Л.Оюун-Эрдэнэ тэргүүтэй "30-ийн бүлэг" Б.Энхбаярыг ЗГХЭГ-ын даргаас огцруулж, Л.Мөнхбаатарыг Хууль зүй, дотоод хэргийн сайдаар томилох бойкотоо үргэлжлүүлж байна

     Ерөнхий сайд асан Л.Оюун-Эрдэнэ огцорсноосоо хойш хэсэг чимээгүй байсны эцэст NTV телевизэд ярилцлага өгөхдөө "Галаар битгий наадаарай. Үндэсний хэмжээний тэмцэл өрнүүлж чадна шүү" гэж мэдэгдсэн. Хууль зүй, дотоод хэргийн сайд асан, өдгөө ЗГХЭГ-ын дарга Б.Энхбаярыг тэрбээр "Могой" гэж хочилсон. Л.Оюун-Эрдэнэ тэргүүтэй "30-ийн бүлэг"-ийг тарсан, зарим нь 38 руу урвасан гэх яриа байдаг ч Төрийн ордонд өрнөж буй намрын халуун улс төрөөс харвал тэд эргэн нэгдэцгээсэн бололтой. Өнгөрсөн зун Хэнтийд уулзаж, Хөвсгөлд Ерөнхий сайд асан С.Баяртай хамт загасчилж, Булганд айраг ууцгаасан гэх "30-ийн бүлэг"-т Ерөнхий сайд Н.Учрал С.Амарсайханыг огцруулсан нь, мөн МАН-ын генсек Я.Содбаатарын "Засгийн газрын эсрэг ажилласан гишүүдийг МАН-аас хөөнө" гэх үг ташуур өглөө. Тэр дундаа Ерөнхий сайд Н.Учрал өнгөрсөн долоо хоногт МАН-ын Удирдах зөвлөлийн хурал дээр "Хамтарч ажиллаж чадахгүй бол энэ намд байх шаардлагагүй" гэж хэлсэн нь Л.Оюун-Эрдэнийн талынханд өөрийнх нь эсрэг зогсож, УИХ-аар Г.Тэмүүлэнг Хууль зүй, дотоод хэргийн сайдаар томилох эсэхийг хэлэлцэхийг гацаах шалтаг болов. Тэдний зүгээс Б.Энхбаярыг ЗГХЭГ-ын даргаас огцруулах саналыг Н.Учралд тавьсан гэх яриа өмнө нь гарч байсан бол энэ удаад барьцаа бүр лавшруулж Б.Энхбаярыг огцруулахаас гадна УИХ-ын гишүүн Л.Мөнхбаатарыг Хууль зүй, дотоод хэргийн сайдаар томилох саналыг тавьсаар буй. Гэвч Н.Учрал Г.Тэмүүлэнг томилох саналаасаа ухраагүй байна. УИХ-ын чуулганаар өнөөдөр (2026.09.21) энэхүү томилгоог 14:00 цагт хэлэлцэхээр товлосон ч 126 гишүүнээс 56 гишүүн буюу 44.4 хувийн ирцтэйгээр хуралдаж чадсангүй. УИХ-ын дарга С.Бямбацогт Л.Оюун-Эрдэнэ тэргүүтэй "30-ийн бүлэг" болон О.Цогтгэрэл даргатай АН-ынханд хандаж "Улс орны асуудал хүнд үед танхимаасаа зугтаж, ирцээрээ улс төр хийгээд байвал эцэст нь улстөрчид биш ард түмэн хохирно. Төрийн ажил гацсан цаг, минут бүрийн төлөөсийг та нар биш ард түмэн амьдралаараа төлдөг шүү. 126 гишүүн бүрийн ард итгэл хүлээлгэсэн иргэд бий. Тэдэндээ эргээд очих нүүртэй байгаарай” гэв.

 С.Тулга