Төрийн банк бэлчээрийн тогтвортой менежментийг дэмжих санхүүжилтийн шийдлийг COP17-д танилцууллаа

     НҮБ-ын Цөлжилттэй тэмцэх конвенцын Талуудын 17 дугаар бага хурал - UNCCD COP17-ын хүрээнд зохион байгуулсан “Өндөр түвшний Тогтвортой санхүүгийн форум 2026” арга хэмжээ 2026 оны 8 дугаар сарын 19, 20-ний өдөр Улаанбаатар хотноо боллоо.

Форумын “Бэлчээрийн хөрөнгө оруулалт: Уур амьсгал ба газрын доройтлын эрсдэлийг хөрөнгө оруулалтын боломж болгох нь” сэдэвт хэлэлцүүлэгт Төрийн банкны Тогтвортой хөгжил хариуцсан дэд захирал С.Болор-Эрдэнэ оролцож, тогтвортой бэлчээрийн менежментийг дэмжих санхүүжилтийн шийдэл, цаашдын хамтын ажиллагааны талаар байр сууриа илэрхийллээ.

Тэрээр уур амьсгалын эрсдэлд өндөр өртдөг малчид болон хөдөөгийн жижиг бизнесийн санхүүжилтийн хүртээмжийг зөвхөн зээлийн хүүг бууруулах замаар шийдэх боломжгүйг онцоллоо. Малчдын бодит орлого, үйлдвэрлэл, борлуулалтын улирлын мөчлөг болон уур амьсгалын эрсдэлийг харгалзсан санхүүжилтийн бүтэц шаардлагатайг тэмдэглэлээ.

Төрийн банк энэ чиглэлээр дараах гурван шийдлийг онцолж байна. Үүнд:

1. Мөнгөн урсгалд суурилсан үнэлгээ: Уламжлалт барьцаа хөрөнгөөс гадна малчдын бодит орлого, үйлдвэрлэл, бүтээгдэхүүний борлуулалт болон худалдан авалтын гэрээ зэрэг мэдээллийг зээлийн үнэлгээнд ашиглах;

2. “Тэсвэртэй байдлын багц” бий болгох: Зээлийг даатгал, тэжээлийн нөөц, усан хангамж, малын эрүүл мэнд, цаг агаарын эрт сэрэмжлүүлэх мэдээлэл болон тогтвортой зах зээлтэй уялдуулах;

3. Эрсдэлийг зөв хуваарилах: Малчид, худалдан авагчид, банкнууд, даатгалын байгууллагууд, төр болон хөгжлийн түншүүд өөрсдийн хамгийн сайн удирдаж чадах эрсдэлийг хариуцсан хамтын тогтолцоо бүрдүүлэх.

Төрийн банк ногоон санхүүжилтийн чиглэлээр дотоодын зах зээлд 10 тэрбум төгрөгийн “Ногоон ирээдүй” бонд гаргаж, Ногоон таксономид нийцсэн төсөл, үйл ажиллагааг санхүүжүүлэх тогтолцоо бүрдүүлсэн. Мөн тогтвортой хөдөө аж ахуй болон бусад ногоон санхүүгийн бүтээгдэхүүнийг хөгжүүлж, орон нутгийн харилцагчдад хүргэх туршлага хуримтлуулжээ.

Түүнчлэн Төрийн банк олон улсын санхүүгийн зах зээлд 300 сая ам.долларын бонд амжилттай гаргасан бөгөөд үүнээс 150 сая ам.долларын эх үүсвэрийг тогтвортой, ногоон хөгжлийг дэмжихэд чиглүүлэхээр төлөвлөсөн. Энэ нь урт хугацаатай, боломжийн өртөг бүхий эх үүсвэр болон эрсдэл хуваах механизм бүрдвэл бэлчээр, хөдөө аж ахуйн ногоон шилжилтэд санхүүжилт хүргэхэд Төрийн банк бэлэн байгааг харуулж байна.

Төрийн банк тогтвортой санхүүжилтийг зөвхөн зээл олгох үйл ажиллагаа бус, малчдын орлогыг тогтворжуулах, уур амьсгалын эрсдэлийг бууруулах, бэлчээрийн зохистой ашиглалтыг дэмжих цогц шийдэл болгон хөгжүүлэхийг зорьж байна.

Итгэл төгс Ногоон ирээдүй