ХЗБХ: “Санхүүгийн зохицуулах хорооны гишүүнд нэр дэвшигчийг бүртгэх тухай” Байнгын хорооны тогтоолын төслийг батлав

     Хууль зүйн байнгын хорооны хуралдаан өнөөдөр (2026.11.11) 10.55 цагт 57.1 хувийн ирцтэй эхэлж, гурван асуудал хэлэлцлээ.

Хуралдаанд Улсын Их Хурлын гишүүн Б.Баярбаатар, Н.Алтанхуяг, С.Эрдэнэболд, Л.Соронзонболд, О.Алтангэрэл, С.Цэнгүүн, П.Сайнзориг, О.Номинчимэг, У.Отгонбаяр, Б.Пүрэвдорж, Дав.Цогтбаатар, С.Одонтуяа, Дам.Цогтбаатар, Л.Мөнхбаатар, Х.Тэмүүжин, Э.Батшугар, Ц.Сандаг-Очир, Г.Дамдинням, Б.Дэлгэрсайхан, М.Нарантуяа-Нара, Д.Пүрэвдаваа нар оролцсон.

Хуралдаанаар Хууль зүйн зөвлөмжийг хэлэлцсэн. Улсын Их Хурлаар хэлэлцэж байгаа Монгол Улсын Их Хурлын тухай хуульд нэмэлт, өөрчлөлт оруулах, Монгол Улсын Их Хурлын чуулганы хуралдааны дэгийн тухай хуульд нэмэлт, өөрчлөлт оруулах тухай, хуулийн нэгтгэсэн төслүүдийн талаар гаргасан Хууль зүйн зөвлөмжийг УИХ-ын Тамгын газрын Хуулийн газрын дарга Ш.Хишигсүрэн танилцуулсан.

Байнгын хорооны дарга Л.Мөнхбаатар, Улсын Их Хурал дахь Ардчилсан намын бүлгийн дарга Б.Түвшингээс ирүүлсэн мэтгэлцээн явуулах тухай албан бичгийн хариуг хүргүүлсэн талаар мэдээлэв. Тодруулбал, Монгол Улсын Их Хурлын чуулганы хуралдааны дэгийн тухай хуулийн 11.2.1, 11.2.2-т хууль, тогтоолын төслийг хэлэлцэх эсэх үе шатанд төслийн үзэл баримтлалын хүрээнд болон анхны хэлэлцүүлгийн үе шатанд мэтгэлцээн явуулахаар заасан. Энэ асуудлын тухайд эцсийн хэлэлцүүлэг учраас мэтгэлцээн явуулах боломжгүй гэдэг хариу хүргүүлсэн талаар гишүүдэд танилцуулсан.

Улсын Их Хурлын гишүүн Н.Алтанхуяг, П.Сайнзориг, Х.Тэмүүжин нар хэлэлцэж буй асуудалтай холбогдуулан асуулт асууж, үг хэлэв. Гишүүд, Цэцэд хандана гэдэг нь цөөнхөд эрх мэдэл олгож байна гэхээс илүү УИХ Үндсэн хууль зөрчсөн шийдвэр гаргахаас сэргийлэхэд чиглэдэг гэдгийг онцлоод, хууль батлах квот, Үндсэн хуулийн хороотой болох шаардлага, хуулийн залгамж чанар, тогтвортой байдлыг хангах зэрэг асуудлыг хөндлөө.

Эцэст нь хэлэлцэж буй асуудлаар Улсын Их Хурал дахь МАН-ын бүлэг таван өдрийн завсарлага авав.

Үргэлжлүүлээд, “Хүний эрхийн Үндэсний Комиссын гишүүнийг сонгон шалгаруулах ажлын хэсгийн бүрэлдэхүүнд өөрчлөлт оруулах тухай” Байнгын хорооны тогтоолын төслийг хэлэлцэв. Энэхүү ажлын хэсгийн бүрэлдэхүүнийг Хууль зүйн байнгын хорооны 2026 оны 10 дугаар сарын 13-ны өдрийн 23 дугаар тогтоолоор баталсан юм.

Тогтоолын төсөлтэй холбогдуулан асуулт асууж, үг хэлэх гишүүн байгаагүй тул санал хураалт явуулж, хуралдаанд оролцсон гишүүдийн 65.2 хувийн саналаар Байнгын хорооны тогтоолын төслийг батлав.

Байнгын хорооны тогтоолоор Ажлын хэсгийн бүрэлдэхүүнд багтсан Хууль зүй, дотоод хэргийн яамны албан тушаалтныг өөрчилсөн юм.

Хуралдааны төгсгөлд “Санхүүгийн зохицуулах хорооны гишүүнд нэр дэвшигчийг бүртгэх тухай” Байнгын хорооны тогтоолын төслийг хэлэлцэж, санал хураалтад оролцсон гишүүдийн 69.6 хувь нь дэмжлээ.

Монгол Улсын Их Хурлын тухай хуулийн 22 дугаар зүйлийн 22.3.13 дахь заалт, Монгол Улсын Их Хурлын чуулганы хуралдааны дэгийн тухай хуулийн 129 дүгээр зүйлийн 129.3 дахь хэсэг, Монгол Улсын Их Хурлын хяналт шалгалтын тухай хуулийн 30 дугаар зүйлийн 30.1, 30.7 дахь хэсэг, Санхүүгийн зохицуулах хорооны эрх зүйн байдлын тухай хуулийн 11 дүгээр зүйлийн 11.2, 11.3 дахь хэсгийг үндэслэн Санхүүгийн зохицуулах хорооны гишүүнд нэр дэвших хүсэлтийг 2026 оны 11 дүгээр сарын 11-ний өдрөөс 11 дүгээр сарын 18-ны өдрийн 17.30 цаг хүртэлх хугацаанд хүлээн авах, сонгон шалгаруулалтын зарыг олон нийтэд мэдээлэх, нэр дэвшигчийн хүсэлт, материалыг хүлээн авах ажлыг холбогдох хууль тогтоомжийн хүрээнд зохион байгуулахаар тогтов гэж Улсын Их Хурлын Нээлттэй парламентын газраас мэдээллээ.