Тажикистаны Дээд Мажлисийн Төлөөлөгчдийн танхимын гишүүн Б.Сайдвализодатай уулзлаа

     Улсын Их Хурлын гишүүн, Монгол-Тажикистаны парламентын бүлгийн дарга О.Алтангэрэл Дэлхийн эмэгтэй парламентчдын чуулга уулзалтад оролцож буй Бүгд Найрамдах Тажикистан Улсын Дээд Мажлисийн Төлөөлөгчдийн танхимын гишүүн, Тажикистан-Монголын парламентын бүлгийн дарга Б.Сайдвализодаг өнөөдөр /2026.10.12/ хүлээн авч уулзлаа.

УИХ-ын гишүүн О.Алтангэрэл, Сүүлийн жилүүдэд Монгол, Тажикистаны улс төрийн яриа хэлэлцээ идэвхжиж, харилцаа, хамтын ажиллагаа бодит агуулгаар баяжиж байгааг тэмдэглээд, Монгол Улсын Ерөнхийлөгч 2025 онд Тажикистан Улсад төрийн айлчлал хийж, 2026 оны долдугаар сард Тажикистан Улсын Ерөнхийлөгч Э.Рахмон Монгол Улсад айлчилсан нь үүний баталгаа болохыг онцлов.

Хатагтай Б.Сайдвализода, Бүгд Найрамдах Тажикистан Улсын парламент хоёр улсын харилцаанд өндөр ач холбогдол өгдөгийг дурдаад, Дэлхийн эмэгтэй парламентчдын чуулга уулзалтыг өндөр түвшинд зохион байгуулж буйд талархал илэрхийлэв. Тэрбээр хоёр орны харилцаа идэвхтэй хөгжиж буйг онцлоод, Ерөнхийлөгч нарын харилцан айлчлал хоёр улсын харилцаа, хамтын ажиллагааг бэхжүүлэхэд чухал үүрэг гүйцэтгэснийг тэмдэглэсэн юм.

Түүнчлэн харилцаа хамтын ажиллагааг соёл, хүмүүнлэгийн түвшинд өргөжүүлэх нь зүйтэй хэмээгээд, Боловсрол, шинжлэх ухаан, залуучуудын бодлогын байнгын хорооны даргын хувьд Тажикистаны соёлын өдрүүдийг Монгол Улсад зохион байгуулах хүсэлтэй байгаагаа илэрхийлсэн. Мөн Тажикистан Улсын Дэлхийн энх тайвны төлөөх санаачилгыг Монгол Улс дэмжсэнд талархал дэвшүүлэв.

УИХ-ын гишүүн О.Алтангэрэл, Олон жилийн баялаг түүхтэй Тажикистан Улсын соёлыг иргэдэд таниулах арга хэмжээг Монгол Улсад зохион байгуулахад бүх талын дэмжлэг үзүүлэн ажиллана гэдгээ илэрхийлээд, Тажикистан-Монголын парламентын бүлгийн гишүүдийг Монгол Улсад айлчлахыг урилаа хэмээн Улсын Их Хурлын Нээлттэй парламентын газраас мэдээллээ.