Д.Амарбаясгалан С.Баяртай хамт загасчилж, Н.Учрал АН-аас О.Алтангэрэл, Ч.Лодойсамбууг, МАН-аас Ж.Энхбаяр, Л.Энх-Амгалан тэргүүтэй гишүүдтэй хийсэн Хөвсгөл дэх нууц уулзалт

     Үндсэн хуулийн нэмэлт өөрчлөлтийн дагуу бүрдсэн 126 гишүүнтэй анхны парламент бүрэн эрхийнхээ тал хугацааг үдэв. Харин одоо улстөрчдийн хувьд нээкст раунд! Монгол Улсын Ерөнхийлөгчийн 2027 оны сонгуульд нэр дэвшихийн төлөөх шатартай, кимонотой, хөлстэй, улавчтай улс төр эхэллээ. Эрх баригч хүчин дэх “Гучийн бүлэг” буюу Л.Оюун-Эрдэнэ, Д.Амарбаясгалан нарын талаас Хууль зүй, дотоод хэргийн сайд С.Амарсайхан, хотын мэр асан Д.Сумъяабазар нар каратэ үзүүлбэр, хэнэггүй, хээгүй бөх хүний зангаар хөлстэй хувцсаа мушгин суугчийн дүрд хувирах сошиал драма дэглэсэн бол УИХ-ын дарга С.Бямбацогт улавч өмсөж, улаан дээлээр гоёсон эхнэртэйгээ хамт буй гэрэл зургуудаар олны анхаарлыг татав. С.Амарсайхан, С.Бямбацогт нар “Эхнэрийн урхи” ажиллагааг энэ зуур сэм эхлүүлж, Тэргүүн хатагтайн титмийн төлөөх тулаан эхэлснийг дор бүрнээ сэм зарлалаа. МАН дахь “Гучийн бүлэг”-ээс С.Амарсайхан, Д.Сумъяабазар нар 2027 оны сонгуульд нэр дэвших амбицаа ийнхүү илэрхийлж, “38-ын бүлэг”-ээс Г.Занданшатар, С.Бямбацогт нар тулааны рингэн дээр хэдийнэ гарчихаад буй энэ үед Ерөнхий сайд Н.Учрал Хөвсгөлд МАН, АН-ынхантай нууц уулзалт хийж, УИХ-ын гишүүн Д.Амарбаясгалан Ерөнхий сайд асан С.Баяртай Хөвсгөл нуурын эрэг дээр загасчилсан тухай мэдээлэл улс төрийн хүрээнийхний анхаарлыг татаж байна.

Н.Учралын тэргүүлж буй Засгийн газар ирэх намар огцрох уу… Есдүгээр сард?! Засгийн газар огцрох тухай дам яриа үе үеийн Засгийн газрын үед гардаг нь жам ёс мэт. Гэвч байгуулагдаад тавхан сар ч болоогүй энэ Засгийн газар огцрох тухай мэдээлэл шатахууны хомсдолын талаарх иргэдийн бухимдлыг давж сонсогдох боллоо. Ерөнхий сайд Н.Учрал хэзээ мөдгүй дэлбэрч мэдэх дарьтай торхон дээр сууж, “Эрх баригчдыг Непалдъя” гэх иргэдийн уур бухимдалтай нүүр тулж яваа. Жадны үзүүр түүн рүү хэдийнэ чиглэжээ. Шатахуунд дугаарласан иргэдийн урт дараалал ерэн оны картын барааны үеийг санагдуулж, “Инфляци 12 хувьд хүрч, төсвийн алдагдал 2.1 их наяд төгрөг боллоо” гэх дохио сануулгатай хамт Монголын эдийн засагт шар гэрэл аслаа. Эдийн засагт шар гэрэл асна гэдэг Ерөнхий сайд Н.Учралын Засгийн газарт түгшүүрийн чимээ. Наадамчин олны уухайн дуу намжихтай зэрэгцэн намрын халуун өдрүүдийг угтсан улс төр эхэлсэн нь Хөвсгөл аймаг дахь нууц уулзалтууд юм.

