АН Оюутолгойн ногдол ашгийг иргэдэд олгохыг эсэргүүцэв

     Ерөнхийлөгч У.Хүрэлсүх Ерөнхий сайд Н.Учрал, Сангийн сайд З.Мэндсайхан нарыг хүлээн авч уулзахдаа Оюутолгойн ногдол ашгийг ард иргэдэд тэгш хүртээхийг санал болгосон. Өөрөөр хэлбэл, Ерөнхийлөгч У.Хүрэлсүх "Баялагтаа эзэн Монгол" санаачилгыг өмнө нь дэвшүүлж байсан бол энэ удаад Үндсэн хуулийн "Байгалийн баялаг бүх ард түмний мэдэлд байна" гэдэг заалтыг бодитойгоор хэрэгжүүлэх үүднээс дээрх саналыг гаргасан гэж харж болно. Гэвч Төрийн тэргүүний санал зарим нам, улстөрчдөд таалагдсангүй.

АН-ын дарга О.Цогтгэрэл өнөөдөр (2026.11.05) мэдээлэл хийх үеэрээ "Оюутолгойн гурван их наяд төгрөг ногдол ашиг мөн үү гэдэг тухайд Засгийн газар нэг мөр хариулт өгөх ёстой. "Ногдол ашгийг иргэдэд жил бүр өгнө" гэдэг байр суурийг хөрөнгө оруулагчид илэрхийлсэн үү гэдгийг тодотгох хэрэгтэй. Мэдээллүүдийг нэгтгэн дүгнэж үзэхэд нөгөө талаас буюу "Рио Тинто"-ийн талаас энэ талаар байр сууриа илэрхийлээгүй. "Рио Тинто"-оос Монгол Улсын Засгийн газарт өгөхөөр санал болгосон байх магадлалтай нэг удаагийн төлбөр юм бол хөрөнгө оруулагч талтай ямар нэгэн зүйлийг авч, өгөхөөр тохиролцсон байж таарна. Энэ нь чухам юу бол. Үүний цаана "Онтрэ"-ийнх гэж буй Оюутолгойн 30 хувьтай тэнцэх хэмжээний баялгийн нөөц бүхий ордыг наймаалцах асуудал бий гэдгийг үгүйсгэх аргагүй. Яагаад гэвэл, "Рио Тинто"-ийнхон "Монголын талд ногдол ашиг өгнө" гэж нэг ч үг хэлээгүй. "Онтрэ"-той холбоотой гэрээ, хэлэлцээрт ахиц гарч байгаа" л гэсэн" гэв. УИХ-д 42 суудалтай АН-ынхан ийнхүү Оюутолгойн ногдол ашгийг ард түмэнд хүртээхийг эсэргүүцэв.

Ж.Энх