Засгийн газраас шатахуун импортлогч аж ахуйн нэгжүүдийг хөнгөлөлттэй зээлээр дэмжсэний үр дүнд шатахуун хадгалах савнууд эхнээсээ ашиглалтанд орж байна

     УИХ-ын 2024 оны 21 дүгээр тогтоолоор баталсан Засгийн газрын 2024–2028 оны үйл ажиллагааны хөтөлбөр болон Стратегийн ач холбогдол бүхий бүтээгдэхүүний хангамж, нийлүүлэлтийг дэмжих тухай хуулийн холбогдох заалтын хэрэгжилтийг хангах, улсын хэмжээнд газрын тосны бүтээгдэхүүний агуулахын багтаамж, хүчин чадлыг нэмэгдүүлэх зорилгоор Аж үйлдвэр, эрдэс баялгийн яам Монголбанк болон арилжааны банкуудтай хамтран газрын тосны бүтээгдэхүүний агуулах шинээр барих, өргөтгөх, шинэчлэх төслүүдэд жилийн 9 хувийн хүүтэй хөнгөлөлттэй зээлийн санхүүжилт олгох арга хэмжээг хэрэгжүүлж байна.

Энэхүү арга хэмжээний хүрээнд “Шунхлай” ХХК, “Сан Петролиум” ХХК хамрагдан нийт 114,000 м³ багтаамж бүхий газрын тосны бүтээгдэхүүний агуулах шинээр барихаар төлөвлөсөн бөгөөд төслийг хэрэгжүүлэхэд шаардлагатай нийт 161.0 тэрбум төгрөгийн хөрөнгө оруулалтын санхүүжилтийг арилжааны банкнаас авсан. Үүнээс “Сан Петролиум” ХХК нь 8,000 м³ багтаамжтай агуулахын савыг өөрийн хөрөнгөөр санхүүжүүлэхээр төлөвлөсөн. ГТБА-ын төслийн мэдээлэл, хэрэгжилт:

1. “Сан Петролиум” ХХК нь Улаанбаатар хотын Сонгинохайрхан дүүргийн 20 дугаар хороонд 16,000м³ багтаамжтай үүнээс 8000м3-ийн багтаамжтай савыг өөрийн хөрөнгө оруулалтаар газрын тосны бүтээгдэхүүний агуулах шинээр барих төслийг хэрэгжүүлж байна. Төслийн нийт хөрөнгө оруулалтын хэмжээ 10.0 тэрбум төгрөг бөгөөд жилийн 9 хувийн хүүтэй хөнгөлөлттэй зээлийн хүрээнд 10.0 тэрбум төгрөгийн санхүүжилтийг арилжааны банкнаас авч, төслийн хэрэгжилтийн хариуцлагын гэрээ газрын тосны асуудал эрхэлсэн төрийн захиргааны байгууллагтай байгуулсан. Зээлийн эргэн төлөлтийн хугацаа 2026 оны 5 дугаар сарын 5-ны өдрөөс 2030 оны 12 дугаар сарын 2-ны өдөр хүртэл байна. Газрын тосны бүтээгдэхүүний агуулахын барилга угсралтын ажлын гүйцэтгэл 85–90 хувьтай байгаа бөгөөд төслийг 2026 оны 12 дугаар сарын 31-ний дотор бүрэн дуусгаж, ашиглалтад оруулахаар төлөвлөсөн.
2. “Шунхлай” ХХК нь Улаанбаатар хотын Сонгинохайрхан дүүргийн 21 дүгээр хороонд нийт 98,000 м³ багтаамжтай газрын тосны бүтээгдэхүүний агуулах шинээр барих төслийг хэрэгжүүлж байна. Төслийн хүрээнд тус бүр нь 14,000 м³ нэрлэсэн багтаамжтай, 36 метрийн диаметр, 14.5 метрийн өндөртэй нийт 7 ширхэг босоо ган сав барихаар төлөвлөсөн бөгөөд Монгол Улсад баригдаж буй хамгийн том хүчин чадалтай газрын тосны бүтээгдэхүүний агуулахын төсөл юм. Төслийн нийт хөрөнгө оруулалтын хэмжээ 151.26 тэрбум төгрөг бөгөөд жилийн 9 хувийн хүүтэй хөнгөлөлттэй зээлийн хүрээнд арилжааны банкнаас 151.0 тэрбум төгрөгийн зээлийн санхүүжилт авч, Газрын тосны асуудал эрхэлсэн төрийн захиргааны байгууллагатай “газрын тосны бүтээгдэхүүний агуулах шинээр барих төслийн хэрэгжилт, хөнгөлөлттэй зээлийн зориулалтын хариуцлагын гэрээ” байгуулсан. Зээлийн эргэн төлөлтийн хугацаа 2026 оны 5 дугаар сарын 13-ны өдрөөс 2030 оны 12 дугаар сарын 25-ны өдөр хүртэл байна. Газрын тосны бүтээгдэхүүний агуулахын барилга угсралтын ажлын гүйцэтгэл 40 хувьтай байгаа бөгөөд төслийг 2026 оны 10 дугаар сарын 1-нээс 2028 оны 1 дүгээр сарын 1-ний өдрийг хүртэлх хугацаанд хэрэгжүүлж, барилга угсралтын ажлыг бүрэн дуусган ашиглалтад оруулахаар төлөвлөсөн.

Ж.Энх