О.Цогтгэрэл тэргүүтэй АН-ын 42 гишүүн Н.Учралыг Ерөнхий сайдаас огцруулах тухай бичигт гарын үсэг зурсан. АН-ын 42 гишүүнээр гарын үсэг зуруулж санасандаа хүрсэн Л.Оюун-Эрдэнэ тэргүүтэй “Гучийн бүлэг”-ийнхэн МАН-ын дарга, Ерөнхий сайд Н.Учралыг нуман тулгуурт хийсэн. Н.Учралын хувь заяа одоо Л.Оюун-Эрдэнэ, Д.Амарбаясгалан тэргүүтэй “Гучийн бүлэг”-ийнхний гарт бий. Тэд хүсвэл АН-ын 42 гишүүн дээр нэмж гарын үсэг зурахад Н.Учралын хувьд МАН-ын дарга, Ерөнхий сайдаар ажиллах улс төрийн цаг дуусна. УИХ итгэл хүлээлгэхгүйгээр огцруулсан анхны Ерөнхий сайдаар тодорсон Л.Оюун-Эрдэнэ NTV телевизэд өгсөн ярилцлагынхаа үеэр “Галаар битгий наадаарай. Би үндэсний хэмжээний тэмцэл өрнүүлж чадна шүү” гэж Ерөнхийлөгч У.Хүрэлсүх хийгээд эсрэг бүлэглэлүүдээ сүрдүүлсэн. Харин одоо тэрбээр алдсан эрх мэдлээ эргүүлж олж авахын төлөө ямх ямхаар хөдөлж байна. “МАН-ын дарга юм бол УИХ-ын дарга биш, Ерөнхий сайдынхаа тамгыг ав” гэх акцийг АН-ынхнаар хийлгэсэн Л.Оюун-Эрдэнийн алсын хараа нь 2027 онд Ерөнхийлөгчийн суудлыг авах юм. Хүссэн ч, эс хүссэн ч 2027 онд сонгогдох Монгол Улсын Ерөнхийлөгч УИХ-ын 2028, 2032 оны сонгуулийн зургийг зуралцана. Тиймээс МАН, АН-ынхны хувьд “Хонгилын эзэн” болохоос илүү Монголын улс төрийн ХААН титмийн төлөөх тулаан ширүүхэн болох нь нэгэнт тодорхой боллоо. МАН дахь 30:38-ын бүлгийн аль алинд АН болон бусад нам гэсэн улс төрийн цэс бий. “Гучийн бүлэг”-ийнхний “2027 он” хэмээх цэсэнд АН-аас Лу.Гантөмөр, “38-ын бүлэг”-ийнхний цэсэнд С.Баярцогтын нэр одоохондоо тест төдий байгаа. Ирэх намар, өвөл, хаврын улс төр энэхүү цэсэнд ямар өөрчлөлт оруулахыг таашгүй юм. С.Баярцогт бараг шансгүй биз.

Д.Амарбаясгалан... Монголын улс төрд хал үзэж, халуун чулуу долоож яваа наяад оны лидер энэ залуу 2027 он угтсан улс төрийн нэгэн гол дүр байна. МАН-ын Ерөнхий нарийн бичгийн даргаар хамгийн олон жил ажилласан, 2016 оноос хойшхи шат шатны сонгуульд намаа үнэмлэхүй ялуулсан тэрбээр одоо Ерөнхийлөгч У.Хүрэлсүх хийгээд Л.Оюун-Эрдэнэ нарын дунд холбон тоглогч. Д.Амарбаясгалан наадмын өмнөхөн Ерөнхий сайд асан С.Баяртай Хөвсгөлд загасчилсан нь сонирхол татна. С.Баяр, Д.Амарбаясгалан нарын хувьд хэн хэн нь МАН-ын гол стратегичид гэгддэг. Д.Амарбаясгалан С.Баяртай Хөвсгөл нуурын эрэг дээр загасчлахдаа “Гучийн бүлэг”-ээс УИХ-ын гишүүн Х.Баасанжаргал, О.Номинчимэг нарыг урьсан гэх. Харин Д.Амарбаясгалан руу нэгэн эрхэм нууц уулзалтын урилга илгээсэн нь Ерөнхий сайд Н.Учрал. Тэд бас л Хөвсгөлд уулзсан гэх мэдээлэл байна. Ерөнхий сайд Н.Учрал Хөвсгөл далайн эрэг дээр хэсэгхэн саатахдаа МАН-аас Ж.Энхбаяр, Л.Энх-Амгалан, Б.Уянга, З.Мэндсайхан, М.Бадамсүрэн, АН-аас О.Алтангэрэл, Ч.Лодойсамбуу нартай нууц уулзалт хийсэн аж. Уулзалтад оролцсон гишүүдээс харвал, Ерөнхийлөгч У.Хүрэлсүхийн фракцийнхан, MCS-ийн төлөөллүүд, Х.Баттулга, Л.Оюун-Эрдэнэ нарын талынхан гээд эсрэг тэсрэг фракциудын төлөөллүүдийг багтаажээ. АН-ыг төлөөлөн энэхүү уулзалтад оролцсон О.Алтангэрэл, Ч.Лодойсамбуу хоёр хоёулаа Х.Баттулга, Л.Оюун-Эрдэнэ, Лу.Гантөмөрийн фракци. Эл дүр зургаас харвал, Ерөнхий сайд Н.Учралд АН-ын 42 гишүүний гарын үсгээр дамжуулж өөрийг нь нуман тулгуурт хийсэн Л.Оюун-Эрдэнэ, Д.Амарбаясгалан тэргүүтэй “Гучийн бүлэг”-ийнхэнтэй тохиролцоо хийх сонирхол байгаа нь тодорхой. Тоолуур хэдийнэ ажиллаж эхэлсэн ч Н.Учрал МАН-ын дарга, Ерөнхий сайд. МАН-ын дарга, Ерөнхий сайд гэдэг Монголын улс төр дэх ХААН суудал. Монгол Улсын Ерөнхийлөгчийн 2027 оны сонгууль, УИХ-ын 2028 оны сонгууль угтсан улс төрд 30:38-ынхаа эрх ашгийг хангах эрх мэдэл, хүч, нөлөө түүнд бий. Товчхондоо, хэнийг од, хэнийг мод болгохыг шийдэх үнэмлэхүй эрх мэдэл Ерөнхий сайд Н.Учралынх. Учир нь Үндсэн хуулийн нэмэлт өөрчлөлтөөр Монгол Улсын Ерөнхий сайд үнэмлэхүй эрх мэдэлтэй билээ.

С.Тулга