СУИС-д хүний эрхийн хичээл оруулахыг ХЭҮК шаардаад дөрвөн жил болжээ

      Өдгөө улсаараа, улс төрөөс урлаг соёлын салбар хүртлээ ёс суртахууны гажуудал, ёс зүйн гамшигт нэрвэгдээд байна. Нэгхэн жишээ нь хэсэг уран бүтээлчдийн “буу халалт”-аар илэрсэн, олны зэвүүцлийг төрүүлээд байгаа хүүхдийг бэлгийн мөлжлөгт заналхийлсэн явдал юм. Уран бүтээлч нэрийн дор дуучид, жүжигчдээс энэ мэт ёс бус ааш авир, хэл яриа гарах нь олонтаа давтагдаж байна. Тиймээс СУИС-д хүний эрхийн хичээл оруулахыг ХЭҮК-оос шаардаж, зөвлөөд дөрвөн жил болжээ. Энэ талаар ХЭҮК-ын дарга Д.Сүнжид “Уран бүтээлчид, инфлүүнсерүүд бусдыг гутаах, доромжлох, эмзэг сэдвийг наргиа болгож маазрах нь элбэг харагддаг. Бүр тийм хандлага болсон шинжтэй. Аль болох сурагч, оюутан байх үеэс нь хүний эрхийн боловсрол олгох ёстой гэдэгт анхаарч, бүх түвшний сургалтын хөтөлбөрт ХЭҮК идэвхтэй ажилладаг. СУИС-ийн хөтөлбөрт хүний эрх сэдэв, агуулга оруулах талаар дөрвөн жилийн өмнөөс Комисс шаардаж, зөвлөж, хамтарч эхэлсэн. Уран бүтээлчид, инфлүүсерүүд сонсогч, үзэгчид нь ийм байдлыг чинь огт хүлээж авахгүйг ойлгомоор байна. Ийм байдлыг чинь олон нийт, Gen Z, Alpha, Beta үеийнхэн илүү жигшиж байгаа. Өөрчлөлтийг уран бүтээлчид, соёлын салбарынхан, инфлүүнсерүүд өөрсдөөсөө эхлүүлнэ үү” гэжээ.

Б.Баяр