М.Нарантуяа-Нара Х.Булгантуяагийн дараа Үндсэн хууль зөрчсөн хоёр дахь эмэгтэй гишүүнээр тодорч, Ерөнхий сайд Н.Учралын бүрэн эрхэд халдав уу

      Улс төрд санамсаргүй зүйл гэж үгүй. Үндсэн хуулийн нэмэлт өөрчлөлтийн дагуу бүрдсэн 126 гишүүнтэй анхны парламентад ИЗНН-д дөрвөн суудал “бэлэглэсэн” нь Ерөнхий сайд асан Л.Оюун-Эрдэнэ. Харин “ИЗНН миний хүчээр УИХ-д суудалтай болсон” гэж даналздаг УИХ-ын гишүүн М.Нарантуяа-Нара бол Л.Оюун-Эрдэнэ, “Хэро энтертайнмент”-ийн Б.Баатар тэргүүтэй “15 давхар”-ын БЭТ. М.Нарантуяа-Нара гишүүн казахуудын эсрэг экстремист үг, үйлдэл гаргах боллоо. Харин түүнд хэн ийм чиглэл өгсөн бэ. Улс төрийн хүрээнийхний ярьж буйгаар, Ерөнхий сайд асан Л.Оюун-Эрдэнэ “Чамд ИЗНН-ыг өгнө” гэж М.Нарантуяа-Нарад амласан гэх. Үнэн, худал нь бүү мэд, ямартай ч ийм яриа Төрийн ордонд гарчээ. Хэрэв энэ үнэн бол Л.Оюун-Эрдэнэ М.Нарантуяа-Нара гишүүнд казахуудын эсрэг экстремист улс төр явуулах чиглэлийг юуны учир өгсөн нь сонин. Улсын Ерөнхий сайд, ҮАБЗ-ийн гишүүн асан хүн шүү дээ. Гэвч хэрүүлч, хараалчаараа зартай М.Нарантуяа-Нара арай л хэтрүүлчихлээ. Төрд тангараг өргөсөн тэрбээр үндэстэн, ястан хооронд хагарлын цанг хэдийнэ дэлдэв. Халх, казахын хэрүүлийг сошиалаар нэг өрдөж суугаа тэрбээр УИХ-ын ээлжит бус чуулган өнгөрсөн даваа гарагт (2026.09.07) эхэлж, төсвийн тодотгол хэлэлцэх үеэр “Миний хувьд, таны Засгийн газрыг “Бүрэн бүрэлдэхүүнээрээ огцор” гэхээс илүү тодорхой яамдынхаа сайд нарыг соль гэмээр байна. Жишээлбэл, ГБХНХ-ын сайд Т.Аубакир сайдыг сольж өгнө үү гэж хүсэж байна. Үндэстэн, ястнаар ялгаварлан гадуурхсандаа биш. Өнгөрсөн хугацаанд Монгол Улсын төр засагт гарсан, Монгол Улсаас урвасан К.Зардыхан, Бөкөн, Х.Жекей, А.Мурат зэрэг гишүүдээс харж байгаад би бодлогын яамыг Т.Аубакир гишүүнээр удирдуулахгүй байх санал гаргаж байна. Холбогдох баримтыг хавсарган танд бичгээр явуулна” гэв. Харин Т.Аубакир сайд М.Нарантуяа-Нарагийн анти казах ажиллагааны талаар “Монголын парламентад хараар бичигдэх үйл явдал болж байна. Дэлхийн улс орнууд жигшин зэвүүцдэг ялгаварлан гадуурхах фашист гэмт хэргийг М.Нарантуяа-Нара гишүүн үйлдэж байгаад харамсаж байна. Хуулийн байгууллагууд энэ талаар ажиллаж байгаа. С.Замира гишүүн бид хэд хандах газартаа хандсан” гэж өнөөдөр (2026.09.09) сэтгүүлчдэд ярилаа. М.Нарантуяа-Наран гишүүний зүгээс сошиалд эхлүүлсэн анти казах ажиллагаа ийнхүү Төрийн ордонд доргилт өгч, Ерөнхий сайд Н.Учралын танхим руу чиглэв. Үндсэн хуульд 2019 онд нэмэлт өөрчлөлт оруулж, Монгол Улсын Ерөнхий сайд үнэмлэхүй эрх мэдэлтэй болсон. Сайд нарыг томилох, чөлөөлөх нь Ерөнхий сайдын бүрэн эрх. Харин УИХ-ын гишүүн М.Нарантуяа-Нара казахууд руу чиглэсэн ажиллагаагаа хэтрүүлж, энэ Засгийн газарт казахуудыг төлөөлөн ажиллаж буй Т.Аубакир сайдыг “Соль” гэснээрээ Үндсэн хууль зөрчиж, Ерөнхий сайд Н.Учралын бүрэн эрхэд халдав уу гэдэг дүр зураг ажиглагдана. Үндсэн хуулиар хэн нэгнийг үндэс угсаа, яс үндсээр ялгаварлан гадуурхахыг хориглосон. Монгол төрийн номер 03 гэгддэг Ерөнхий сайдын бүрэн эрх ч Үндсэн хуулиар хамгаалагдсан. Тиймээс УИХ-ын гишүүн М.Нарантуяа-Нара Үндсэн хууль зөрчиж, бусдыг яс үндсээр нь ялгаварлаад зогсохгүй Ерөнхий сайд Н.Учралын бүрэн эрхэд ч халдлаа гэхэд хилсдэхгүй. Үндсэн хуулийн Цэц өнгөрсөн намар УИХ-ын гишүүн Х.Булгантуяаг “Үндсэн хууль зөрчсөн” гэж дүгнэсэн. Х.Булгантуяатай холбоотой эл дүгнэлтийг УИХ хэзээ хэлэлцэх нь тодорхойгүй. Ямартай ч ИЗНН-ыг төлөөлөн энэ парламентад суугаа дөрвөн гишүүний нэг болох М.Нарантуяа-Нара Үндсэн хуулийн Цэцэд дуудагдах нь цаг хугацааны л асуудал болсон болов уу. Казах эмэгтэйчүүдээс анх удаа УИХ-ын гишүүн болсон С.Замира түүнтэй нэг танхимд, нэг намд тохой залган суугаа.  

С.Бат