Могойг могойгоор...

       Ерөнхий сайд Н.Учрал өнөөдөр (2026.09.16) С.Амарсайханыг Хууль зүй, дотоод хэргийн сайдаас чөлөөлснөө мэдэгдлээ. Л.Оюун-Эрдэнийн зүгээс өчигдөр Н.Учралд хандаж “Өөрийн толгойтой байвал түүхэнд үлдэх Ерөнхий сайд болж үлдэнэ. Эс чадвал хананд зургаа өлгүүлсэн түр зуурын л Ерөнхий сайд болно” гэж хэлсний хариуг ийнхүү барилаа. Г.Занданшатарт “Танхимынхаа эсрэг ажилласан” гэж хөөгдөж байсан С.Амарсайхан хоёр дахь Засгийн газраасаа хөөгдлөө. С.Амарсайханы эсрэг “Төрийн эргэлт” хийсэн ШШГЕГ-ын дарга, бригадын генерал А.Намсамандыг ч албан тушаалаас нь чөлөөлсөн аж. Хөөгдсөн С.Амарсайханыг ЗГХЭГ-ын дарга Б.Энхбаяр орлох болсон нь Н.Учралын зүгээс Л.Оюун-Эрдэнэд барьсан улс төрийн сюрприз боллоо.

Л.Оюун-Эрдэнэ телевизэд өгсөн ярилцлагынхаа үеэр Б.Энхбаярыг “Могой” гэж хочилсон. Харин түүний зүгээс Н.Учралын танхимд шургалуулсан “Могой” нь С.Амарсайхан. Нэг Засгийн газарт хүний, өөрийн талын хоёр “Могой” шөргөөцөлдөж суух нь Ерөнхий сайд Н.Учралд цөвүүн, зэвүүн санагдаж байсан нь тодорхой. Тиймээс Л.Оюун-Эрдэнэ тэргүүтэй эсрэг талынхан нь АН-ын дарга О.Цогтгэрэлийн гараар дахин могой бариулж “Н.Учрал аа, өөртөө итгэл үзүүлэх эсэх тухай хүсэлтээ УИХ-д оруулж ир” хэмээн тулган шаардаж буй энэ үед С.Амарсайханаар өөрсдийнх нь эсрэг сум тавилаа. Байндаа харин хэр тусах бол... Л.Оюун-Эрдэнэ ба түүний найзууд одоо яах бол... “Н.Учрал, С.Бямбацогт бид хэд саяхан таван цаг гаруй уулзаж, төсвийн талаар ярилцсан. Тэгэхэд зүв зүгээр байсан. Сүүлийн хоёр хоногт л нөхцөл байдал ийм болчихлоо” хэмээн сэтгүүлчдэд тун гэмгүй дүр эсгэж ярьсан Л.Оюун-Эрдэнэ Н.Учралыг Ерөнхий сайдаас огцруулахаар АН-ынхантай хамт гол тайзан дээр гарч ирэх үү гэдэг нь анхаарал татаж эхэллээ. “Өөрийн толгойгүй” гэж шоглосных нь хариуд Н.Учрал Б.Энхбаяр гэдэг “Хорт могой”-г өөдөөс нь тавьчихлаа шүү дээ. “Хорыг хороор” гэдэгчлэн могойг могойгоор дарах Н.Учралын тактик хэрэгжиж эхэллээ. Б.Энхбаярын хувьд, Л.Оюун-Эрдэнэ тэргүүтний медиа довтолгоонд хэдэнтээ шархадсан. Шархадсан баавгай аюултай байдаг шиг шархадсан могой хэр хортойг Л.Оюун-Эрдэнэ нарт мэдрүүлэх цаг ирэв бололтой. Могойг могойгоор...

С.Тулга