны кино бүх IPTV-ээр гарч эхэллээ. Уг киног Мета пост фильм, “Бриллант Норс” ХХК хамтран бүтээсэн бөгөөд сумандаа 11 удаа тасралтгүй түрүүлсэн Мандах нэртэй манлай зааны дүрд Мөрөөдлийн театрын жүжигчин Г.Алтаншагай тогложээ. Харин түүний азын од болсон эхнэр Янжмаагийн дүрд жүжигчин У.Минжин, туслах дүрүүдэд жүжигчин Б.Баатархүү, Г.Эрхэмбаяр, Д.Түвшинтөр /Төөтөө/, С.Зоригт /Зоорий/ нарын чадварлаг уран бүтээлчид тоглосон байна.

Кино урлагийн салбарт бөхийн сэдвээр дагнасан цөөн уран бүтээлийн нэг болон шинээр гарч буй энэхүү киног Төв аймгийн Баянчандмань сумын түүхт 90 жилийн ойг тохиолдуулан бүтээжээ. Мөн “Ардын элч”, “Гарьд магнай” зэрэг алтан үеийн олон сайхан кино бүтсэн тус газар нутагт “Бөхийн эхнэр” киноны зураг авалт, үйл явдал өрнөж буйгаараа онцлог юм.

Найруулагч О.Ганбаяр зохиолыг нь бичиж найруулсан “Бөхийн эхнэр” кино нь инээдмийн жанрын хөнгөн кино боловч тамирчин хүнд хань ижлийн итгэл сэтгэл, түшиг тулгуур ямар чухлыг харуулсан, бөхчүүд болон бөхийн гэргий нарт урам зориг, ухаарал хайрласан, нийгэм дэх зарим хэвшмэл ойлголтыг эвдсэн шинэлэг бүтээл болжээ.

Тус кино “Бөхийн гэргий”, “Азын од” гэсэн хоёр дуутай бөгөөд бөхийн эхнэрүүд төдийгүй хэн бүхний аялах дуртай шинэ уран бүтээлүүд болоод байна.