УИХ-ын гишүүн Х.Болормаагийн санаачилгаар Сүхбаатар дүүрэг Спорт цогцолбортой боллоо

       УИХ-ын гишүүн Х.Болормаа Сүхбаатар дүүргийн Засаг даргаар ажиллаж байхдаа санаачилсан ажлуудын нэг нь Спорт цогцолбор барих ажил юм. 2024 оны тавдугаар сард шав тавьж байсан Спорт цогцолборын бүтээн байгуулалт бүрэн дуусаж, Улсын комисс хүлээн авчээ. Өөрөөр хэлбэл, нийт 29,920 ам метр талбайг хамарсан спорт, амралт, чөлөөт цагийн иж бүрэн орчин бүхий цогцолбор ийнхүү үйл ажиллагаагаа эхлүүлэхэд бэлэн болж байгаа аж. Тус спорт цогцолборт:

 -Сагсан бөмбөг

-Волейбол

-Заалны болон гадна хөлбөмбөг

 -Газрын болон ширээний теннис

-Бокс

-Фитнесс, дасгал хөдөлгөөн

-Хананд авиралт

-Гүйлтийн зам

-Гадна дасгал, биеийн тамирын талбай зэрэг олон төрлийн спортоор хичээллэх боломж бүрджээ.

Мөн гурван давхар спортын барилгад үндсэн болон бэлтгэлийн заал, хувцас солих өрөө, үзэгчдийн суудал, шүүгч болон камерын өрөө, хурлын болон бусад үйлчилгээний өрөө тасалгааг иж бүрнээр шийдсэн байна. Харин гадна орчинд нь ногоон байгууламж, хүүхдийн тоглоомын талбай, гэр бүлээрээ амарч, чөлөөт цагаа өнгөрүүлэх бүс, дугуйн зам, автомашины зогсоол, гэрэлтүүлэг зэрэг тохижилтыг цогцоор нь хийсэн нь энэ бүтээн байгуулалтын бас нэг онцлог юм. Сүхбаатар дүүргийн 140 гаруй мянган иргэн, ялангуяа хүүхэд, залуус спортоор хичээллэх, эрүүл идэвхтэй амьдралын хэв маягийг хэвшүүлэх, чөлөөт цагаа зөв боловсон өнгөрүүлэх шинэ орчинтой болж байна.

Д.Болор