Казахстан, Өмнөд Солонгос 19 тэрбум ам.долларын гэрээ байгуулжээ

     СӨҮЛ, 2026 оны есдүгээр сарын 16 /Anadolu/. Казахстаны Ерөнхийлөгч Касым-Жомарт Токаевын БНСУ-д хийж буй төрийн айлчлалы хүрээнд хоёр улс нийт 19 тэрбум ам.долларын арилжааны гэрээ байгуулжээ. Энэ тухай Токаев БНСУ-ын Ерөнхийлөгч Ли Жэ Мёнтой хэлэлцээ хийх үеэрээ мэдэгдсэн байна.

Казахстаны Ерөнхийлөгчийн хэвлэлийн албанаас мэдээлснээр, хоёр улсын төрийн тэргүүн нарын хэлэлцээ цөөн бүрэлдэхүүнтэйгээр эхэлж, албан ёсны төлөөлөгчдийн гишүүдийг оролцуулан өргөтгөсөн бүрэлдэхүүнтэй үргэлжилжээ. 

Токаев БНСУ-ыг Казахстаны стратегийн түнш хэмээн нэрлээд, хоёр улсын хооронд зөрчил, санал зөрөлдөөн байхгүйг онцолсон байна.

Тэрбээр хэлэхдээ “Хоёр талын харилцааны тухайд, энэхүү айлчлалын хүрээнд 19 тэрбум ам.долларын арилжааны хэлэлцээр байгууллаа. БНСУ-ын хөрөнгө оруулагчидтай хамтран ажиллаж байгаадаа бид сэтгэл хангалуун байгаа ба цаашид хамтын ажиллагаагаа үргэлжлүүлэхэд бэлэн байна. Зочид буудал, газрын тос боловсруулах үйлдвэр барих, мөн хот байгуулалтын чиглэлээр сайн төлөвлөгөөнүүд бий. Түүнчлэн соёл, хүмүүнлэгийн харилцааг бэхжүүлэхэд онцгой анхаарч байна” гэжээ.

Хоёр талын хэлэлцээний гол сэдвүүдийн нэг нь "Алатау хот" төслийг цаашид хэрэгжүүлэх тухай байжээ. “Энэ бол бидний хувьд үнэхээр чухал ач холбогдолтой төсөл юм. Тус хотын статусын талаарх заалтуудыг Үндсэн хуульд тусгасан. БНСУ-ын компаниудад шаардлагатай бүх хууль эрх зүйн баталгааг олгоно” гэж Казахстаны Ерөнхийлөгч онцолсон байна.

Токаев мөн Казахстанд 120 мянга гаруй солонгос үндэстэн амьдарч байгааг дурдаад тэдэнд шаардлагатай нөхцөл боломжийг бүрдүүлсэн гэдгийг тэмдэглэжээ.

Өргөтгөсөн бүрэлдэхүүнтэй хэлэлцээний үеэр Казахстаны Ерөнхийлөгч БНСУ-ын эдийн засаг, шинжлэх ухаан, технологийн салбарын ололт амжилтыг өндрөөр үнэлж, хамтын ажиллагааг цаашид гүнзгийрүүлэх сонирхолтой байгаагаа илэрхийлсэн байна.

Харин Ли Жэ Мён Казахстаныг БНСУ-ын эдийн засгийн аюулгүй байдлын салбар дахь чухал түнш хэмээн мэдэгджээ. “Казахстан бол манай улсын эдийн засгийн аюулгүй байдлын салбар дахь чухал түнш. Тус улс эрчим хүчний болон байгалийн баялгаар арвин төдийгүй өндөр технологийн салбаруудыг хөгжүүлэх асар их нөөц бололцоотой. Бид дэвшилтэт үйлдвэрлэл, дижитал технологийн тусламжтайгаар Казахстаны аж үйлдвэрийг шинэчлэхэд дэмжлэг үзүүлэхэд бэлэн байна” гэж тэрбээр хэлсэн байна.

Тэрбээр хэлэхдээ, олон улсын нөхцөл байдал тодорхой бус байгаа энэ үед хоёр улс давуу тал, нөөц боломжоо нэгтгэн хамтын ажиллагаагаа бэхжүүлэх шаардлагатай гэжээ. “Манай хоёр улс бие биенийхээ давуу тал, нөөц боломжийг нэгтгэж, харилцин ашигтай байх зарчимд тулгуурлан хамтдаа хөгжиж дэвших шинэ боломжийг бий болгох замаар хамтын ажиллагаагаа бэхжүүлэх ёстой” гэж Ли Жэ Мён онцолсон байна.

Хэлэлцээний эцэст Казахстан, БНСУ-ын Гадаад хэргийн сайд нар хоёр улсын харилцааны түвшнийг ирээдүйд чиглэсэн Иж бүрэн стратегийн түншлэл болгон ахиулах тухай дипломат ноот бичиг солилцжээ. Түүнчлэн хоёр улсын төлөөлөгчид засгийн газар хоорондын болон байгууллага хоорондын 12 баримт бичиг солилцсон байна.

Эдгээр баримт бичигт газрын тосны салбар, цөмийн эрчим хүчийг энхийн зорилгоор ашиглах, эрчим хүч, шинжлэх ухаан, боловсон хүчин бэлтгэх, хөдөлмөр эрхлэлт, оюуны өмч, хот байгуулалт, дэд бүтцийн хөгжил, ойг дижитал технологи ашиглан нөхөн сэргээх, уур амьсгалын өөрчлөлттэй тэмцэх, соёл, хүмүүнлэгийн салбарын хамтын ажиллагааны асуудлыг тусгажээ.

Есдүгээр сарын 16-нд буюу өнөөдөр “Төв Ази - БНСУ” анхдугаар дээд хэмжээний уулзалтад болно

Д. Жаргал