Дэлхийн зах зээлд газрын тосны үнэ буурлаа

     АСТАНА, 2026 оны арваннэгдүгээр сарын 9 /Kazinform/. Дэлхийн зах зээлд газрын тосны үнэ даваа гаргийн өглөө буурчээ. Өглөөний байдлаар, Brent маркийн газрын тосны ирэх нэгдүгээр сард нийлүүлэх фьючерс үнэ 0.57 хувиар буурч, нэг торх нь 97.76 ам.долларт хүрсэн бол WTI маркийн газрын тосны үнэ нэг торх нь 90.73 ам.доллар болж, 0.11 хувиар буурсан байна.

Харин ОХУ-ын Urals маркийн газрын тосны үнэ 10 хувиар буурч, баррель нь 76.85 ам.долларт хүрчээ.

АНУ-ын Ерөнхийлөгч Дональд Трамп мөргөлдөөнийг зогсоох асуудлаар Вашингтон, Техраны хооронд явуулж буй зөвлөлдөх уулзалтад ихээхэн ахиц гарсныг мэдэгдсэн нь газрын тос үнэ буурахад голлон нөлөөлсөн байна. 

АНУ, Ираны талуудын шууд бус хэлэлцээнд зуучилж буй гол улсуудын нэг нь Катар юм. Тус улсын Эмир Шейх Тамим бин Хамад Аль Тани 11 дүгээр сарын 6-нд Д.Трамптай уулзах үеэрээ Ойрх Дорнодын хурцадмал байдлыг намжаах дипломат хүчин чармайлтын талаар хэлэлцжээ.

Хэдийгээр дипломат яриа хэлэлцээ ахицтай байгаа ч геополитикийн эрсдэл хэвээр байна. Ням гарагт хуситууд Саудын Арабын “Saudi Aramco” компанийн Эр-Рияд хот дахь оффис руу халдсан тухайгаа мэдэгджээ.

Уг халдлага гарсантай холбогдуулан Эр-Рияд хот, Нажран муж болон Зүүн мужийн Даммам, Эль-Ахса, Букайк хотуудад аюулаас эрт анхааруулах системийг ажиллуулсан бөгөөд удалгүй эрх баригчид аюул өнгөрсөн тухай мэдээлсэн байна.

Үүний зэрэгцээ Ормузын хоолойн орчимд байдал түгшүүртэй хэвээр байна. Ираны талын зөвшөөрөөгүй чиглэлээр уг хоолойгоор дамжин өнгөрөхийг оролдсон хоёр хөлөг онгоц минад өртөж, гал гарсан тухай тус улсын хувьсгалт гвардын корпус мэдэгджээ.