УИХ-ын гишүүн Ц.Даваасүрэнгийн ажлын тайлан

         - Төсвийн байнгын хорооны гишүүн

- Төрийн байгуулалтын байнгын хорооны гишүүн

- Улсын Их Хурлын гишүүний халдашгүй байдлын дэд хорооны дарга

БАЙНГЫН ХОРООНЫ ҮЙЛ АЖИЛЛАГАА

Санхүү, төсвийн бодлогын суурь асуудлыг шийдвэрлэх ажлыг удирдав

Улсын Их Хурлын Төсвийн байнгын хорооны даргаар 2024–2025 онд ажиллаж, улсын төсөв, төсвийн хүрээний мэдэгдэл, төсвийн төсөөлөл, Үндэсний баялгийн сан, Нийгмийн даатгалын болон Эрүүл мэндийн даатгалын сангийн төсөв, Засгийн газрын өрийн удирдлага зэрэг улсын санхүү, төсвийн бодлогын суурь асуудлыг парламентын түвшинд хэлэлцэн шийдвэрлэх ажлыг удирдав.

2024 оны 08 дугаар сарын 22-ны өдрийн Төсвийн байнгын хорооны хуралдаанаар 2024 оны төсвийн хүрээний мэдэгдэл, 2025–2026 оны төсвийн төсөөлөлд өөрчлөлт оруулах хуулийн төслийг хэлэлцэхэд Ц.Даваасүрэн ахалсан 15 гишүүний бүрэлдэхүүнтэй Ажлын хэсэг байгуулж, нийт 5 удаа хуралдан, УИХ-ын гишүүд болон төрийн, төрийн бус байгууллагуудаас ирүүлсэн саналыг хэлэлцэв.

2024 оны намрын чуулганаар 2025 оны төсөв, Үндэсний баялгийн сангийн төсөв, Нийгмийн даатгал, Эрүүл мэндийн даатгалын сангийн төсвийн төслүүдийг хэлэлцэх явцад Төсвийн байнгын хорооны даргын хувиар хуралдааныг удирдан, санал дүгнэлтийг нэгдсэн хуралдаанд хүргүүлэх ажлыг зохион байгуулав.

АЖЛЫН ХЭСЭГ

Мал аж ахуйн салбарыг эрсдэлээс хамгаалах эрх зүйн орчныг бүрдүүлнэ

2024–2026 онд хууль, төсөв, бодлогын баримт бичгийг хэлэлцүүлэгт бэлтгэх чиг үүрэг бүхий Ажлын хэсгүүдэд орж ажилласан. УИХ-ын даргын 43 дугаар захирамжаар  2024 оны 08 дугаар сард 15 гишүүний бүрэлдэхүүнтэй Ажлын хэсгийг ахалж, төсвийн хүрээний мэдэгдэл, төсвийн төсөөлөлтэй холбоотой хуулийн төслүүдийг хэлэлцүүлэгт бэлтгэв.

Ажлын хэсгийн 2025 оны хоёрдугаар сарын хуралдааны товд мал аж ахуйн салбарыг эрсдэлээс хамгаалах, гол нэрийн бүтээгдэхүүний хангамж, нийлүүлэлтийн тогтвортой байдлыг хангах, нөөцийг нэмэгдүүлэх хүрээнд хууль, эрх зүйн орчныг боловсронгуй болгох асуудлыг судалж, санал боловсруулах асуудал тусгагдсан. Энэхүү aжлын хэсгийн хүрээнд гишүүд, төрийн болон бусад байгууллагаас ирүүлсэн санал, мэдээллийг нэгтгэн судалж, хуулийн төсөл болон бодлогын шийдэлд тусгах саналыг боловсруулан Байнгын хороо, чуулганы нэгдсэн хуралдааны хэлэлцүүлэгт бэлтгэхэд оролцов.

ХУУЛЬ ТОГТООХ БОЛОН ХЯНАЛТЫН ҮЙЛ АЖИЛЛАГАА

 Өргөн барьсан хууль, тогтоолын төсөл

Төсөв, өрийн удирдлага, төрийн санхүү, эдийн засгийн бодлоготой холбоотой хууль тогтоомжийн хэлэлцүүлэгт идэвхтэй оролцож, Байнгын хорооны санал, зарчмын зөрүүтэй саналын томьёолол гарган ажиллав.

-Тамхины хяналтын тухай хуульд нэмэлт, өөрчлөлт оруулах тухай хуулийн төслийг нэр бүхий УИХ-ын гишүүдийн хамт өргөн мэдүүлэв. (2025)

-Хянан шалгах түр хороо байгуулах тухай тогтоолын төслийг нэр бүхий УИХ-ын гишүүдийн хамт өргөн мэдүүлэв. (2026)

    Төсөв, санхүү, өрийн удирдлагын талаар асуулга тавив

УИХ-ын гишүүний асуулт, асуулга нь Засгийн газрын үйл ажиллагаа, бодлогын хэрэгжилтэд парламентын хяналт тавих үндсэн хэрэгслийн нэг юм. Энэ хүрээнд төсөв, төрийн санхүү, өрийн удирдлага болон бодлогын хэрэгжилттэй холбоотой асуудлаар чуулганы нэгдсэн хуралдаан, Байнгын хорооны хэлэлцүүлэгт асуулт тавьж, байр сууриа илэрхийлэв.

ТОМИЛОЛТ, ГАДААД ХАРИЛЦАА

Парламентын үйл ажиллагааны хүрээнд гадаадын Элчин сайдын яам, парламент хоорондын харилцаа болон гадаад томилолттой холбоотой онцлох мэдээллүүдээс хүргэе.

-Уругвай Улсын Элчин сайдын яамны Элчин зөвлөх Мартин Орландог хүлээн авч уулзав. (2024.12.12)

-НҮБ-ын Хүн амын сангийн Ази, Номхон далайн Бүсийн дэд захирал Александар Саша Бодироза тэргүүтэй төлөөлөгчдийг хүлээн авч уулзав. (2025.05.23)

 Төсөв, санхүү парламентын хяналтад төвлөрч ажиллав

Улсын Их Хурлын гишүүн Ц.Даваасүрэн улсын төсөв, төрийн санхүү, өрийн удирдлага, хууль тогтоомжийн хэлэлцүүлэг болон парламентын хяналтын чиглэлд төвлөрч ажиллав. Төсвийн байнгын хорооны даргын хувиар 2024–2025 онд төсвийн бодлогын гол асуудлыг хэлэлцэн шийдвэрлэх ажлыг удирдаж, ажлын хэсгүүдийн үйл ажиллагаагаар хууль, төсвийн төслүүдийг хэлэлцүүлэгт бэлтгэх, гишүүд болон байгууллагуудаас ирүүлсэн саналыг тусгах чиглэлээр ажиллалаа. Парламентын дэд хорооны үйл ажиллагаа, Төрийн байгуулалтын байнгын хорооны хэлэлцүүлэгт оролцож, хууль тогтоох болон парламентын хяналтын үйл ажиллагааг хэрэгжүүлэхэд чухал хувь нэмрээ оруулан ажиллаж байна.