“Хариуцсан хүн нь алга” гэдэг сарууд эхэллээ

     “Хариуцсан хүн нь алга байна аа, амралтаа авсан” гэдэг хариултын сарууд эхлээд хэд хонож байна. Төрийн албаныхан яг ийм хариултыг долоо болон наймдугаар сард хэлдэг. Уг нь бол ажил үүргийг хэн нэг нь амраад явлаа гэхэд нөгөө нь орлоод үлддэг баймаар санагддаг. Гэтэл манай төрийн албаныхан бөөн бөөнөөр зэрэг амраад явдаг нь үнэхээр сонирхолтой. Хүмүүс зуны дэлгэр цагт амрах нь зүйн хэрэг мөн. Харин төрийн зүгээс иргэддээ үзүүлдэг аливаа ажил үйлчилгээ тасралтгүй явж байх ёстой юм л даа. Сүүлийн үед хүмүүс харин ч зуны хүн хөл багатай сийрэг үед төрийн зүгээс хамааралтай элдэв ажлуудаа амжуулаад авахыг хичээдэг болно. Намар ид бужигнааны үеэр өдөржин дараалалд зогсож ганц ажил амжуулсан нэр зүүснээс хөл багатай иймэрхүү үеүдэд ажлаа амжуулаад авах нь угтаа хаа хаанаа амар юм. Хэдийгээр засгаас нь төрийн зүгээс үзүүлдэг үйлчилгээг хурдан шуурхай болгоно гэж байнга хэлдэг ч дунд доод шатандаа, яг үйлчилгээ өгдөгтөө бол үнэхээр төвөгтэй. Яг хэн нь хаана ямар үйлчилгээ үзүүлдэг нь бүрхэг, лавлагаа авах гэхээр хариулт өгөх нь хүн нь хаашаа ч юм явчихсан байдаг, зарим үйлчлгээ нь хэтэрхий урт дараалалтай байхад зарим нь хүнгүй байх жишээтэй. Уг нь ийм байдлыг аятайхан уян хатан байдлаар зохицуулалт хийгээд байх боломжтой харагддаг. Харин хаа очиж хорооны ажил бол тун дажгүй шуурхай шүү. Тэгвэл дүүргүүд, нэг цэгийн үйлчилгээнүүдийг ямрыг монголчууд бүгд мэдэж байгаа. Үйлчилгээ, мэдээлэл, тусламж өгөх цонхнууд маш олон байх боловч яг хүн суугаад ажиллаж байгаа нь хэдхэн байдаг нь бас нэг гайхалтай зүйл. Зун цагт амраад явсан гэж ойлгох бол намар өвөл ажил жигдэрсэн үед үйлчлэх хүн байдаггүй нь эрхгүй бухимдал төрүүлдэг ээ. Хүнээс хамаарахгүйгээр цахимаар болгож байгаа нь нэлээд боловч газар дээрээ нөгөө урт дараалал, хойно урдаа орсон “чи би”-гийн маргаан хэвээрээ.Зуны дэлгэр цагтаа амралгүй л яахав. Гэвч ямар нэгэн байдлаар ажлаа орлох хүн үлдээгээд, тэр хүндээ ажлаа яс тас хүлээлгээд өгчихдөг бол хаа хаанаа маргаан бухимдал үүсэхгүй байхсан даа.

Я.БАЯРБААТАР