Ерөнхийлөгч У.Хүрэлсүх Өвөрхангай аймгийн иргэдтэй уулзав

    Монгол Улсын Ерөнхийлөгч У.Хүрэлсүх Өвөрхангай аймагт ажиллах үеэрээ иргэдтэй уулзаж, Монгол Улсын гадаад харилцаа, нийгэм, эдийн засгийн өнөөгийн нөхцөл байдлын талаар мэдээлэл өглөө.

Тэрбээр уул уурхайн бус экспорт, хөрөнгө оруулалт нэмэгдэж, улсын эдийн засаг 6.8 хувиар өссөн үзүүлэлттэй байгааг онцлов. Мөн гадаад валютын нөөц 8.9 тэрбум ам.долларт хүрч, нэг хүнд ногдох дотоодын нийт бүтээгдэхүүн 7000 ам.долларт хүрсэн талаар мэдээллээ.

Түүнчлэн Ерөнхийлөгчийн санаачилсан “Тэрбум мод”, “Хүнсний хувьсгал”, “Цагаан алт”, “Ерөнхийлөгчийн илгээлт-2100”, “Эрүүл монгол хүн” хөдөлгөөн, хөтөлбөрүүд Өвөрхангай аймагт хэрэгжиж, тодорхой үр дүнд хүрч байгааг тэмдэглэв. 

“Хүнсний хувьсгал” хөдөлгөөний хүрээнд Өвөрхангай аймгийн 50 гаруй хүнсний үйлдвэр нийт 5 орчим тэрбум төгрөгийн хөнгөлөлттэй зээл авч, үйлдвэрлэлийн хүчин чадлаа нэмэгдүүлэн 1000 гаруй нэр төрлийн хүнсний бүтээгдэхүүн үйлдвэрлэн зах зээлд нийлүүлж байна.

Мөн аймгийн ноос, ноолуур, арьс шир боловсруулах үйлдвэрүүд сүүлийн жилүүдэд 9000 тонн ноос, 500 тонн ноолуур угааж, 600 мянган богийн арьс, 62 мянган үхрийн шир боловсруулан дотоодын болон гадаадын зах зээлд нийлүүлжээ. Аймгийн боловсруулах аж үйлдвэрийн бүтээгдэхүүний үйлдвэрлэл 2022 онд 25 тэрбум төгрөг байсан бол 2025 онд 28 тэрбум төгрөгийг давж, өссөн үзүүлэлттэй байна.

“Тэрбум мод” үндэсний хөдөлгөөний хүрээнд аймгийн хэмжээнд дөрвөн сая гаруй мод тарьж, суурин газрын ногоон байгууламжийн талбайг 225 га-д хүргэж, 22 мод үржүүлгийн газарт долоон сая тарьц, суулгацын нөөц бүрдүүлсэн байна.

Мөн “Ерөнхийлөгчийн илгээлт-2100” хөтөлбөрийн хүрээнд Өвөрхангай аймгаас 14 улсад 40 орчим оюутан суралцаж, дэлхийн түвшний мэргэжил, боловсрол эзэмшин, зарим нь сургуулиа төгсөөд эх орондоо ирж, орон нутагтаа ажиллаж байгааг онцоллоо.

Тус аймаг хүн амын тоогоор улсын хэмжээнд хоёрдугаарт эрэмбэлэгддэг бөгөөд нийт 40600 хүүхэд, 18-39 насны 34620 залуус, 14400 ахмад амьдарч байна. Нийт хүн амын 70 орчим хувийг хөдөлмөрийн насны иргэд эзэлдэг. 

Аймгийн ИТХ-ын дарга Т.Нарангарав уулзалтыг нээж хэлсэн үгэндээ, Монгол Улсын Ерөнхийлөгчийн эх орон, газар нутаг, үндэс угсаагаа хамгаалах, үндэстэн, ястны эв нэгдлийг бэхжүүлэх, төрт ёс, өв уламжлал, зан заншлаа дээдлэх бодлого, санаачилгыг дэмжиж байгаагаа илэрхийлэв.