COP17: Монгол Улсын уур амьсгалын бодлого, зорилтыг танилцууллаа

     НҮБ-ын Цөлжилттэй тэмцэх конвенцын Талуудын 17 дугаар бага хурал (UNCCD COP17)-ын хүрээнд өнөөдөр /2026.08.20/ “Үндэсний карбон бүртгэлийн систем”-ийн демо хувилбарыг танилцуулах арга хэмжээ зохион байгуулагдлаа.

Тус арга хэмжээний үеэр Байгаль орчин, уур амьсгалын өөрчлөлтийн яамны Бодлого төлөвлөлтийн газрын дарга, доктор М.Намхайринчэн “Монгол Улсын уур амьсгалын бодлого ба зорилт” сэдвээр илтгэл тавьж, Монгол Улсын уур амьсгалын бодлогын өнөөгийн чиглэл, Үндэсний тодорхойлсон хувь нэмэр (NDC 3.0), Уур амьсгалын өөрчлөлтийн тухай хууль болон бодлогын зорилтыг бодит хэрэгжилт, хөрөнгө оруулалттай холбох чиглэлээр авч хэрэгжүүлж буй арга хэмжээний талаар танилцууллаа.

Монгол Улс NDC 3.0-ийн хүрээнд 2035 он гэхэд хүлэмжийн хийн ялгарлыг суурь түвшинтэй харьцуулахад 30.3 хувиар (нөхцөлт бус) бууруулах зорилт дэвшүүлээд байна. Мөн ойн шингээлтийг нэмэгдүүлэх болон олон улсын дэмжлэгт тулгуурласан нөхцөлт арга хэмжээг бүрэн хэрэгжүүлснээр нийт зорилтыг 52.8 хувьд хүргэхээр тооцоолж байна.

Илтгэлд Монгол Улс уур амьсгалын зорилтоо тодорхойлох үе шатнаас бодит хэрэгжилтийн үе шат руу шилжиж байгааг онцолж, NDC 3.0-ийг хэрэгжүүлэх үйл ажиллагааны болон хөрөнгө оруулалтын төлөвлөгөө, урт хугацааны бага ялгарлын хөгжлийн стратеги, технологийн хэрэгцээний үнэлгээ, нүүрстөрөгчийн зах зээлийн зохицуулалтыг уялдуулан хөгжүүлж байгааг танилцуулав.

Түүнчлэн Уур амьсгалын өөрчлөлтийн тухай хууль нь уур амьсгалын бодлого, төсөв, хөрөнгө оруулалт, хэмжих-тайлагнах-баталгаажуулах тогтолцоо, мэдээллийн сан болон нүүрстөрөгчийн бүртгэлийг нэгдсэн байдлаар хөгжүүлэх эрх зүйн суурийг бүрдүүлж байгааг онцоллоо.

“Одоо бид амлалтаас хэрэгжилт рүү, хэрэгжилтээс бодит үр дүн рүү шилжих ёстой. Уур амьсгалын үйл ажиллагаа, газрын нөхөн сэргээлт, байгаль хамгаалал, тогтвортой хөгжлийг нэгтгэсэн хөрөнгө оруулалт нь ирээдүй үеийнхэндээ үлдээх тэсвэртэй, тогтвортой Монгол Улсын хөгжлийн суурь болно” хэмээн М.Намхайринчэн илтгэлийнхээ төгсгөлд тодотгов.