С.Амарсайханы шүгэл: Улс төрийн айлгалт уу, бодит аюулын дохио юу

      УИХ-ын гишүүн С.Амарсайхан таван сар Хууль зүй, дотоод хэргийн сайдаар ажиллаад өнгөрсөн лхагва гарагт огцорсон. Тэрээр өөрийг нь огцруулсан шалтгааныг хууль бус, бусармаг байдалтай эвлэрээгүйтэй холбоотой, өөрийнх нь ажиллаж байсан Засгийн газар барьцаалагдсан гэж өнөөдөр мэдэгдээд "Хууль бус, бусармаг зүйлийн төлөө нэг бус, 20 удаа чөлөөлөгдөж, ажлаа өгөхөд харамсах зүйл байхгүй" гэв.

Тэрээр сайдаасаа огцрохоос нэг хоногийн өмнө мөн мэдэгдэл хийж, зарим хууль хүчний байгууллагын удирдлага, дарга нарын хууль бус үйлдлийг илчилсэн. Түүнчлэн, хүчний зарим байгууллагын удирдлага төрийн эргэлт хийх гэж байсан мэтээр нэлээд ноцтой мэдээллүүд хийсэн. Тэгвэл тэрээр өнөөдөр бас сэтгүүлчдэд мэдээлэл өгөхдөө “Монгол Улсын дотоод эв нэгдэлд ноцтой аюул занал үүссэн” зэргээр дахин айдаст автуулах мэдээллийг өгөв.

Хууль зүй, дотоод хэргийн сайд асан С.Амарсайхан “Миний бие хууль зүйн салбарт очихдоо хууль зүй, дотоод хэргийн салбар арай ч ийм болтлоо улс орныхоо эрх ашгийг худалдсан, зарим нэг ялзарсан цагдаа, шүүхийн шийдвэрийн байгууллагын удирдлагуудаар дамжуулаад төр нь барьцаанд орж, Засгийн газар нь хүртэл өнөөдөр дуугарч чадахаа байтлаа барьцаанд орсон байна гэж төсөөлөөгүй.

Төрийн байгууллагуудад хувийн эрх ашгаа шингээж, түүгээрээ дамжуулж явцуу эрх ашгаа гүйцэлдүүлдэг бүлэглэлүүд гээд олон зүйл бий. Өнөөдөр намайг чөлөөлж болно. Гэхдээ миний үнэт зүйл, үзэл бодлыг хэзээ чөлөөлж чадахгүй. Би хууль бус, бусармар үйл ажиллагаатай тэмцсэн.  Монгол Улсын Үндэсний аюулгүй байдал, дотоод аюулгүй байдалтай холбоотой маш олон асуудлуудаар иргэд олон нийтэд мэдээлэл хийсэн. Хийхээс ч өөр аргагүй байсан. Цаашдаа илүү чанга дуугарч, шүгэл үлээнэ.

Ярих асуудал олон бий. Монгол Улсын дотоод аюулгүй байдал хутганы ирэн дээр байна.  Харамсалтай нь, бүх түвшинд нуун дарагдуулж ирсэн. Өшөө цаашаа Үндэсний аюулгүй байдалтай холбоотой ноцтой асуудлаар маш олон түвшинд мэдээлэл хийх, хариуцлага тооцох шаардлагатай.

Ярих, ярихгүй зүйл байна гээд ард түмнээс асуудлыг нуух шаардлага алга. Өнөөдөр хүүхэд  залуусаас эхлээд ард иргэдийн хувь заяа асар аюултай дэнсэн дээр байна гэж би дүгнэж байгаа.

Өнөөдрийг хүртэл өгсөн мэдээллийн цаана надад дурдаагүй нэр, сэдэв олон бий. Албан тушаалаас намайг холдуулж болно. Харин миний олж авсан, аймшигтай, улс орны хувь заяатай холбоотой асуудал, мэдээлэл, баримт нотолгооноос холдуулж чадахгүй. Намайг устгачихдаггүй л юм бол.

Уг нь энэ Засгийн газарт итгэсэн. Харамсалтай нь, барьцаалагдаж байна. Намын олон гишүүн, мөн ялгаагүй иргэд ардаа амьдралтай. Иргэд, олон нийтийн хувь заяа, ирээдүй хойч үеийн амьдрал ахуй айхтар гэмт хэргийн золиос болж энэ хэвээрээ явбал Монгол Улсын аюулгүй байдал ноцтой түвшинд хүрч байгааг баттай мэдэж байгаа учраас цаашид үе шаттай мэдээлэл хийнэ" гэлээ.

Ийнхүү С.Амарсайхан сайдаас чөлөөлөгдсөн ч төрийн болон хууль хүчний байгууллагын доторх ноцтой асуудлуудыг цаашид ч илчилж, “шүгэл үлээнэ” гэдгээ мэдэгдлээ. Харин түүний “Засгийн газар барьцаалагдсан”, “дотоод аюулгүй байдал хутганы ирэн дээр байна”, “Монгол Улсын ирээдүй аюултай дэнсэн дээр байна” гэх үгс нь улс төрийн ээлжит маргаанаас давсан, төрийн тогтолцоо, үндэсний аюулгүй байдалтай холбоотой маш ноцтой асуудлыг хөндөв.

Удаа дараагийн мэдэгдлийг нь харахад өрсөлдөгчөө айлгах улс төрийн сэдвээс хальж, улс орны аюулгүй байдал руу чиглэж байгаа тул үнэн бодит эсэхийг баримт нотолгоо, хууль хяналтын байгууллагын шалгалт, эрх бүхий байгууллагуудын дүгнэлтээр тогтоох шаардлагатай юм.

Ганболд БАТЖАРГАЛ