Вьетнамын парламентын дарга Монгол Улсад айлчилна

     Вьетнамын Үндэсний Ассамблейн дарга Чан Тхань Ман энэ сарын 6-наас 11-ний хооронд БНСУ болон Монгол Улсад албан ёсны айлчлал хийхээр болжээ. Тэрээр БНСУ-ын Үндэсний Ассамблейн дарга Чо Жон Сикийн болон Монгол Улсын Их Хурлын дарга С. Бямбацогтын урилгаар дээрх айлчлалыг хийх юм.Вьетнам, БНСУ дипломат харилцаа тогтоосны 34 жилийн ойгоо энэ онд тэмдэглэж байна. Хоёр улс 2001 онд харилцаагаа иж бүрэн түншлэлийн түвшинд хүргэж, 2009 онд стратегийн түншлэл, 2022 онд иж бүрэн стратегийн түншлэлийн харилцаа тогтоосон.

Хоёр улсын худалдааны эргэлт 2025 онд 89.5 тэрбум ам.долларт хүрч, өмнөх оноос 9.6 хувиар өссөн байна. Үүнээс Вьетнамын экспорт 28.9 тэрбум ам.долларт хүрч, жилийн дүнгээр 12.7 хувиар нэмэгджээ. Харин энэ оны эхний долоон сарын байдлаар хоёр улсын худалдааны эргэлт өмнөх оны мөн үеэс 41 хувиар өсөж, 70 тэрбум ам.долларт хүрсэн байна. Хөрөнгө оруулалтын хувьд БНСУ нь Вьетнамын хамгийн том гадаадын хөрөнгө оруулагч орон бөгөөд тус улсад нийт 102.6 тэрбум ам.долларын хөрөнгө оруулалт бүхий 10,567 төсөл хэрэгжүүлж байна.Харин Вьетнам, Монгол Улс 1954 оны арваннэгдүгээр сарын 17-нд дипломат харилцаа тогтоосон бөгөөд 2024 оны есдүгээр сарын 30-нд харилцаагаа иж бүрэн түншлэлийн түвшинд хүргэсэн юм.Хоёр улсын худалдааны эргэлт 2025 онд 155 сая ам.долларт хүрсэн бөгөөд үүнээс Вьетнамын Монгол Улсад хийсэн экспорт 100 сая ам.доллар байжээ.