Хүний эрхийн дэд хорооны дарга Х.Баасанжаргал НҮБ-ын Хүний эрхийн Дээд комиссарын газрын төлөөлөгчдийг хүлээн авч уулзав

      Улсын Их Хурлын гишүүн, Хүний эрхийн дэд хорооны дарга Х.Баасанжаргал Нэгдсэн Үндэстний байгууллагын Хүний эрхийн Дээд комиссарын газрын Хүний эрхийн зөвлөл, Хүний эрхийн гэрээний механизмуудын газрын Хүний эрхийн ажилтан хатагтай Рим Маззави, Олон улсын үйл ажиллагааны газар, Ази, Номхон далайн бүс нутгийн хэлтсийн Хүний эрхийн ажилтан ноён Навийд Ахмад, Монгол Улс дахь НҮБ-ын Суурин зохицуулагчийн газрын Хүний эрхийн үндэсний зөвлөх ноён Ч.Алтангэрэл нарыг өнөөдөр (2026.10.19) хүлээн авч уулзав.

Уулзалтын эхэнд, Улсын Их Хурлын гишүүн, Хүний эрхийн дэд хорооны дарга Х.Баасанжаргал НҮБ-ын Хүний эрхийн Дээд комиссарын газрын төлөөлөгчдийн Монгол Улс дахь ажлын айлчлалд амжилт хүсээд, цаашид хамтран ажиллах тэргүүлэх чиглэлүүдээ тодорхойлж, санал солилцохоо илэрхийлэв.

Тэрбээр, Монгол Улс Ази, Номхон далайн бүс нутагтаа хүний эрхийн асуудлыг хөндөж ажилладгаараа тэргүүлдэг. Улаанбаатар хотод Бүс нутгийн хүний эрхийн сургалт судалгааны төв байгуулахаар төлөвлөж, 2027 оны улсын төсөвт санхүүжилтийг тусгаж байна гэлээ. Түүнчлэн цахим орчин дахь хүний эрхийн асуудлыг нэн тэргүүнд тавьж байгаагаа дуулгаад, хүүхдийн эрх, гэр бүл, эмзэг бүлгийн эрх, шүүхийн бие даасан хараат бус байдалд онцгойлон анхаарч ажиллах шаардлагатай хэмээн онцлов. Шүүх засаглалын хараат бус байдлыг шинээр нээгдэх төвийн үйл ажиллагааны тэргүүлэх чиглэлд оруулахад дэмжлэг үзүүлэхийг мөн хүслээ.

 

 

Нэгдсэн Үндэстний байгууллагын Хүний эрхийн Дээд комиссарын газрын Хүний эрхийн зөвлөл, Хүний эрхийн гэрээний механизмуудын газрын Хүний эрхийн ажилтан хатагтай Рим Маззави, цаг зав гаргаж хүлээн авч буйд талархал илэрхийлээд, Монгол Улсын хэрэгцээнд тулгуурласан хөтөлбөрийг урт хугацаанд тогтвортой хэрэгжүүлэх, хууль тогтоомжтой холбоотой замын зураглал гаргахад дэмжлэг үзүүлэх, бүс нутгийн болон үндэсний хэмжээнд хамтран ажиллахад бэлэн байна гэв. Түүнчлэн хамтын ажиллагааны тэргүүлэх чиглэлүүдэд тусгах үнэ цэнтэй саналууд гаргасанд талархав.

Уулзалтын төгсгөлд талууд хамтын ажиллагаагаа улам өргөжүүлж, хамтарсан судалгаа хийх талаар санал нэгдэв гэж Улсын Их Хурлын Нээлттэй парламентын газраас мэдээллээ.